1 Mokole 7

Langkanaeno i Salomo

7:1-12

1I Salomo mowangu langkanaeno hopulu ka otolu nta'u tehineno, ranta luwuno langkanae atuu umari iwanguo. 2Onae mowangu raha langkai ”Wana Libano,” asa etu hiku ondauno, lima pulu hiku maluano ka tolu pulu hiku mantandeno, saru opaa dede karuno inso a ngkeu arasi ka luwuno sobo keu arasi i wawono karuno atuu. 3Raha langkai atuu inso i wawono tinutuwiako keu arasi, i wawono luwuno sobo anu tinumbono pato pulu ka olima karuno, sompo dede hopulu ka olima karuno. 4Hinao mbo'u otulu dede simpino pentangoa; otolu dede pentangoa tepo'aro saru pentangoa i larono. 5Luwuno pewowa ka pentangoano tadeno mensiu opaa; otolu dede pentangoa pada tepo'aro. 6Iweweuo mbo'u tambi mekaru, lima pulu hiku ondauno, ka tolu pulu hiku maluano. I arono hinao mbo'u tambi mekaru ka me'ensa i arono. 7Iweweuo mbo'u Bansala Pentoroano mobitara. Bansala Pobitaraa atuu inapiiako keu arasi inso a horono hawe a dunsi. 8#1Mok. 3:1Raha po'iangano onaeno, a kintala susua i bungkuno bansala atuu, mengkena mbo'u weweuno. I Salomo moweweu mbo'u asa raha, kana bansala atuu, tiano anano i Pirao, anu inalano gagi kombiano.

9Luwuno atuu wineweu inso a watu biniki anu pinole montonda songkano ka pinokomereako parewa pompole i larono ka i bungkuno, inso i totono hawe i wawono, ka inso a rere i bungkuno hawe a rereno a kintala langkai. 10Maupo pondasino inso mbo'u a watu bininiki, watu melolangkai, watu anu songkano hopulu hiku ka oalu hiku. 11I wawono hinao watu bininiki, anu pinole menunu songkano ka keu arasi mbo'u. 12Hinao otolu dede watu pina'o ka asa dede sobo keu arasi lumimbuo kintala langkai, mengkena kana kintala i larono a raha-Do i Ue ka bolongkono.

Luwuno parewa labu a Raha Mempori

7:13-51

(2Taw. 2:13-14; 3:15–5:1)

13Ka i'amba i mokole Salomo montena mia lumako umalao i Hirami inso i Tirusi. 14Onae anano asa tuwu beine inso a nsuku Napatali, sekono amano to Tirusi, puu moweweu parewa inaso a mala. Onae bukeako pande ka ponto'ori ka magasi a mpoweweua luwuno anggaano mala. Onae aiwa ndi ondae mokole Salomo, ka i'amba weweuako ira mokole luwuno anggaa atuu.

15 # Yer. 52:21 Iweweuo orua karu raha mala, karu raha anu asa hopulu ka oalu hiku mantandeno ka pinokowewesiako ula hopulu ka orua hiku ondauno. Kanatuu koa mbo'u karu raha anu susua. 16Iweweuo mbo'u orua uluno karu raha inso a mala tinawa ta ninaa i untuno orua karu raha atuu. Uluno karu raha anu asa, olima hiku mantandeno, ka anu susua mbo'u olima hiku. 17Iweweuo mbo'u orua ramba-ramba kana buani tiano uluno karu raha anu i untuno karu raha atuu, kana enano rante; opitu ena tiano asa karuno raha ka opitu mbo'u tiano karu raha anu susua. 18Ka i'amba moweweu orua dede wua delima lumimbuo ramba-ramba buani anu asa, kai tumutuwio uluno karuno i untuno karuno atuu; kanatuu mbo'u iweweou a uluno karuno anu susua. 19Luwuno uluno karuno i untuno karuno anu umpeda a bolongko i arono atuu kana tadeno sisi bonse, mantandeno opaa hiku. 20A luwuno uluno karuno i wawono orua karuno atuu, i wawono te'alaako i tongano umpeda ramba-ramba buani atuu, hinao rua etu wua delima mpedede lumimbuo uluno karuno anu asa ka anu susua mbo'u. 21Ka i'amba luwuno karuno atuu ipontadeo umpeda tambino bolongko langkai. Ipontadeo karuno i koana, ka ineeakono Yakini. Ka i'amba montadeo karuno i manggali, ka ineeakono Boasi. 22I untuno luwuno karuno atuu inaao ramba-ramba sisi bonse. Ka umariomo anggaano orua karuno atuu.

23Ka i'amba moweweu bolusa langkai anu nineeako ”tahi” tinawa, tadeno bonggoli, inso i wiwino hawe i wiwino hopulu hiku, mantandeno olima hiku ka pinoko wewesiako ula tolu pulu hiku ondauno. 24I totono wiwi ”tahi” atuu, hinao gambara wua sumpere lumimbuo, hopulu gambara i larono asa hiku. Gambara wua sumpere anu lumimbuo ”tahi” atuu hinao orua dede ka pinotako tinawa meronga saru onae. 25”Tahi” atuu mentade i wawono hopulu ka orua sapi, otolu me'aro i utara, otolu me'aro i sumooano oleo, otolu me'aro i selata ka otolu me'aro i sabaano oleo. ”Tahi” atuu mo'ia i wawono, sekono luwuno ikino sapi atuu me'aro i larono. 26Mokapano ”tahi” atuu asa pele ngkae ka wiwino kana wiwino tonde mekaru kana sisi bonse anu tewile. ”Tahi” atuu mompoko'ula rua nsowu bati uwoi.

