1 Mokole 6

I Salomo mowangu Raha Mempori

6:1-38

(2Taw. 3:1-14)

1A nta'u kopato etu ka halo pulu umarido mpeluarako to Isaraeli inso i wita Masiri, a nta'u ko'opaa umarino i Salomo gagi mokole i Isaraeli, ilarono wula Siwa, wula ko'orua, i Salomo mompu'u mowangu raha tia-Do i Ue. 2Raha anu winangudo mokole Salomo tia-Do i Ue atuu, nomo pulu hiku ondauno, rua pulu hiku maluano ka tolu pulu hiku mantandeno. 3Maluaano i arono bolongko langkai, ondauno rua pulu hiku, menunu saru maluano raha atuu, ka maluano hopulu hiku te'alaako i arono raha atuu. 4A raha atuu iweweu ira pentangoa anu pore taralino. 5Iweweuo bolongko tiangino a rere lumimbuo raha atuu, moiko lumimbuo bolongko langkai maupo bolongko i larono ntu'u. Luwuno iweweuo metuda. 6Tudano i totono maluano olima hiku, tudano i tongano, onoo hiku ka tudano ko'otolu, opitu hiku. Hangano iweweuomo bolo-bolono a rereno i bungkuno lumimbuo raha atuu, onae kanami ta biniloi mbo'u rereno raha atuu. 7Tempono iwinangu, raha atuu wineweu inso a mpole-poleno watu anu pinatindaomo, ranta nahi teronge unino palu ke uase ke parewa labu hapamo koa i larono mpowangu raha atuu. 8Pewowano tudano i totono, po'iangano i apa ngkoanano raha atuu ka mia mpewuatako telalo a ensa metanggolili lumako a ntudano i tongano ka inso a ntudano i tongano lumako a ntudano ko'otolu. 9Mansano umari wanguo raha atuu, iweweuo dunsino raha atuu inso a nsobo ka dopi keu arasi. 10Bolongko tiangino iwanguo lumimbuo raha atuu, sompo bolongko olima hiku mantandeno, ka i'amba pinosombu a raha atuu saru keu arasi.

11Haweomo pau-Do i Ue ndi Salomo, kanandio, 12”Mongkona raha anu kontongaamu wanguo andio, tewala tuwuko menunu saru luwuno pompakosi-Ku ka metenunu weweuo luwuno atora-Ku saru mekariao luwuno parenta-Ku saru molempao, Aku umihiio dandi-Ku ndi omue anu Kupauomo ndi Daudi, amamu, 13nine Aku mo'ia i olodo to Isaraeli ka nahi Aku binta ira bawaa-Ku Isaraeli.”

14Kanatuumo iwanguo i Salomo raha atuu ka ipoko'umario. 15Larono raha atuu i apiiakono dopi keu arasi, mompu'u inso a horono raha hawe a nsobono dunsi, i apiiakono dopi keu arasi, sekono horono raha atuu i apiiakono dopi keu sanobari. 16#Pel. 26:33-34I bungkuno raha atuu, anu ondauno rua pulu hiku, i olotiakono rere dopi keu arasi, mompu'u inso a horono hawe luwuno sobono. Po'ianga atuu iweweuo gagi bolongko i larono ntu'u, po'ianga tedoa mempori. 17I arono bolongko i larono ntu'u, po'iangano bolongko langkai, pato pulu hiku ondauno. 18Keu arasi anu i larono raha atuu menggoriako gambarano sumpere ka bunga tewile; luwuno inso a ngkeu arasi, nahina watu anu tengkita. 19Kanatuumo ipatindao bolongko i larono ntu'u a raha atuu, i bungkuno ntu'u, kai ninaa i ra'ai burua pedandia-Do i Ue.

20Bolongko i larono ntu'u atuu, rua pulu hiku ondauno, rua pulu hiku maluano, ka rua pulu hiku mantandeno. I'apiiakono wulaa mpena. Ka i'amba meda pontunua pesomba i'apiiakono mbo'u keu arasi. 21I Salomo umapiiakono wulaa mpena apano i larono raha atuu, ka i'amba padindiakono rante wulaa i arono bolongko i larono ntu'u, anu i'apiiakono wulaa. 22#Pel. 30:1-3Luwuno laro raha atuu i'apiiako wulaa, ranta luwuno laro raha atuu te'apii luwu. Meda pontunua pesomba i arono bolongko i larono ntu'u atuu, luwuno i'apiiakono mbo'u wulaa.

23 # Pel. 25:18-20 A bolongko i larono ntu'u atuu, iweweuo orua kerubi inso a ngkeu lana, sompo kerubi hopulu hiku mantandeno. 24Panino kerubi anu asa kerubi atuu olima hiku ondauno, ka panino kerubi anu susua olima hiku mbo'u, ranta inso i tapuno panino anu asa hawe i tapuno panino i susua, hopulu hiku ondauno. 25Kerubi anu ko'orua hopulu hiku mbo'u ondauno. Orua kerubi atuu mengkena songkano ka mengkena tadeno. 26Mantandeno kerubi anu asa hopulu hiku, kanatuu koa mbo'u kerubi anu susua. 27Inaa ira kerubi atuu i tonga-tongano bolongko i larono ntu'u. Panido kerubi atuudo tewile, ranta panino kerubi anu asa dumalio rere ka panino kerubi anu susua dumalio rere anu susua. Luwuno panido anu me'aro a ntongano raha atuu pada tepodali. 28Luwuno kerubi atuu i'apiiakono wulaa.

29A luwuno rere lumimbuo raha atuu inggorio gambarano kerubi, keu kuruma ka bunga tewile, moiko i larono maupo i bungkuno. 30Horono mbo'u raha atuu i'apiiakono wulaa, moiko anu i larono maupo anu i bungkuno. 31Gagi pewowa pewinsoa lumako a bolongko i larono ntu'u, iweweu ira pewowa inso a ngkeu lana, montoweano i wawono ka karuno mensiu olima. 32A orua pewowa inso a ngkeu lana atuu, inggorio gambara kerubi, keu kuruma, ka bunga tewile, ka i'amba umapiiakono wulaa. Ihahiakono mbo'u wulaa a ngkerubi ka keu kuruma atuu. 33Kanatuu koa mbo'u tiano pewowa mewinso lumako a bolongko langkai, iweweu ira karuno inso a ngkeu lana mensiu opaa, 34ka orua pewowano inso a ngkeu sinobari. Orua lewe tondo inso a mpewowa anu asa moiko ilinupi, kanatuu koa mbo'u orua lewe tondo anu susua. 35A leweno pewowa atuu, inggorio kerubi, keu kuruma ka bunga tewile, ka i'amba ngginori atuu i'apiiakono wulaa anu hinahi merete.

36Iweweuo kintala i larono saru otolu dede watu pina'o ka asa dede sobo keu arasi. 37A nta'u anu ko'opaa, i larono wula Siwa, pondasino raha-Do i Ue pinu'u, 38ka a nta'u anu kohopulu ka asa, i larono wula Buli, wula ko'oalu, umariomo raha atuu saru luwuno bolongkono ka menunu saru luwuno anu sinongkano. Iwanguo raha atuu opitu nta'u tehineno.

Currently Selected:

1 Mokole 6: XMZ

Highlight

Copy

Compare