1 Mokole 8

PORONSO RAHA MEMPORI

8:1-66

Burua pedandia linimba a raha-Do i Ue

8:1-13

(2Taw. 5:2–6:2)

1 # 2Sam. 6:12-16; 1Taw. 15:25-29 I Tempo atuu i mokole Salomo tumena ira luwuno mia memota'u to Isaraeli, luwuno petewawa suku, luwuno petewawa pepe'etuado to Isaraeli, mpepumpu i arodo mokole Salomo i Yerusale, ka domewawao burua pedandia-Do i Ue inso i kota Daudi, onaemo Sioni. 2Luwuno to Isaraeli mpepumpu i arodo mokole Salomo a oleo langkai i wula Etanimi, onaemo wula ko'opitu. 3Mansado mehawe luwu mia memota'udo to Isaraeli, domentandeomo sando mpesomba burua atuu. 4Domewawao burua-Do i Ue, Kema Tepotowoa, ka luwuno parewa mempori anu kongko a Kema atuu. Luwuno atuu domenselao sando mpesomba ka to Lewi. 5I mokole Salomo ka luwuno to Isaraeli anu mpepumpu iramo i arono, meronga saru onae i arono burua atuu, mpopesombaako asa bawaa bembe bimba ka sapi anu nahi pinokodoa ka nahi pinokopau hadiono. 6Ka i'amba luwuno sando mpesomba mewawao Burua Pedandia-Do i Ue atuu a mpo'iangano a bolongko i larono ntu'u raha atuu, po'ianga tedoa mempori, i totono panido kerubi; 7Hangano kerubi atuudo wileo orua panido i wawono po'iangano burua atuu ka borungio burua saru luwuno keu ponselano inso i wawono. 8Luwuno keu ponsela atuu ondau ntu'u. Tapuno tengkita inso a mpo'ianga mempori anu i arono bolongko i larono ntu'u atuu, sine nahi tengkita inso i bungkuno. I tu'aimo po'iangano ranta hawe oleo andio. 9#Win. 10:5Nahina maupo hapa anu susua a laro burua atuu, sangkadio orua lempe watu anu ninaano i Musa i larono i torukuno Hore, po'iangaa-Do i Ue moweweu pedandia saru to Isaraeli i tempono dompeluarako inso i wita Masiri.

10 # Pel. 40:34-35 Mansado mpeluarako sando mpesomba inso a mpo'ianga mempori, bukeomo seru a laro raha-Do i Ue. 11Luwuno sando mpesomba nahi dompokompentade tehine mpoweweu pominggu hangano seru atuu, ka hangano maramba-Do i Ue umihiio raha-Do i Ue.

12Ka i'amba motae i Salomo,

”Ondae i Ue mepau Iramo, nine Ira mo'ia a laro nseru anu mokapa ntu'u.

13Menteeano kupowanguaKomiumo raha anu tekosi,

po'ianga-Miu mpiha ranta nahina tampulaano.”

Ondae i Ue umihiio dandi-Do ndi Daudi

8:14-21

(2Taw. 6:3-11)

14Ka do'amba mokole mewolili me'aro a luwudo bawaa Isaraeli anu kontongaado mpentade ka i ronso ira. 15Ipotae, ”Unde-unde Ira i Ue, Ue Alado to Isaraeli, anu Doweweuakonomo kae-Do pau anu Dopohaweakonomo wiwi-Do ndi Daudi, amaku, kanandio: 16#2Sam. 7:1-13; 1Taw. 17:1-12Mompu'u Kuwawa ira bawaa-Ku Isaraeli mpeluarako inso i wita Masiri, nahi Kupobiniki maupo kota hapa inso i olono luwuno suku Isaraeli kai winangu asa raha kai po'ia nee-Ku i ra'ai, sine Kubinikiomo i Daudi kai pabawai ira bawaa-Ku Isaraeli.” 17I Daudi, amaku, dopo'asao aroado mowangu raha po'iangano nee-Do i Ue, Ue Alado to Isaraeli.

