1 Samueli 28

1Tempo atuu to Pelisiti mpopumpu sorodadudo ira mpe'iwaliako ira to Isaraeli. Ipotae i Akisi ndi Daudi, ”Manasa uto'oriomo nine omue saru sorodadumu asalakono melako mpetea saru sorodaduku.” 2Sumangki i Daudi ndi Akisi, ”Moiko, komiu koa tumo'orio hapa anu ta pinokoweweuno tetenaamiu andio.” Ipotae i Akisi ndi Daudi, ”Tewala kanatuu, kupotoroko kau po'angga ndi ongkue asa ntinuwumu.”

I Saulu i Eni-Dore

28:3-25

3 # Ima. 20:27; Win. 18:10-11; 1Sam. 25:1 Mateomo i Semueli ka luwudo to Isaraeli mensabangio ka domengkaburuo i Rama, a kotano. I Saulu umariomo sumaari ira luwuno mia mpopoboi onituno mia mate ka puu pongkita anu ta gagi inso i wita atuu.

4Mpepumpu iramo to Pelisiti ka domelako mpekema i Sunemi. I Saulu mbo'u pumpu ira to Isaraeli, ka dompekema i Giliboa. 5Kumita ira sorodadu to Pelisiti, doitoomo i Saulu tedoa mondende aroano. 6#Pod. 27:21Ka i'amba i Saulu mo'ema pontiso ndi Ondae i Ue, sine nahi Dosangkio i Ue, maupo a mo'ipi, telalo a Urimi, ke a luwudo nabi. 7Motae i Saulu a luwuno tetenaano, ”Impo'ungkeakunemo asa beine puu pompoboi onituno mia mate. Aku mo'ema pontiso inso ndi onae.” Dompotaeakono tetenaano, ”Hinao asa beine puu pompoboi onituno mia mate i Eni-Dore.” 8I Saulu mo'onde-onde kana komba onae, mompokona sangka susua. Mansano wongi lumakoomo saru orua mia walino tepohaweakono beine atuu. Motae i Saulu, ”Pongkitaakunemo hapa anu ta gagi molalo onituno mia mate, poboiakunemo isema anu aku pauakomu.” 9Sine ipotae beine atuu ndi onae, ”Manasa komiu tumo'orio hapa anu wineweunomo i Saulu; ipokoropu iramo luwu puu pompoboi onituno mia mate ka puu pongkita anu ta gagi inso i wita andio. Tembio ka komiu sumolangi aku ka mepate aku?” 10Onaemo ka ipesumpa i Saulu, ipotae, ”A nee-Do i Ue anu tuwu, omue nahi komohawe pohuku hangano po'emaku andio.” 11Mesikeno beine atuu, ”Isema anu aku moboiakomiu?” Sumangki i Saulu, ”I Semueli poboiakune.” 12Mansano kumitao i Semueli, beine atuu meraali, ipotaeakono i Saulu, ”Tembio ka ipopo'oo aku? Ka hinaano omiumo mokole Saulu!” 13Ipotae mokole ndi onae, ”Si doito! Hapa kinitamu?” Sumangki beine atuu ndi Saulu, ”Kukitao asa onitu meluarako inso a laro wita.” 14Mesikeno i Saulu ndi onae, ”Kana'umpe rupano?” Isangkio, ”Meluarako asa mia mota'u mekolimbuako lemba meloe.” Ito'oriomo i Saulu nine onaemo i Semueli, onaemo kai penggolontuu mesomba ra'ino a wita.

15Umarino atuu, motaeomo i Semueli ndi Saulu, ”Tembio kau sosanggolo aku ka moboi aku?” Motae i Saulu, ”Tedoa akumo tepakada. To Pelisiti mpe'iwalaiakune, ka Ondae Ue Ala Dobinta akumo. Nami Dosangki aku mbo'u, moiko molalo a nabi, ke a mo'ipi. Onaemo pu'uno ka kupoboi komiu, kai pauakune hapa anu ta wineweuku.” 16Motae i Semueli, ”Tembio kau pesikeno ndi ongkue, komba Dopebungkuikomo i Ue ke ka gagi iwalimu? 17#1Sam. 15:28Ondae i Ue weweuo ndi omue kana anu umariomo Dopauo ndi ongkue. Dokansa-kansaomo i Ue poparentaa inso a ngkaemu ka Doweeakono i Daudi mia pine'ala-alamu. 18#1Sam. 15:3-9Hangano u'ewaio songka-Do i Ue ka nahi utondaako Ira po'ehe-Do rumopu ira luwu to Amale. Ondae i Ue Ira weweuo anu kanandio ndi omue oleo andio. 19Ondae i Ue meweengako ira to Isaraeli saru omue a ngkaedo to Pelisiti. Tisomo, omue ka anamu ira mpo'ia ndi ongkue. Kanatuukoa mbo'u sorodadu to Isaraeli, Ira meweengakono i Ue a ngkaedo to Pelisiti.” 20I tempokoa atuu, i Saulu tebangku tepolungku a wita, tedoa doito hangano rumongeo pauno i Semueli atuu ka telusa hangano asa oleo ka asa wongi nahi pongkaa.

21Aiwaomo beine atuu umpedaakono kumitao i Saulu anu tedoa tededengke. Ipotae beine atuu ndi onae, ”Kitao, tetenaamiu andio iperorongeakonomo po'emamiu. Kuta'oakonomo penaaku merorongeakono pau anu ipohaweakune. 22Kanandio-andio, irongeomo po'emano tetenaamiu andio. I'eheakunemo mompatindaakomiu asa roti i aromiu ka ipongkaamo kai morosokoa motilaloakono pelempaamiu.” 23Sine nahi behe i Saulu ka ipotae, ”Nahi kubehe mongkaa.” Mansado medadaio tetenaa beine atuu, itondaako ira po'emado. Ka i'amba mewangu inso a wita ka ipentoro a mpoturia. 24Beine atuu hinao asa ana sapi mewalo i rahano, ka ipari-pario sumumbeleo. I'alao tarigu ka iweweuo roti ka iraramio gagi roti nahi peragi. 25Ipatindao i arono i Saulu ka luwuno tetenaano, ka dompongkaa. Ka do'amba mpentade melako wongi koa atuu.

Currently Selected:

1 Samueli 28: XMZ

Highlight

Copy

Compare