1 Mokole 14

Pinauno nabi Ahia mongkona somborino i Yerobea

14:1-20

1Tempo atuu i Abia, anano i Yerobea mahaki. 2Ka i'amba i Yerobea motaeakono kombiano, ”Pepatindamo! Po'onde-ondemo kana mia susua, kasi domento'oriko mia nine omue kombiano i Yerobea, ka lakomo i Silo. Nde komba i ra'ai ke po'iangano nabi Ahia. Onae anu umari pauo mongkona ongkue, nine ongkue ta gagi mokoledo tongku andio. 3Wawaomo hopulu roti, kukisi ka siu hoani asa pido ka u'amba lumako ndi onae. Onae ta pauakomu, hapa anu ta gagi saru nana'ote andio.” 4Kombiano i Yerobea weweuo kanandio. Mepatindaomo ka ilako i Silo ka ipewinso a rahano i Ahia. I Ahia nami pongkita mbo'u, matano morawuomo hangano tinuwuno. 5Sine Ondae i Ue mepau Iramo ndi i Ahia, ”Menteeano kombiano i Yerobea ta hawe mesikenoakono ndi omue, mongkona anano, hangano anano atuu kontongaano mahaki. Asalakono kanandio-andio pauakono.”

Tempono ipewinso beine atuu iweweuo kana-kana onae mia susua. 6Mansano irongeomo i Ahia unino pelempano beine, anu mewinso a mpewowa, motaeomo, ”Pewinsomo, hei kombiano i Yerobea! Tembio kau po'onde-onde omue mia susua? Tinena aku mohaweo pe'oliwi anu montaso ndi omue. 7Lakomo pauakono i Yerobea, kanandio, ’Kanandiomo pau-Do i Ue, Ue Alado to Isaraeli: Kutandekomo inso i olodo tongku atuu, ka motoroko gagi mokoledo bawaa-Ku Isaraeli.’

8Kukansa-kansaomo poparentaa inso a nsomborino i Daudi, ka meweengakono ndi omue, sine omue nahi kana tetenaa-Ku i Daudi anu mekariao luwuno parenta-Ku ka tumonda Aku a tompaano aroano ka moweweu butu anu mentee a pongkita-Ku. 9Omue moweweukomo anu mosa'o, lansaraopo sekono anu mese'elungiko. Uweweuomo tiamu luwuno pinesombai susua ka luwuno tinaha tinawa, ranta mokotesingkao tekuda-Ku, tendeano upebungkui Akumo. 10#1Mok. 15:29Onaemo pu'uno, Aku mompotii masukaraa a nsomborino i Yerobea. Aku rumopuo inso ndi Yerobea sompo tama, moiko anu mantande ke anu i totono potorono i Isaraeli. Aku rumoahio somborino i Yerobea kana mia moroahi anu mokoburu ranta kai pingko. 11Isema inuleno i Yerobea anu mate i kota ta kumaano dahu ka anu mate i tonga mpada ta komaano manu-manu i laro meene, hangano Ondae i Ue mepau Iramo. 12Sine omue, pekulemo i rahamu. I tempono upewinso i kota, nana'ote atuu ta mate. 13Luwudo to Isaraeli ira mensabangio ka mengkaburuo. Butu koa onae inuleno i Yerobea anu ta kinaburu, hangano i olodo inuleno i Yerobea, butu ndi onae Dopohawe i Ue, Ue Alado to Isaraeli anu moiko. 14Ondae i Ue Ira mompotoro asa mokoledo to Isaraeli anu ta rumopuo somborino i Yerobea oleo andio, ka tempo koa mbo'u andio. 15Ka Do'amba i Ue humuku ira to Isaraeli kana gelaga anu bunembua a uwoi ka butasi ira inso a wita moiko andio anu Doweeako ira uempu'udo. Ondae Ira weweuo ka dontetia-tia i asatowano koro Eparata, hangano mpoweweu iramo luwuno karuno lahumoado, ranta mokotesingkao tekuda-Do i Ue. 16To Isaraeli iramo mempinebungkui, hangano luwuno hala anu iweweuomo i Yerobea ka anu mokontehala ira to Isaraeli.”

17Umarino atuu kombiano i Yerobea melungka lumako, kai hawe i Tiresa. I tempono ilinggeio arono pewowano raha, nana'ote atuu mate. 18Luwudo to Isaraeli mengkaburuo ka mensabangio, menunu saru pau-Do i Ue anu pinohawe-Do molalo tetenaa-Do i nabi Ahia.

19Toreano inso a nteweweuno i Yerobea, kana'umpe ipe'iwali ka kana'umpe ipoparenta, menteeano teburi a wunta tutuludo luwuno mokole i Isaraeli. 20I Yerobea moparenta rua pulu ka orua nta'u tehineno, ka i'amba mohawe penaa-naaano saru uempu'uno. Ka i'amba i Nadabi, anano gagi mokole umeuo.

Poweweudo to Yehuda anu mokoburu tempono i Rehabea

14:21-31

(2Taw. 12:1-16)

21Onaemo i Rehabea, anano i Salomo, moparenta i Yehuda. Tinuwuno i Rehabea pato pulu ka asa nta'u tempono igagi mokole, ka hopulu ka opitu nta'u tehineno ipopareta i Yerusale, kota anu bininiki-Do i Ue inso a luwuno sukudo to Isaraeli gagi po'ianga Donaao nee-Do. Neeno ineno, i Na'ama, asa beine to Amoni.

22To Yehuda mpoweweu anu mosa'o a pongkita-Do i Ue. Mpoweweu ira hala anu mokomahakiako Ira aroa-Do, lumaloio luwuno anu wineweudo uempu'udo. 23#2Mok. 17:9-10Ondae mbo'u mpowangu hadio pongku wita pesombaa saru hadio tugu ka hadio karuno pelahumoaa i wawono sompo pongku wita anu mantande ka i totono sompo keu anu marombo. 24#Win. 23:17Tendeano hinao po'iangga pebelesua i wita atuu. Domeweweuo luwuno anu mokoburu, kana luwudo tongku anu Dosaari iramo i Ue inso a nto Isaraeli.

25 # 2Taw. 12:2-8 A nta'u ko'olima poparentano i mokole Rehabea, i Sisaki, mokoledo to Masiri, aiwa sumapoio Yerusale. 26#1Mok. 10:16-17; 2Taw. 9:15-16Irontuo arataa anu ninaa a raha-Do i Ue ka arataa a rahado mokole; luwuno irontuo. Irontuo mbo'u luwuno kanta wulaa anu wineweuno i Salomo. 27Gagi euno, i mokole Rehabea moweweu luwuno kanta mala anu ipe'ala-alaakono a luwuno petewawado puu mpodagai pewowa langkanaedo mokole. 28Sompo ipewinso mokole i raha-Do i Ue, luwuno puu mpodagai mewawao luwuno kanta atuu. Ka do'amba mpokuleo a bolongko podagaiado luwuno puu mpodagai. 29Anu susuano inso a nteweweuno i Rehabea ka luwuno anu wineweuno, kombake luwuno atuu teburi a wunta tutuludo luwuno mokole i Yehuda. 30Peteaa i olodo i Rehabea ka i Yerobea nahi hori menaa-naa. 31I Rehabea mate. Onae kinaburu i horino uempu'uno i kota Daudi. Neeno ineno i Na'ama, asa beine to Amoni. Ka i'amba i Abiama anano i Rehabea, gagi mokole umeuo.

Currently Selected:

1 Mokole 14: XMZ

Highlight

Copy

Compare