1 Mokole 13

I Yerobea ka tetenaa-Do Ue Ala inso i Yehuda

13:1-34

1Tempono i Yerobea mentade umpeda a meda pontunua pesomba ta montunu pesomba, hangano parenta-Do i Ue hawe asa nabi-Do Ue Ala inso i Yehuda lumako i Beteli. 2#2Mok. 23:15-16Ka i'amba hangano mpetena-Do i Ue onae mebooli a meda pontunua pesomba atuu, ipotae, ”Hei meda pontunua pesomba, hei meda pontunua pesomba! Kanandiomo pau-Do i Ue: Menteeano asa nana'ote ta pine'anaako a inuleno i Daudi, i Yosia neeno. I wawomu onae anu ta sumumbele ira sando mpesomba pongku wita pesombaa anu mpotunu pesomba i wawomu, luwuno mbo'u wukudo mia ta tinunu i wawomu” 3A oleo mbo'u atuu onae mompowee aasa petondoni kinohali-haliako, ipotae, ”Ndiomo petondoni kinohali-haliako, anu Dopauomo i Ue: Menteeano meda pontunua pesomba atuu ta tepeha ka awu anu i wawono ta te'uwu.” 4Mansano rumongeo mokole pauno nabi anu pinebooliakono a meda pontunua pesomba i Beteli, itasiakono kaeno inso a mpuu meda pontunua pesomba ka ipotae, ”Imerakoomo!” Sine kaeno anu tinasiakono tumisoo nabi atuu gagi tiido, ranta nahi pokompokuleo mbo'u. 5Meda pontunua pesomba atuu, tepeha ka awuno te'uwu inso a meda mpotunua pesomba atuu menunu saru petondoni kinohali-haliako anu pinoweeno nabi atuu a parenta-Do i Ue. 6Ka i'amba i mokole motaeakono nabi atuu, ”Po'emamo pompehohawa-Do Ue, Ue Alamu ka pekakaiakunemo, ka kupokompokuleo mbo'u kaeku.” Nabi atuu mo'emaomo pompehohawa-Do i Ue, ka i'amba kaeno mokole atuu ipokompokuleomo kana se'eluno. 7Ka i'amba mokole motaeakono nabi atuu, ”Aiwamo ka tolako irahaku, pokonsanaao koroimu ka hinao pompowee anu aku weeakomu.” 8Sine motae nabi atuu ndi mokole, ”Maupo entongano inso i langkanaemiu iwee aku, nahi aku lumako merongaa komiu ka nahi aku mongkaa roti ke mo'inu uwoi a mpo'ianga atuu. 9Hangano kanandiomo Doparenta aku i Ue: Si pongkaa roti ke mo'inu uwoi ka si pekule telalo a nsala anu utondaomo atuu.” 10Ka i'amba lumako telalo a nsala susua ka nahi pekule telalo a nsala anu linalono i'aiwa i Beteli.

11Asa nabi mota'u mo'ia i Beteli. Mehawe ira anano tumutuluakono luwuno anu wineweuno nabi a oleo atuu i Beteli ka pau anu pinohaweno ndi ondae mokole, domentutuluo mbo'u ndi amado. 12Ka i'amba mesikeno amado, ”Sala isuake anu tinondano?” Ka do'amba anano mentisoakono pesalaano tetenaa-Do Ue Ala anu hawe inso i Yehuda atuu. Ka i'amba mesikeno amado, ”Inso a nsala isuake ilako?” Ka do'amba anano mentisoakono sala anu tinondano tetenaa-Do Ue Ala anu hawe inso i Yehuda atuu. 13Ipotaeako ira anano, ”Imelapiakune kalide!” Mansano umari domelampio kalide, ipesawikio. 14Onae lumako tumonda lembuio tetenaa-Do Ue atuu ka ihaweo kontongaano mentoro i totono asa keu tarabanti. Isikenoo, ”Omueke tetenaa-Do Ue Ala anu hawe inso i Yehuda?” Isangkio, ”Humbee, ongkuemo.” 15Ipotaeakono, ”Aiwamo ka tolako i raha mongkaa roti.” 16Sine isangkio, ”Nahi aku tumonda komiu ka nahi aku tetoro. Ongkue mbo'u nahi aku mongkaa roti ke mo'inu uwoi saru omue a mpo'ianga atuu. 17Hangano, iparenta akumo pau-Do i Ue: Si pongkaa roti ke mo'inu uwoi i ra'ai. Si pekule telalo a nsala anu umarimo utondao atuu.” 18Ka i'amba motae nabi mota'u atuu ndi onae, ”Ongkue mbo'u asa nabi kana omue. A mpetena-Do i Ue, asa Mala'eka mepau ndi ongkue: Wawaomo kai pekule saru omue i rahamu, ka ipongkaa roti ka mo'inu uwoi.” Kanandiomo igaupio. 19Ka i'amba mia atuu lumako merongaakono, kai pongkaa roti ka mo'inu uwoi i rahano.

