1 Mokole 9
9
Ondae i Ue mepopokita kompenduano ndi Salomo
9:1-9
(2Taw. 7:11-22)
1Mansano umari i Salomo wanguo raha-Do i Ue ka langkanaeno mokole, saru luwuno anu ineheno, 2#1Mok. 3:5; 2Taw. 1:7Ondae i Ue mepopokita kompenduano ndi Salomo, kana umari-Do mepopokita ndi onae i Gibeo. 3Ondae i Ue mepau ndi onae, ”Kurongeomo pekakai ka po'emamu anu pinohawemu i aro-Ku. Kupokomemporiomo raha anu winangumu andio anu weweuo nee-Ku mo'ia i tu'ai ranta nahina tampulano. Mata-Ku ka aroa-Ku ta mo'ia i ra'ai asantinuwu. 4Omue mbo'u, tewala tuwuko i aro-Ku mengkena kana i Daudi, amamu, saru a moleono aroamu, tuwu moleo, ka moweweu menunu saru luwuno anu Kuparentaakomu, ka tewala upekariao luwuno pompakosi ka atora-Ku, 5#1Mok. 2:4Aku mokorosoo kadera poparentaamu a nto Isaraeli, anu nahina tampulaano, kana anu Kudandiakonomo i Daudi, amamu, saru mepau: Inulemu nahi ta hori te'otu inso a ngkadera poparentaa i Isaraeli. 6Sine tewala omue saru luwuno anamu mpebungkui Aku, nahi mpe'ini a luwuno parenta ka pompakosi-Ku anu Kuweeakomiumo i aromiu, ka melako mpesomba a mpinesombai susua ka mpenggoluntu mpelangkaio, 7Aku mokotampula ira to Isaraeli inso a wawo wita anu Kuweeako iramo. Aku mebungkuio raha anu umariomo Kupokomemporio tiano nee-Ku atuu. Isaraeli ta gagi potundaano ka pasinggiri i olono luwuno tongku. 8#2Mok. 25:9; 2Taw. 36:19Raha andio tamokoa gagi hanga raha, ranta sompo mia anu telalo ta kohali-hali, ira mpomansu ka dompotae: Tembio Ondae i Ue ka Doweweuo kanandio wita ka raha andio? 9Ira mpotae mia: Hangano ondae mebinta Ira Ue, Ue Alado, anu wawa ira uempu'udo mpeluarako inso i wita Masiri ka mpe'ini a mpinesombai susua ka mpenggolontu mpelangkaio saru mpesomba ndi onae. Onaemo pu'uno Ondae i Ue mompotii luwuno masukaraa andio ndi ondae.”
Pelempano Powanguno i mokole Salomo
9:10-28
(2Taw. 8:1-18)
10Rua pulu nta'u lembuino, umari iwanguo i Salomo orua raha atuu, onaemo raha-Do i Ue ka langkanaedo mokole. 11I mokole Salomo moweeakono i Hirami rua pulu kota i wita Galilea, hangano i Hirami mokole i Tirusi, umariomo mompatindaakono i Salomo keu arasi, keu sanobari ka wulaa montonda hadiono anu ineheno. 12Sine, mansano hawe i Hirami inso i Tirusi ka ikitao luwuno kota anu iweeakono i Salomo atuu, nahina ine'eheo. 13Onaemo ka ipotae, ”Kota kana hapa anu iwee akumo andiodo, pepaekompoku?” Mia meneeakono wita Kabuli ranta hawe oleo andio. 14I Hirami umariomo mo'oliwiakono mokole asa etu rua pulu talenta wulaa.
15Ndiomo burino mongkona luwuno mia mpo'angga dinadai anu umari tinenado mokole Salomo ka domewanguo raha-Do i Ue, langkanaeno onaeno, Milo, bente Yerusale, Hasori, Megido ka Geseri. 16I Pirao, mokole i wita Masiri atuumo, anu lumako metea ka ipongko'alao Geseri, itunuo ka ipepate ira to Kana'a anu mpo'ia i kota atuu. Iweeakono kota atuu gagi kowei ndi anano, kombiano i Salomo. 17Ka i'amba i Salomo wali wanguo Geseri. Domewanguo mbo'u Beti-Horoni Hiliri, 18Ba'alati, Tamari i pada one, i wita atuu, 19luwuno kota popumpuano kaanga i Salomo, luwuno kota po'iangano kareta, luwuno kota po'iangaado sorodadu mpengara, ka luwuno anu ineheno i Salomo wanguo i Yerusale, i torukuno Libano, ke a luwuno wita pinabawaino, 20Luwuno mia anu da tepo'ia, inso a nto Amori, to Heti, to Perisi, to Hewi ka to Yebusi, luwuno anu nahi tewinso to Isaraeli, 21ondaemo inuledo tongku atuu anu da mpo'ia i wita atuu, anu nahi dompokoropuo to Isaraeli, ondaemo anu tinenano i Salomo gagi puu mpo'angga dinadai hawe oleo andio. 22To Isaraeli nahina anu pinokogagi atano i Salomo. Ondae megagi sorodadu, pegawai, anu langkai potorono, ka sorodadu langkai pangkano, ke tadulakodo sorodadu mpekareta ka sorodaduno mpengara.
23Ndiomo luwuno petewawado puu mpodagai anu dumagaio anggaano i Salomo, lima etu ka lima pulu mia hadiono. Ondae parenta ira palili anu me'anggao anggaa atuu.
24Nahi tehine umarino melimba anano i Pirao inso i kota Daudi lumako i raha anu iwanguakonomo i Salomo tiano, i Salomo mowangu mbo'u Milo.
25 #
Pel. 23:17; 34:23; Win. 16:16 Pentolu asa nta'u i Salomo mompesombaako pesomba tinunu ka pesomba tekaduduia a wawo meda pontunua pesomba anu winanguno tia-Do i Ue, saru mompesombaako pesomba dupa i aro-Do i Ue. Kanandiomo ipoko'umario raha atuu.
26I mokole Salomo mowangu mbo'u hadio kapala i Esioni-Geberi umpeda i Eloti, i wiwi ntahi Teberau i wita Edomi. 27Saru luwuno kapala atuu i Hirami tumena ira pegawai, luwuno anu mpo'angga a ngkapala anu mpoto'ori mongkona tahi, merongaako ira pegawaino i Salomo. 28Ondae melako i Opiri ka inso i ra'ai mpo'ala ira pato etu ka rua pulu talenta wulaa, ka do'amba mewawao ndi mokole Salomo.
Currently Selected:
1 Mokole 9: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
