1 Mokole 12

Tekaleno poparentaano i Salomo

12:1-24

(2Taw. 10:1–11:4)

1I Rehabea lumako i Sikemi, hangano luwudo to Isaraeli mehawe iramo i Sikemi ira mempotoroo gagi mokole. 2Mansano rumongeo mongkona atuu, i Yerobea anano i Nebati anu da mo'ia i wita Masiri, hangano molai inso ndi mokole Salomo, mekule inso i wita Masiri. 3Mpontena ira mia lumako moboio. Ka i'amba haweomo i Yerobea ka luwudo to Isaraeli ka dompotae, 4”Ipokomobeaomo amamu tembia mami. Kanandio-andio, ipokomonongkoa kamimo anggaa mobea inso ndi ondae amamu ka tinembi mobea anu dopopotembia kami, ka ki'amba mpetenunu ndi omiu.” 5Sine isangki ira, ”Imelakomo otolu oleo tehineno, ka i'amba mpekule ndi ongkue.” Umarino atuu melako iramo palili.

6Umarino atuu i Rehabea mo'ema patudu inso a luwuno mia memota'u anu mpetenunu ndi Salomo, amano, tempono da ituwu, ipotae, ”Hapa patudumiu sumangki ira palili atuu?” 7Dompotae, ”Tewala oleo andio beheko gagi atado palili, ka metenunu ndi ondae, ka sumangkiako ira pau anu moiko, manasa ira megagi atamu asa ntinuwumu.” 8Sine nahi behe tumondao patududo mia memota'u atuu, ka mo'ema patududo mia memongura pe'asa ntinuwuno anu mpekakaakono. 9Ipotaeako ira, ”Hapa patudumiu? Kana'umpe tosangki ira palili anu mpotae ndi ongkue: Pokomonongkoomo tinembi anu dopopotembiakami amamu?” 10Ka do'amba mpotae mia memongura pe'asa ntinuwuno atuu, ”Kanandiomo asalakono pauako ira palili anu mpotaeakomu: ’Doweweuomo amamu tinembi mobea, sine omue, pokomonongkoomo tinembi mami’, kanandiomo asalakono pauako ira: ’Ana ntonisoku langkaiopo sekono tongado amaku.’ 11Kanandio-andio ondae amaku moweeakomiumo tinembi anu mobea, sine ongkue aku mokomobeao tinembimu. Ondae amaku dosepiakomiumo ponsepi, sine ongkue aku sumepiakomiu ponsepi merui labu.”

12Te'ipuano haweomo i Yerobea saru luwudo palili ndi Rehabea, kana anu pinaudo mokole, ”Impekulemo ndi ongkue te'ipua.” 13Ondae mokole sumangki ira palili atuu meroku. Ipebungkuio patudu anu domeweeakono mia memota'u ndi onae. 14Ipotaeako ira montonda patududo mia memongura, ”Ondae amaku moweeakomiumo tembia anu mobea, sine ongkue mokomobeao tembiamiu; ondae amaku sumepiakomiu ponsepi, sine ongkue sumepiakomiu ponsepi meruiako labu.”

15Gagi, ondae mokole nahi perorongeako ira palili, hangano atuu lano tepu'u inso ndi Ondae i Ue, ka ite'ihii pau-Do anu pinohawe-Do molalo ndi Ahia, to Silo ndi Yerobea anano i Nebati.

16 # 2Sam. 20:1 Mansado mengkitao luwuno to Isaraeli nine nahi perorongeako ira mokole, mesangki ira palili ndi mokole,

”Hapa kita mpohawe ndi Daudi?

Nahina tia pusakato ndi anano i Isai atuu!

Imelako a ngkemamiu, hei to Isaraeli!

Kanandio-andio orusuomo omuemu rahamu, hei Daudi!”