20Kontongaado mentoro i arono meda, haweomo pau-Do i Ue a nabi anu wawao mekule. 21Ipebooliakono tetenaa-Do Ue Ala anu hawe inso i Yehuda, ”Kanandiomo pau-Do i Ue: Hangano u'ewaiomo pau-Do i Ue, ka nahi utondao luwuno parenta anu Doweeakomu i Ue, Ue Alamu, 22sine mekule ka mongkaa roti saru mo'inu uwoi a mpo'ianga andio, ka hinaano Ondae i Ue umari iramo pauakomu: Si pongkaa roti ke mo'inu uwoi, onaemo pu'uno wata ngkoroimu nahi ta mewinso a ngkaburudo uempu'umu.”

23Umarino mia atuu mongkaa roti ka mo'inu uwoi, linapiomo kalideno. 24Mia atuu lumako ka i tonga nsala asa singa merangkamio ka ipepateo. Wata ngkoroino tepombole a nsala, sekono kalide atuu mentade i horino ka singa mbo'u atuu mentade i horino wata ngkoroi atuu. 25Luwuno mia anu telalo, mengkitao wata ngkoroi anu tepombole a ntonga nsala ka singa anu mentade i horino. Ka do'amba melako mentutuluo i kota po'iangano nabi mota'u atuu.

26Mansano rumongeo nabi anu popandeio ka ipekule inso a nsalano, anu gagi atuu, ipotae, ”Onaemo tetenaa-Do Ue Ala anu umewaio petena-Do i Ue. Ondae i Ue meweengakono a nsinga, ka iberi-berio ka mepateo menunu saru pau-Do i Ue anu pinau-Do ndi onae.” 27Ka i'amba motaeako ira anano, ”Imelapiakunemo kalide.” Onaemo ka domelampio. 28Ka i'amba lumako ka ihaweo wata ngkoroino mia atuu anu tepombole a nsala, sekono kalide ka singa mentade i horino wata ngkoroi atuu. Singa atuu nahi kaano wata ngkoroi atuu ka nahi beri-berio kalide atuu. 29Nabi atuu tumandeo wata ngkoroino tetenaa-Do Ue Ala atuu, inaao i wawono kalide, ka iwawao mekule i kotano onaeno kai sinabangi ka kinaburu. 30Wata ngkoroino mia atuu i kaburuo a ngkaburuno onaeno ka domensabangio, ”Waintokopo, pepaekompoku!” 31Umarino kumaburuo, ipotaeako ira anano, ”Tewala mate aku, imengkaburu aku a laro ngkaburuno nabi atuu, imenaao wukuku i horino wukuno.

32Hangano pau anu ipebooliakonomo a mperenta-Do i Ue mongkona meda pontunua pesomba anu i Beteli atuu ka a luwuno raha mpelahumoaa i pongku wita pesombaa a luwuno kota Samaria manasa ta gagi.”

33Umarino anu gagi mbo'u andio, i Yerobea nahi tebali inso a ntuwuno anu mosa'o atuu. Ipotoro ira mbo'u sando mpesomba inso a mpalili tiano luwuno pongku wita pesombaa. Isemamo koa anu behe ironsoo gagi sando mpesomba i luwuno pongku wita pesombaa. 34Mongkona atuu gagi halado somborino i Yerobea, ranta ka domerinopu inso i wawontolino.

Currently Selected:

1 Mokole 13: XMZ

Highlight

Copy

Compare