1 Mokole 17

I Elia i wiwi ngkorono mo'are Keriti

17:1-6

1 # Yak. 5:17 I Elia, to Tisibe inso i Tisibe-Gilea, motaeakono i Ahabi, ”A nee-Do i Ue anu tuwu, Ue Alado to Isaraeli anu pinekakaakoku, nahi ta hina tontoru ke usa a luwuno ta'u andio, sangkadio ongkue anu pauo.” 2Ka i'amba haweomo pau-Do i Ue ndi onae, 3”Lakomo inso i ndi'ai, pelempamo te'aro i sabaano oleo ka pewunimo i wiwi ngkorono mo'are Keriti i sabaano oleo koro Yarade. 4Komo'inu uwoi inso a ngkorono wela mo'are atuu ka manu-manu paa-paa Kuparenta iramo ka dompowawaakomu kaanga i ra'ai.” 5Ka i'amba lumako weweuo menunu saru pau-Do i Ue. Onae lumako ka ipo'ia i wiwi ngkorono mo'are Keriti i sabaano oleo koro Yarade. 6I tempono mo'oru ka ngkiniwia manu-manu paa-paa mpowawa roti ka bau ndi onae ka ipo'inu uwoi inso a ngkorono wela mo'are atuu.

I Elia ka tuwu beine i Sarapati

17:7-24

7Sine umarino ba'opia tempo, korono atuu mo'are, hangano nahi petii usa i wita atuu. 8Ka i'amba haweomo pau-Do i Ue ndi Elia, 9#Luk. 4:25-26”Kanandio-andio lakomo i Sarapati i wita Sidoni ka po'iamo i ra'ai. Kau to'oriomo Kuparentaomo asa mia tuwu beine i ra'ai anu ta moweeakomu kaanga.” 10Onaemo kai pelungka lumako i Sarepati. Sahaweno a mpewowa langkai i kota atuu, ikitaomo i ra'ai asa mia tuwu beine kontongaano mopumpu keu ponahu. Ipebooliakono beine atuu, ipotae, ”Po'alaakunemo tedei uwoi a laro takea kaku po'inu.” 11Mansano lumako beine atuu umalao, onae mebooli mbo'u, ”Po'alaakunemo mbo'u te'asa mpudu roti.” 12Sumangki beine atuu, ipotae, ”A nee-Do i Ue, Ue Alamiu anu tuwu, menteeano nahina roti maupo tedei ndi ongkue, sangkadio tarigu asa raku a ngkusi ka lana tedei a mpido. Kanandio-andio kontongaaku mopumpu orua otolu mpole keu ponahu, ka ku'amba mekule weweuakono anaku. Kami kumaano; pingko atuu, kami mate.” 13Sine ipotae i Elia ndi onae, ”Si doito, pekule weweuomo kana nineemu. Sine, poweweuakune se'elu te'asa bunggoli kodei roti inso a ntarigu atuu ka wawaomo ndi ongkue. Umarino atuu ka u'amba moweweu tiamu saru tiano anamu. 14Hangano kanandiomo pau-Do i Ue, Ue Alado to Isaraeli: Tarigu a ngkusi atuu nahi ta pingko ka maupo lana a mpido atuu nahi ta makura ranta ka Dopompotii usa i Ue i wawontolino.” 15Lumakoomo beine atuu ka iweweuo kana anu pinauno i Elia. Beine atuu ka pe'asa rahano saru i Elia, mpongkaa ira mpiha sompo oleo. 16Tarigu a ngkusi atuu nahi pingko ka lana a mpido nahi makura, kana pau-Do i Ue anu pinohawe-Do molalo i Elia.

17Ba opia tempo lembuino, ana beineno ue raha atuu mahaki. Hakino tedoa mobea ranta tampula mpenaa. 18Ipotae beine atuu ndi Elia, ”Hapake tinoomu ndi ongkue, oo tetenaa-Do Ue Ala? Hapake aiwamu ndi ongkue hawe mopoto'oriakune salaku ka onae pu'uno anaku ka imate?” 19Ipotae i Elia ndi onae, ”Peweengakonomo anamu atuu ndi ongkue.” I Elia umalao nana'ote atuu inso a mpekopuino beine atuu ka iwawao a bolongko i wawono peratoano, ka i'amba momboleo nana'ote atuu a mpoturiano. 20Ka i'amba mebooli ndi Ondae i Ue, ipotae, ”Oo Ue, Ue Alaku! Nde Omiuke Ue anu mompotiiakono masusaa a ntuwu beine andio anu mowee aku peratoa saru mepateo nana'ote andio?” 21Umarino atuu ipe'opoio nana'ote atuu pentolu ka ipebooli ndi Ondae i Ue, ipotae, ”Oo Ue, Ue Alaku! Tewala Ipemoikoo, Ipokuleakonomo penaano nana'ote andio a ngkoroino ka iwali tuwu.” 22Dorongeo i Ue po'emano i Elia atuu, ka penaano nana'ote atuu mekule a ngkoroino ranta ka iwali tuwu. 23I'alao i Elia nana'ote atuu ka ipotiio inso a bolongko i wawono kai wawao a laro raha. Ka i'amba i Elia meweengakono ndi ineno, ipotae, ”Ndio anamu, tuwuomo!” 24Ipotae beine atuu ndi Elia, ”Kanandio-andio kuto'oriomo nine omiu tetenaa-Do Ue Ala ka pau-Do i Ue anu pinaumiu atuu mentee.”

Currently Selected:

1 Mokole 17: XMZ

Highlight

Copy

Compare