27Iweweuo mbo'u hopulu kareta pontumbo inso a mala, asa kareta opaa hiku ondauno, opaa hiku maluano ka otolu hiku mantandeno. 28Kanandio tadeno kareta pontumbo atuu: hinao dopi tutuwino ka dopi atuu i'asio simpi. 29A dopi pontutuwi anu inasino simpi atuu hinao singa, sapi, ka kerubi; kanatuu mbo'u a simpino atuu. I wawono ka i totono singa ka sapi atuu hinao bunga tinangkei anu pinalu. 30Sompo kareta pontumbo hinao opaa bolano inso a mala saru tambeno mala koa mbo'u. Opaa karuno kareta hinao pontumbo bolusa pewo'ohia. Luwuno pontumbo atuu wineweu inso a mala, ka i bungkuno sompo pontumbo hinao gambara bunga tinangkei. 31Ngangano kareta pontumbo atuu kongko i larono luwuno pontumbo atuu, telanso asa hiku i wawono. Ngangano atuu bonggoli, wineweu gagi pentorono, ka ondalono asa ka entonga hiku. A ngangano mbo'u atuu hinao nggori-nggorino. Sine luwuno dopi tutuwino mensiu opaa, nahi bonggoli. 32Opaa bolano atuu mo'ia i totono dopi pontutuwi, ka luwuno taralino bola atuu menggoe saru kareta pontumbo. Mantandeno sompo bolano asa ka entonga hiku. 33Luwuno bolano atuu wineweu kana bolano kareta mpe'iwali. Luwuno petakoano taralino, bolilino, taralino ka petakoano tarali i tongano, luwuno hasilino tinawa. 34Opaa pontumbo a opaa siuno sompo kareta pontumbo menggoe saru kareta atuu. 35I wawono kareta pontumbo atuu, hinao we'u bonggoli mantandeno entonga hiku. I wawono kareta pontumbo atuu hinao mbo'u tarali pontumbo ka dopi pontutuwi anu menggoe saru kareta atuu. 36A wawono luwuno tarali pontumbo atuu ka a luwuno dopi tutuwino, inggorio kerubi, singa, ka keu kuruma, sompo gambara montonda po'iangano, saru bunga tinangkei lumimbuo. 37Kanatuumo hopulu kareta pontumbo atuu iweweuo: tawaano, songkano, ka tadeno mengkena luwu.

38 # Pel. 30:17-21 Iweweuo mbo'u hopulu bolusa pewo'ohia inso a mala. Sompo bolusa me'ihi pato pulu bati uwoi. Sompo bolusa songkano opaa hiku ka hinao asa bolusa i wawono sompo kareta inso a hopulu kareta pontumbo atuu. 39Olima kareta pontumbo inaao i koanano raha atuu, ka olima i manggalino. Sine ”Tahi” atuu inaao i koanano raha atuu, te'aro i tenggara. 40I Hirami weweu ira mbo'u kusi, sikopa, ka loea kodei ponsiwui.

Kanandiomo ipoko'umario i Hirami luwuno anggaa anu asalakono iweweuakono mokole Salomo a raha-Do i Ue: 41orua karuno saru orua bonggolino uluno karuno i untuno karuno atuu, ka orua ramba-ramba kana buani anu tumutuwio orua bonggolino uluno karuno atuu; 42Wua delima anu pato etu tiano orua ramba-ramba buani atuu, orua dede wua delima tiano asa ramba-ramba buani kai tutuwio orua bonggoli uluno karuno i wawono karuno atuu; 43Hopulu kareta pontumbo ka hopulu bolusa pewo'ohia i wawono kareta atuu; 44”Tahi” anu asa atuu ka hopulu ka orua sapi i totono ”Tahi” atuu; 45luwuno kawali, sikopa ka loea kodei ponsiwui. Luwuno parewa anu wineweuno i Hirami tiado mokole Salomo a raha-Do i Ue atuu wineweu inso a mala anu tinawa ka imangkilo. 46Luwuno atuu doweweuo mokole, tinawa a wita pulu i Lembono Yarade, olono Sukuti ka Saritani. 47I Salomo nahi petena kai tinimba luwuno parewa atuu, hangano hadio ntu'u; mala atuu nahi pinokodoa mobeano. 48#Pel. 25:23-40; 30:1-3I Salomo weweuo luwuno parewa anu kongko a laro raha-Do i Ue, onaemo meda pontunua pesomba wulaa, meda wulaa po'iangano roti pesomba; 49luwuno hulu mekaru inso a wulaa mpena i arono bolongko i larono ntu'u, olima i koana ka olima i manggali; bungano, hulu, ka sipino, luwuno inso a wulaa; 50bolusano, piso, luwuno loea kodei ponsiwui, sangkiri ka polu pontunua, luwuno inso a wulaa moiko. Henseno tondo anu i bolongko i larono ntu'u, onaemo po'ianga tedoa mempori, ka henseno tondo bolongko langkai Raha Mempori, luwuno inso a wulaa.

51 # 2Sam. 8:11; 1Taw. 18:11 Ka umariomo luwuno anggaa anu wineweudo mokole Salomo a raha-Do i Ue atuu. Ka i'amba i Salomo winso ira sangka memporino i Daudi, amano, ka inaao salaka, wulaa, ka luwuno sangka atuu a laro bolongko ponaapa arataano raha-Do i Ue.

Currently Selected:

1 Mokole 7: XMZ

Highlight

Copy

Compare