18Sine mepau Ira i Ue ndi Daudi, amaku, ”Omue lano upo'asao aroamu mowangu raha po'iangano nee-Ku ka tinoomu atuu tedoa moiko. 19Butumo koa omue nahi moiko uwanguo raha atuu, tendeano ana ngkoroimu anu ta pine'anaako, onaemo anu ta wanguo raha atuu tiano nee-Ku. 20Do'ihiiomo i Ue dandi anu umariomo Dopauo. Ongkuemo umeu ira i Daudi, amaku, ka mentoro a ngkadera poparentaa i Isaraeli, kana anu pinau-Do i Ue, saru wanguo raha andio tiano nee-Do i Ue, Ue Alado to Isaraeli. 21I ra'ai kupatindaomo po'iangano burua pedandia, anu me'ihi pedandia anu wineweu-Do i Ue saru uempu'uto, tempono Dowawa ira mpeluarako inso i wita Masiri.”

Pekakaino i Salomo

8:22-53

(2Taw. 6:12-42)

22Ka i'amba mentadeomo i Salomo i arono meda pontunua pesomba ndi Ondae i Ue i arodo luwuno bawaa Isaraeli, ka itaangakono kaeno kontahane i langi, 23ka ipotae, ”Oo Ue, Ue Alado to Isaraeli! Nahina Ue Ala kana Omiu, moiko i langi anu i wawono maupo i tolino anu i totono. Omiu anu mekariao pedandia ka pompehohawa a luwuno tetenaa-Miu anu tuwu tompaano aroano i aro-Miu. 24Omiu anu uminio dandi-Miu ndi tetenaa-Miu i Daudi, amaku, ka anu weweuakonomo kae-Miu pau anu Ipohaweakono wiwi-Miu, kana anu gagi a oleo andio. 25#1Mok. 2:4Kanandio-andio Oo Ue, Ue Alado to Isaraeli, Ipekariaomo hapa anu dinandi-Miu ndi tetenaa-Miu i Daudi, amaku, ka ipepau: Nahi ta hori te'otu i aro-Ku inulemu anu ta mentoro a ngkadera poparentaa i Isaraeli, tewala dompekario anamu salado saru mentuwu i aro-Ku, mengkena kana utuwu i aro-Ku. 26Kanandio-andio Oo Ue, Ue Alado to Isaraeli, Po'ineeomo ka igagi mengkaa dandi anu Ipauomo ndi tetenaa-Miu i Daudi, amaku.

27 # 2Taw. 2:6 Sine menteeke Omiu Ue Ala Komiu mo'ia i wawontolino? Menteeano langi, tendeano maupo langi luwuno langi, nahi ta moko'ulaKomiu, tamoako lahi raha anu winanguku andio. 28Maupo kanatuu, Irongeomo pekakai ka po'emano tetenaa-Miu andio, Oo Ue, Ue Alaku, Irongeomo pebooli ka pekakai anu winuatakono tetenaa-Miu i aro-Miu a oleo andio! 29#Win. 12:11Po'ineeomo ka Ipensiroio mpiha raha andio meene ka wongi, a mpo'ianga anu pinau-Miu, ’nee-Ku ta mo'ia i ra'ai,’ ka irongeo pekakai anu winuatakono tetenaa-Miu a mpo'ianga andio. 30Irongeomo po'emano tetenaa-Miu ka bawaa-Miu Isaraeli anu winuatako a mpo'ianga andio. Irongeomo a mpo'ianga-Miu i suruga; Irongeomo ka I'ampuni kamimo.

31Tewala asa mia tehala a mpe'asa miano, ka itinena mesumpaako totonaa a ngkoroino, ka i'amba aiwa mesumpa i arono meda pontunua pesomba-Miu i raha andio, 32po'ineeomo Irongeo i suruga, Iweweuo ka Ibitara ira tetenaa-Miu: humukuo anu sala saru mombalo wineweuno a ngkoroino onaeno, ka mokomenteeo mia anu mentee, saru moweeakono ponsulo menunu saru menteeno. 33Tewala bawaa-Miu to Isaraeli ntenangi a iwalido hangano ntehala ira ndi Omiu, ka do'amba wali mpepokule ndi Omiu ka pementeeo nee-Miu, mpekakai ka mpo'ema pompehohawa ndi Omiu i raha andio, 34po'ineeomo Irongeo inso i suruga, I'ampunio halado bawaa-Miu Isaraeli ka Iwawa ira mpepokule a wita anu Iweeako iramo uempu'udo.