Onae ka domelakomo to Isaraeli a ngkemado. 17Sine to Isaraeli anu mempo'ia a luwuno kotado to Yehuda, i Rehabea gagi mokoledo. 18Ka i'amba mokole Rehabea tumenao i Adorami, petewawado mia mpo'angga dinadai, sine luwudo to Isaraeli mewunoakono watu ranta kai mate. Ondae mokole Rehabea mompari-pari me'ula a ngkaretano ka ipolai i Yerusale. 19Kanandiomo pompu'uano to Isaraeli me'ewa a inuleno i Daudi ranta hawe oleo andio. 20Mansado merongeo luwuno to Isaraeli, nine i Yerobea mekuleomo, mpotena ira mia moboio a ntepotowoa bawaa, ka do'amba mpotoroo gagi mokoledo luwuno Isaraeli. Nami hina mbo'u anu tumonda ira inuleno i Daudi, sangkadio suku Yehuda. 21Mansano hawe i Rehabea i Yerusale, ipumpu ira luwu to Yehuda ka suku Benami, asa etu ka halo pulu nsowu mia tebiniki anu pinerorohi metea me'iwaliako ira to Isaraeli ka mokuleo poparentaa atuu ndi Rehabea, anano i Salomo. 22Sine haweomo pau-Do Ue Ala ndi nabi Senaya, kanandio, 23”Pauakonomo i Rehabea anano i Salomo, mokoledo to Yehuda ka a luwuno suku Yehuda ka to Benami, saru toreano inso a tongku atuu: 24Kanandiomo pau-Do i Ue: Si melako ka si mpetea umewai ira pepaekompomiu to Isaraeli. Impekulemo i rahamiu singge mia, hangano insomo ndi Ongkue anu gagi andio.” Dompe'ala-alao pau-Do i Ue, ka dompepokule mbo'u menunu saru pau-Do i Ue.

I Yerobea pu'uo pesombaa anu susua

12:25-33

25Ka i'amba i Yerobea mokorosoo Sikemi i mentorukuno Eparai ka mo'ia i ra'ai. Onae meluarako inso i ra'ai, ka i'amba mokorosoo Pinueli. 26Motae i Yerobea i laro aroano, ”Kanandio-andio poparentaa atuu bara'ura mepokule a somborino i Daudi. 27Tewala tongku atuu melako mpopesombaako pesomba sinumbele i raha-Do i Ue i Yeruale, manasa aroado tongku andio ta mepokule mbo'u ndi uedo, i Rehabea, mokoledo to Yehuda. Ira mpepate aku ka dompepokule ndi Rehabea mokoledo to Yehuda.” 28#Pel. 32:4Umarino mo'ema patudu, ondae mokole moweweu orua ana nsapi laki inso a wulaa. Ka i'amba motae ndi ondae, ”Sompoomo tehineno imelako i Yerusale. Hei Isaraeli, imengkitaomo pinesombaimiu anu wawakomiu mpeluarako inso i wita Masiri.” 29Ka i'amba numaao asa sapi wulaa i Beteli, ka sapi susuano inaao i Dani. 30Wineweuno atuu mompokotehala, hangano palili melako i Beteli mpopesombai tinaha anu asa, ka melako i Dani mpopesombai tinaha anu susua. 31Iweweu ira mbo'u raha mpesombaa po'unde-undea lahumoa ka ipotoro ira sando mpesomba inso a mpalili anu komba inuleno i Lewi. 32#Ima. 23:33-34Ka i'amba i Yerobea pakosio asa oleo langkai a oleo anu kohopulu ka olima wula ko'oalu, mengkena kana oleo langkai i Yehuda, ka onaeno mewuatako a ensano pontunua pesomba atuu. Kanandiomo iweweuo i Beteli. Ipesombaakono pesomba a luwuno ana nsapi anu wineweunomo atuu. Itena ira mbo'u sando mpesomba a mpo'ianga po'unde-undea anu iweweuomo. 33Onae mewuatako a ensano pontunua pesomba anu wineweuno i Beteli atuu a oleo kohopulu ka olima wula anu ko'oalu, a wula anu isongkaomo i laro aroano onaeno. Ipakosiako ira to Isaraeli asa oleo langkai ka onae mewuatako a ensano pontunua pesomba atuu montunu pesomba.

Currently Selected:

1 Mokole 12: XMZ

Highlight

Copy

Compare