1 Mokole 10
10
Pesinggerahano mokole beine wita Seba
10:1-13
(2Taw. 9:1-12)
1 #
Mat. 12:42; Luk. 11:31 Mansano rumongeo mokole beine i wita Seba teleleno i Salomo, hangano nee-Do i Ue, onae aiwa ta umarahakono ka moweeakono pesikeno anu motungko luwu. 2Onae aiwa i Yerusale saru sorodadu hadio ntu'u anu mpetonda dumagaio, saru hadio unta anu mpowawa rampa-rampa, wulaa anu hadio ntu'u ka watu paramata anu motungko olino. Mansano hawe ndi Salomo, ipauakono luwu anu kongko i laro aroano. 3I Salomo sumangkio luwuno pesikenono. Nahina maupo hapamokoa anu tewuni ndi ondae mokole anu nahi dopokosangkio. 4Mansano kumitao mokole beine inso i Seba luwuno pandeno i Salomo ka raha anu iwanguomo, 5kaanga a medano, po'atorado pentoroa luwuno pegawaino, pompekaakodo luwuno atano ka sangkado, luwuno puu mpo'atorano inua ka pesomba tinunu anu wela pinesombaakono i raha-Do i Ue, kohali-haliomo. 6Ipotae ndi ondae mokole, ”Menteeomo lele anu rinongeku i witaku mongkona omiu ka pandemiu, 7sine nahi kupe'ala-alao luwuno pinau atuu, ranta ka ku'aiwa ka kumitaakono mataku ongkueku. Menteeano, maupo entongano, napi kupinauako, pandemiu ka manangaimiu, olaiopo sekono anu rinongeku. 8Meme'ura iramo kombiamiu! Meme'ura iramo pegawaimiu anu wela mekakaakomiu ka sumakosiio pandemiu! 9Unde-unde Iramo i Ue, Ue Alamiu anu biniki komiu ka motoro komiu a ngkadera poparentaa i Isaraeli! Hangano Dopehohawao i Ue Isaraeli ranta nahina tampulaano, Dopotorokomiu gagi mokole kai weweuo moleoa ka menteea.” 10Umarino atuu iweeakono mokole Salomo asa etu ka rua pulu talenta wulaa, rampa-rampa anu hadio ntu'u ka watu paramata anu motungko olino. Nami hori mbo'u hawe rampa-rampa kanatuu hadiono kana anu iweeakono mokole beine inso i Seba ndi mokole Salomo.
11Luwuno mbo'u kapalano i Hirami anu mowawa wulaa inso i Opiri, mowawa keu cendana anu hadio ntu'u ka watu paramata anu motungko olino. 12Inso a ngkeu cendana atuu ondae mokole weweuo taralino raha-Do i Ue ka langkanaeno mokole, ka iweweuo mbo'u katapi ka gambusu tiado luwuno puu mpenani. Keu cendana kanatuu nami hawe ka tengkita mbo'u hawe oleo andio.
13I mokole Salomo moweeakono mokole beine luwuno anu ineheno ka inemano, sangkadio anu iweeakonomo kana po'eheno mokole Salomo. Ka i'amba melungka mekule i witano saru luwuno pegawaino.
Pompolino i Salomo anu hadio ntu'u
10:14-29
(2Taw. 9:13-28)
14Mobeano wulaa anu mewinawa ndi Salomo i larono asa nta'u, onaemo nomo etu nomo pulu ka onoo talenta, 15napi tedoa saru anu hinawe inso a mia mpebalu-balu ka mia mpo'asa-asa saru inso a luwuno mokoledo to Ara ka anu mempabawa i wita atuu.
16I mokole Salomo moweweu rua etu kanta langkai inso a wulaa pinalu. Nomo etu sikala wulaa ipakeo tiano sompo kanta langkai atuu. 17Iweweuo mbo'u tolu etu kanta kodei inso a wulaa pinalu; otolu mina wulaa pinakeno tiano sompo kanta kodei. Ka do'amba mokole numaao luwuno atuu i larono raha langkai ”Tobu Libano.”
18I mokole moweweu kadera poparentaa anu langkai inso a ntindu ka i'apiiakono wulaa motu'a. 19Kadera poparentaa atuu hinao onoo ana ensano, anu i wawono ntu'u i bungkuno kadera poparentaa atuu bonggoli tadeno. A orua horino pentoroa hinao pontambea kae ka orua singa mentade i horino pontambea kae atuu. 20Hopulu ka orua singa mentade i wawono onoo ana ensa atuu, mompombali. Napi hori wineweu anu kanatuu maupo a poparentaa isua.
21Luwuno parewa po'inuado mokole Salomo wineweu inso a wulaa ka luwuno sangka a raha langkai ”Tobu Libano” atuu inso a wulaa mpena; nahina anu inso a nsalaka, hangano salaka rineke nahina olino i tempono poparentaano i Salomo. 22Hangano, a ntahi ondae mokole hadio kapalado, kapala Tarasisi anu mpebawaa saru luwuno kapalano i Hirami. Pohona i larono otolu nta'u, mehawe ira kapala Tarisisi mpowawa wulaa, salaka ka tindu, saru bange ka manu-manu mera. 23I mokole Salomo lumaloio pompoli ka pandedo luwuno mokole i tolino. 24Asa wawontolino mposongka ira ntepohaweakono i Salomo, ira merongeo ondaedo pande anu Doweeakonomo Ue Ala i laro aroano. 25Singge mia aiwa mowawa pesombano, luwuno parewa salaka ka wulaa, sangka, parewa mpetea, rampa-rampa, ngara ka bagali. Kanandiomo sompo-sompo ta'u.
26 #
1Mok. 4:26
I Salomo mopumpu mbo'u kareta ka sorodadu mpengara, ranta kai hina asa nsowu pato etu kareta ka hopulu ka orua nsowu sorodadu mpengara. Luwuno meninaa a luwuno kota ponaapa kareta ka umpeda mokole i Yerusale.
27 #
Win. 17:17
I Yerusale ondae mokole kumitao salaka kana koa watu tuduno ka keu arasi kana hadiono keu ara anu tuwu i Sepela.
28 #
Win. 17:16
Ngara tiano i Salomo winawa inso i Misiraimi ka Kewe. Puu mpebalu-baludo mokole me'olio inso i Kewe montonda pe'olia tempo atuu. 29Asa kareta anu winawa inso i Misiraimi, olino nomo etu sikala salaka ka asa ngara, asa etu lima pulu sikala. Kanatuu koa mbo'u molalo puu mpebalu-baludo mokole, luwuno atuu inasa a luwuno mokoledo to Heti ka luwuno mokoledo to Arami.
Currently Selected:
1 Mokole 10: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
