1 Mokole 15

I Abiama, mokole i Yehuda

15:1-8

(2Taw. 13:1–14:1)

1A nta'u kohopulu ka oalu poparentano i mokole Yerobea, anano i Nebati, i Abiama gagi mokoledo to Yehuda. 2Otolu nta'u tehineno ipoparenta i Yerusale. Neeno ineno, i Ma'aka, anano i Abisalo. 3I Abiama tuwu a laro luwuakoano hala anu wineweuno amano se'eluno napi onae. Onae, nahi buke aroano momperorohi ndi Ondae i Ue, Ue Alano, kana i Daudi, ama mpu'uno 4#1Mok. 11:36Sine hangano i Daudi, onaemo ka Dopoweeakono i Ue, Ue Alano inuleno i Yerusale, ka Dopotoroo anano umeuo ka saru mokorosoo Yerusale. 5#2Sam. 11:1-27Hangano i Daudi moweweu anu mentee a pongkita-Do i Ue ka nahi pansia inso a luwuno anu Doparentaakono i Ue asa ntinuwuno, sangkadio mongkona i Uria, to Heti atuu. 6Gagiomo peteaa asa ntinuwuno olono i Rehabea ka i Yerobea.

7Anu susuano inso a nteweweuno i Abiama ka luwuno anu wineweuno, kombake luwuno atuu teburi a wunta tutuludo luwuno mokole i Yehuda? Gagiomo peteaa i olono i Abiama ka i Yerobea. 8I Abiama mate ka kinaburu i kota Daudi. Ka i'amba i Asa, anano gagi mokole umeuo.

I Asa, mokole i Yehuda

15:9-24

(2Taw. 14:1-5; 15:16–16:13)

9A nta'u korua pulu poparentano i Yerobea, mokoledo to Isaraeli, i Asa gagi mokoledo to Yehuda. 10Pato pulu ka asa nta'u tehineno ipoparenta i Yerusale. Neeno ueno beine, i Ma'aka, anano i Abisalo anu beine. 11I Asa moweweu anu mentee a pongkita-Do i Ue kana i Daudi, ama mpu'uno. 12#2Taw. 15:8-15Onae nami po'eheako mbo'u pebelesua i wita atuu ka lumiahakono luwuno pelahumoaa anu wineweudo uempu'uno. 13Tendeano ipokompenaa-naao i Ma'aka, ueno beine inso a mpotorono ine mokole hangano ueno atuu moweweu tinaha Asera anu minokoburuako. Ipobangkuo i Asa tinaha anu minokoburuako atuu ka itunuo i lembono Kideroni. 14Maupo luwuno pongku wita pesombaa nahi liahakono, sine buke aroano i Asa metako ndi Ondae i Ue asa ntinuwuno. 15Iwawao i raha-Do i Ue luwuno sangka memporido amano ka luwuno sangka memporino onaeno: wulaa, salaka, ka luwuno sangka susua.

16Gagiomo peteaa i olono i Asa ka i Baesa, mokole i Isaraeli asa ntinuwudo. 17I Baesa, mokole i Isaraeli lumako metea umewai ira to Yehuda. Ipokorosoo kota Rama, ta tumangkoroo mia meluarako ke mewinso i wita poparentaano i Asa, mokole i Yehuda. 18Sine i Asa umalao luwu wulaa ka salaka anu da kongko a laro ponaapa arataano raha-Do i Ue ka anu ninaa i laro ponaapa arataa a rahado mokole, ka i'amba meweengakono a ngkaedo pegawaino. Ka i'amba mokole Asa tumena ira melako ndi Benihada anano i Taberimoni anano i Hesioni, mokoledo to Arami anu mo'ia i Damasi, saru pe'oliwi, 19”Hinao pedandiato ka pedandiado amaku ka amamu. Kitaomo, ku'oliwio ndi omue pompowee wulaa ka salaka. Gagi si pokogagio pedandiamu saru i Baesa, mokole i Isaraeli, kai ponsuka inso ndi ongkue.” 20I Benihada rumongeo po'emano mokole. Itena ira tadulako sorodaduno sumapoio luwuno kota i Isaraeli. Ioni, Dani, Abeli-Beti-Ma'aka, ka luwuno Kineroti saru luwuno wita Napatali, inangiomo. 21Rumongeo anu gagi atuu, i Baesa mena-naa mokorosoo kota Rama ka ipo'ia mpiha i Tiresa. 22Sine i mokole Asa tumena ira luwuno to Yehuda, nahina pinesusua. Ondae asalakono mpotande watu ka keu anu pinakeno i Baesa mokorosoo kota Rama. Ka i'amba mokole Asa pakeo mokorosoo Geba-Benami ka Misipa.

23Anu susuano inso a luwuno teweweuno i Asa ka luwuno mosiano, luwuno anu wineweuno saru luwuno kotano anu pinokorosono, kombake luwuno atuu teburi a wunta tutuludo luwuno mokoledo to Yehuda? Sine, i tempono imota'u marasai mompemahaki a orua karuno. 24I Asa mate ka ikinaburu i horino uempu'uno i kota Daudi, ama mpu'uno. Ka i'amba i Yosapa, anano, gagi mokole umeuo.

I Nadabi, mokole i Isaraeli

15:25-32

25I Nadabi, anano i Yerobea, gagi mokoledo to Isaraeli, a nta'u ko'orua poparentano i Asa, mokoledo to Yehuda. Onae moparenta i Isaraeli orua nta'u tehineno. 26Onae moweweu anu mosa'o a pongkita-Do i Ue, saru tumondao sala ntumuwu ka halano amano, anu gagi pu'uno to Isaraeli mpoweweu mbo'u hala. 27I Baesa, anano i Ahia, inso a mpe'etuno i Isakari, memoroko umewaio. I Baesa mepateo i kota Gibeoni, witado to Pelisiti, tempono i Nadabi ka luwudo to Isaraeli mengkaduo Gibeoni. 28I Baesa mepateo a nta'u ko'otolu poparentaano i Asa, mokole i Yehuda. Ka i'amba gagi mokole umeuo i Nadabi.

29 # 1Mok. 14:10 Mansano gagi mokole, ipepate ira luwu somborino i Yerobea. Luwuno anu hinao penaano inso a nsomborino i Yerobea, nahina maupo te'asa pino'ineeno tuwu, ranta ka ipingko luwu, menunu saru pau-Do i Ue anu pinohawe-Do molalo tetenaa-Do i Ahia to Silo atuu. 30Mongkona atuu, hangano luwuno hala anu wineweuno i Yerobea, anu gagi pu'uno to Isaraeli mpoweweu mbo'u hala. Kanandiomo ipokotesingkao tekuda-Do i Ue, Ue Alado to Isaraeli.

31Anu susuaano inso a nteweweuno i Nadabi ka luwuno anu wineweuno, kombake luwuno atuu teburi a wunta sejarado luwuno mokole? 32Gagiomo peteaa i olono i Asa ka i Baesa, mokole i Isaraeli, asa ntinuwudo.

I Baesa, mokole i Isaraeli

15:33–16:7

33A nta'u ko'otulu poparentaano i Asa, mokole i Yehuda, i Baesa, anano i Ahia gagi mokole a luwuno Isaraeli i Tiresa. Onae moparenta rua pulu ka opaa nta'u. 34Onae moweweu anu mosa'o a pongkita-Do i Ue, ka itondao sala ntumuwu ka halano i Yerobea anu gagi pu'uno to Isaraeli mpoweweu mbo'u hala.

Currently Selected:

1 Mokole 15: XMZ

Highlight

Copy

Compare