35Tewala langi tetutuwi ka nahina usa, hangano ntehala ira ndi Omiu, ka do'amba mpekakai a mpo'ianga andio, pementeeo nee-Miu ka ntepidiakono halado, hangano Ipokonsii iramo, 36po'ineeomo i suruga ka I'ampunio halado tetenaa-Miu, bawaa-Miu Isaraeli, hangano Omiumo anu montisoako ira sala anu moiko anu asalakono ira mentondao. Po'ineeomo Ipompotii usa a wawo wita-Miu anu Iweeako iramo bawaa-Miu gagi tia pusaka-Do. 37Tewala i wita andio hinao mokoninggoa, hinao haki lele, ponsolagi pinopaho, haki mpinopaho, kosume, ke kosume mpokaa pinopaho, tewala iwali kumadu ira i aasa kotado, hapamokoa pohuku ke haki anu hina, 38ka i'amba asa mia ke luwudo bawaa-Miu to Isaraeli mpowuatako pekakai ka mpo'ema pompehohawa ka mentandeo kaedo i raha andio, hangano singge mia tumo'orio ma'isono aroano. 39Po'ineeomo Irongeo i suruga, po'ianga-Miu mpiha. Po'ineeomo Ipo'ampuni, moweweu, ka mombalo a sompo mia menunu saru luwuno wineweuno, hangano Omiumo tumo'orio aroano. Mentee ntu'u, butu koa Omiu anu tumo'orio aroano luwuno mia, 40ranta ka domedoitoako-Miu asa ntinuwudo i wawo wita anu Iweeako iramo uempu'u mami.

41Kanatuu koa mbo'u tewala hinao asa mia hawe, anu nahi tewinso bawaa-Miu Isaraeli, aiwa inso i wita olai hangano nee-Miu, — 42hangano ira merongeo mia mongkona nee-Miu anu langkai ka kae-Miu anu moroso saru tokia-Miu anu tetande — tewala onae aiwa mekakai i raha andio, 43po'ineeomo Irongeo mbo'u i suruga, po'ianga-Miu mpiha. Po'ineeomo Iweweuo menunu saru luwuno anu pinebooliakono mia hawe atuu ndi Omiu, ka luwuno tongku i tolino tumo'orio nee-Miu ka dumoitoako-Miu mengkena kana bawaa-Miu Isaraeli. Onaemo ka domento'orio nine raha anu kuwanguomo andio pinesusua tiano nee-Miu.

44Tewala bawaa-Miu mpeluarako mpetea umewai ira iwalido, maupo isua Itena ira, ka dompekakai ndi Omiu Ue, mpe'aro i kota anu Ibinikiomo ka a raha kuwanguomo tiano nee-Miu, 45po'ineeomo Irongeo i suruga pekakai ka po'emado ka moweeako ira moleoa. 46Tewala ntehala ira ndi Omiu, hangano nahina mia anu nahi tehala, ka tekuda-Miu ndi ondae, ka Ipeweengako ira a iwali, ka domewinawa gagi mia ntinawa a witado iwali anu olai ke anu umpeda, 47sine, tewala wali ira mpe'o'oleakono halado i wita po'iangado mentinawa, ka dompepokule, saru mpo'ema pompehohawa ndi Omiu i witado mia anu wawa ira gagi mia ntinawa, ka dompotae: Ntehala kamimo, mensala, ka mpoweweu anu mosa'o, 48tewala mpepokule ira ndi Omiu tompaano aroado ka tompaano tinuwudo i witado iwali anu wawa ira mentinawa, ka tewala mpekakai ira ndi Omiu saru mpe'aro a witado anu Iweeako iramo uempu'udo, a ngkota anu Ibinikiomo ka a raha anu kuwanguomo tiano nee-Miu, 49po'ineeomo Irongeo i suruga, po'ianga-Miu mpiha, pekakai ka po'emado ka moweeako ira moleoa. 50Po'ineeomo I'ampuni ira bawaa-Miu, anu ntehala iramo ndi Omiu ka luwuno pe'ewa anu wineweudo ndi Omiu, ka Iweeako iramo pompehohawa i arodo mia anu wawa ira gagi mia mentinawa, ranta mia atuudo mpehohawa ira, 51hangano ondae atuu bawaa-Miu ka tia pusaka-Miu anu Iwawa iramo mpeluarako inso i wita Masiri, inso i tongano awu pompokolonoa labu.

