1 Mokole 16

1Ka i'amba, haweomo pau-Do i Ue ndi Yehu, anano i Hanani umewaio i Baesa, unino, 2”Omue Kutandekomo inso a pampawu ka Kupotoroko gagi mokoledo bawaa-Ku to Isaraeli, sine omue tuwu kana i Yerobea, ka gagi pu'uno bawaa-Ku Isaraeli mpoweweu ira hala. Ranta ka dompokotesingkao tekuda-Ku hangano halado. 3Hangano atuu, menteeano Aku rumoahio morina i Baesa ka somborino. Aku weweuo somborimu kana somborino i Yerobea anano i Nebati. 4Isema inso a nsomborino i Baesa anu mate i kota, ta kumaano dahu ka anu mate i tonga mpada ta kumaano manu-manu i laro meene.”

5Anu susuaano teweweuno i Baesa ka anu wineweuno ka mosiano, kombake luwuno atuu teburi a wunta tutuludo luwuno mokole i Isaraeli? 6I Baesa mate ka kinaburu i Tiresa. Ka i'amba i Ela, anano gagi mokole umeuo. 7Kanandiomo molalo i nabi Yehu anano i Hanani, haweomo pau-Do i Ue mongkona i Baesa ka somborino hangano luwuno wineweuno anu mosa'o a pongkita-Do i Ue ka hangano ipepateomo i Yerobea. Onae mokotesingkao tekuda-Do i Ue hangano wineweuno kaeno, ranta kai gagi mengkena kana somborino i Yerobea.

I Ela, mokole i Isaraeli

16:8-14

8A nta'u korua pulu ka onoo poparentaano i Asa, mokole i Yehuda, i Ela anano i Baesa gagi mokoledo to Isaraeli i Tiresa. Onae moparenta orua nta'u tehineno. 9I Simiri, pegawaino anu gagi tadulako sorodadu a entongano sorodadu mpekareta, memoroko ira umewaio. Tempono i Ela mo'inu ranta kai molangu i Tiresa, i rahano i Arisa anu gagi petewawa langkanae i Tiresa, 10haweomo i Simiri sumapoio ka ipepateo a nta'u korua pulu ka opitu poparentaano i Asa, mokole i Yehuda. Ka i'amba onae gagi mokole umeuo i Ela. 11Mansano gagi mokole, ka ipentoro a ngkadera poparentaa, ipepateo luwuno somborino i Baesa. Nahina maupo te'asa tama anu ipo'ineeo tuwu, tewinso pe'etuno ka wali-walino. 12Kanandiomo i pingko ira i Simiri luwuno somborino i Baesa, menunu saru pau-Do i Ue anu pinohawe-Do ndi Baesa molalo i nabi Yehu, 13hangano luwuno hala anu wineweuno i Baesa ka i Ela, anano, anu gagi pu'uno to Isaraeli mpoweweu mbo'u hala. Dompokotesingkao tekuda-Do i Ue, Ue Alado to Isaraeli, hangano ue alado anu nahina pengkonaano.

14Anu susuaano inso a nteweweuno i Ela ka luwuno anu wineweuno, kombake luwuno atuu teburi a wunta tululudo luwuno mokole i Isaraeli?

I Simiri, mokole i Isaraeli

16:15-20

15A nta'u korua pulu ka opitu poparentaano i Asa, mokole i Yehuda, i Simiri gagi mokole. Onae moparenta opitu oleo tehinano i Tiresa. Tempo atuu palili mpekema mengkaduo Gibetoni, witado to Pelisiti. 16Palili anu kontongaado mpekema merongeo mia mpotae, ”I Simiri memoroko iramo ka ta mepate ira mbo'u mokole.” Ka i'amba luwudo to Isaraeli mpotoroo i Omiri, tadulako sorodadu, gagi mokoledo to Isaraeli a oleo koa mbo'u atuu, a mpekemaa. 17Ka i'amba i Omiri saru luwudo to Isaraeli melako inso i Gibetoni ka domengkaduo Tiresa. 18Kumitao kota atuu ipongko'alaomo, mewinsoomo i Simiri i larono bolongko kodei a langkanaedo mokole. Isongkoo langkanaedo mokole ka onaeno mate mo'ai, 19hangano luwuno hala anu wineweuno ka moweweu anu mosa'o a pongkita-Do i Ue. Itondao sala ntumuwu ka halano i Yerobea anu gagi pu'uno to Isaraeli mpoweweu mbo'u hala.