52Po'ineeomo Ipensiroio po'emano tetenaa-Miu ka a mpo'emado bawaa-Miu Isaraeli. Po'ineeomo Ironge ira maupo te'ipia dompebooli ndi Omiu. 53Hangano Omiumo anu monsia ira gagi tia pusaka-Miu inso i olodo luwuno tongku i tolino, kana anu Ipauomo molalo i Musa, tetenaa-Miu, i tempono Iwawa ira uempu'u mami mpeluarako inso i wita Masiri, Oo Ue Ala!”

Poronso ka po'unde-undeno i Salomo

8:54-61

(2Taw. 7:1-3)

54Mansano umari i Salomo tumandeo luwuno pekakai ka po'emano atuu ndi Ondae i Ue, mentadeomo inso i arono meda pontunua pesomba ndi Ondae i Ue, umari menggolontu ka itandeo kaeno kontahane i langi. 55Onae mentade ka ironso ira luwuno bawaa Isaraeli, ka ipepau meroku, ipotae, 56#Win. 12:10; Yos. 21:44-45”Unde-unde Ira i Ue, anu moweeako ira penaa-naaa a bawaa-Do Isaraeli menunu saru luwuno anu dinandi-Do; nahina maupo te'asa anu nahi Do'ihiio inso a luwuno dandi anu moiko, anu dinandi-Do molalo i Musa, tetenaa-Do. 57Po'ineeomo Ondae i Ue, Ue Alato, kumongkomi kita kana Dokongkomi iramo uempu'uto. Topomperorohi nahi Dobinta kita ke maupo tumadi kita, 58sine mokompetakoo aroato ndi Ondae ka tomentuwu montonda luwuno sala anu tiniso-Do, mekariao luwuno parenta-Do, luwuno pompakosi-Do ka luwuno atora-Do anu Doparentaako iramo uempu'uto. 59Po'ineeomo luwuno po'ema anu kupohaweomo i aro-Do i Ue, kongko umpeda ndi Ondae i Ue, Ue Alato, i tempono meene ka wongi, ranta ka Dopoweeako ira moleoa a ntetenaa-Do ka a bawaa-Do Isaraeli menunu anu kineredo sompo oleo, 60kai luwuno tongku i tolino tumo'orio, nine Ondaemo i Ue, Ue Ala, ka nahina anu susua. 61Onaemo pu'uno, kai buke petenununo aroamiu ndi Ondae i Ue, Ue Alato, ka mentuwu montonda luwuno pompakosi-Do ka mekariao luwuno parenta-Do kana a oleo andio.”

Pesomba poronsoa ka pogawea

8:62-66

(2Taw. 7:4-10)

62Ka do'amba mokole saru luwudo to Isaraeli mpopesombaako pesomba sinumbele i aro-Do i Ue. 63Gagi pesomba tekaduduia ndi Ondae i Ue, i Salomo mompesombaako rua pulu ka orua nsowu sapi ka asa etu ka rua pulu nsowu bembe bimba. Kanandiomo i mokole saru luwudo to Isaraeli meronsoo raha-Do i Ue atuu.

64A oleo anu mengkena, i tongano kintala anu i arono raha-Do i Ue. Hangano i tu'aimo ipompesombaako pesomba tinunu, pesomba kaanga ka luwuno taba pesomba tekaduduia, hangano meda pontunua pesomba mala anu i aro-Do i Ue atuu, kodei lahi pumpuano pesomba tinunu, pesomba kaanga ka luwuno taba pesomba tekaduduia atuu.

65A tempo mbo'u atuu, i Salomo moweweu pogawea i aro-Do i Ue, Ue Alato, saru luwuno to Isaraeli, asa bawaa anu langkai, mompu'u inso a nsala mewinso lumako i Hamati hawe a ngkoro Masiri, opitu oleo tehineno, ka i'amba opitu oleo mbo'u, luwuno hopulu ka opaa oleo. 66A ngko'oalu oleono, itena ira tongku atuu melako. Mpo'ema ira ronso tiado mokole, ka do'amba mpekule a ngkemado saru mpo'unde ka mawongko aroado, hangano luwuno moikoa anu Doweweuomo i Ue ndi Daudi, tetenaa-Do ka a nto Isaraeli, bawaa-Do

Currently Selected:

1 Mokole 8: XMZ

Highlight

Copy

Compare