20Anu susuaano inso a nteweweuno i Simiri ka tepo'asa umewa anu wineweuno, kombake luwuno atuu teburi a wunta tutuludo luwuno mokole i Isaraeli.

I Omiri, mokole i Isaraeli

16:21-28

21I tempo atuu to Isaraeli tetia orua. Asa ntia inso a tongku atuu tumondao i Tibani, anano i Gina, ka dompotoroo gagi mokole, ka anu asa ntia mbo'u tumondao i Omiri. 22Sine palili anu tumondao i Omiri, moroso irapo sekono anu tumondao i Tibani, anano i Gina. Umarino mate i Tibani, i Omiri gagiomo mokole.

23A nta'u kotolu pulu ka asa poparentaano i Asa, mokole i Yehuda, i Omiri gagi mokoledo to Isaraeli ka moparenta hopulu ka orua nta'u. I Tiresa onae moparenta onoo nta'u tehineno. 24Ka i'amba umolio torukuno Samaria inso ndi Semeri orua talenta salaka. Iwanguo kota i torukuno atuu ka ineeakono Samaria, montonda neeno i Semeri, ueno torukuno atuu. 25I Omiri moweweu anu mosa'o a pongkita-Do i Ue, ka mosa'oopo sekonopo luwuno anu mese'elungio. 26Itondao luwu sala ntumuwu ka halano i Yerobea anano i Nebati anu poko'ariano to Isaraeli mpoweweu mbo'u hala, ranta mokotesingkao tekuda-Do i Ue, Ue Alado to Isaraeli, hangano luwuno pinesombaido anu nahina tuduno.

27Anu susuaano inso a nteweweuno i Omiri, anu wineweuno ka mosiano, kombake luwuno teburi a wunta tutuludo luwuno mokole i Isaraeli? 28I Omiri mate ka kinaburu i Samaria. Ka i'amba i Ahabi, anano gagi mokole umeuo.

I Ahabi mesomba a Baala

16:29-34

29I Ahabi, anano i Omiri gagi mokole i Isaraeli a nta'u kotolu pulu ka oalu poparentaano i Asa, mokole i Yehuda. I Ahabi anano i Omiri moparenta a nto Isaraeli i Samaria rua pulu ka orua nta'u tehineno. 30I Ahabi, anano i Omiri moweweu anu mosa'o a pongkita-Do i Ue, ilaloio luwuno anu mese'elungio. 31Napi pesompoo tuwu a laro luwuno halano i Yerobea anano i Nebati, i'alao mbo'u i Isebeli, anano i Etiba'ali, mokoledo to Sidoni, gagi kombiano, ranta kai lako mesomba a Baala ka ipenggolontu melangkaio. 32Onae mowanguakono i Baala atuu meda pontunua pesomba a raha mpelahumoa Baala anu winanguno i Samaria. 33Umarino atuu i Ahabi moweweu tinaha Asera ka moweweu laluaopo sekono atuu, ranta mokotesingkao tekuda-Do i Ue, Ue Alado to Isaraeli, laluaopo inso a luwuno mokoledo to Isaraeli anu mese'elungio.

34 # Yos. 6:26 I tempo poparentaano atuu i Hieli to Beteli wali wanguo Yeriko. Ipu'uo wanguano kota atuu saru iporumpiakono penaano i Abirami, anano anu aka, ka ipasao pewowa langkaino saru iporumpiakono penaano i Segubi, anano anu tompasusu, menunu saru pau-Do i Ue anu pinau-Do molalo i Yosua anano i Nuni.

Currently Selected:

1 Mokole 16: XMZ

Highlight

Copy

Compare