1 Mokole 11

I Salomo tedonta hangano mompesombai lahumoa

11:1-13

1 # Win. 17:17 I mokole Salomo mompekokono hadio beine mia hawe. Komba butu anano i Pirao, ipekokono ira mbo'u beine to Moabi, to Amoni, to Edomi, to Sidoni ka to Heti, 2#Pel. 34:16; Win. 7:3-4kahinaano mongkona luwuno tongku atuu, mepau Iramo i Ue a nto Isaraeli, ”Si mpe'asaako ira ka ondae mbo'u si dompe'asaa komiu. Hangano, manasaomo ira mpopandeio aroamiu a luwuno pinesombaido.” Aroano i Salomo tepopandeiomo hangano mompekokono. 3Onae pitu etu kombiano inso a ulea mokole ka tolu etu samburueno. Kombiano atuudo mokopansiao aroano. 4I tempono mota'uomo i Salomo, kombiano atuudo mempopandeio aroano a mpinesombai susua, ranta aroano nami buke metenunu ndi Ondae i Ue, Ue Alano, kana aroano i Daudi, amano. 5Kanandiomo i Salomo mesombaio i Asitore, lahumoa beinedo to Sidoni ka i Miliko, pesombaado to Amoni anu mokoburu. 6I Salomo moweweu anu mosa'o i aro-Do i Ue ka nami buke aroano tumonda Ira i Ue, kana i Daudi, amano. 7I tempo atuu, i Salomo mowangu pongku wita pesombaa ndi Kamosi, mokoburua anu pinesombaido to Moabi, i torukuno i sabaano oleo i Yerusale ka ndi Moloki, mokoburua anu pinesombaido inuleno i Amoni. 8Kanatuu koa mbo'u iweweuo a luwuno kombiano, luwuno beine mia hawe anu mpopesombaako pesomba dupa ka pesomba sinumbele a luwuno anu pinesombaido.

9Tekuda Iramo i Ue ndi Salomo, hangano aroano pansiaomo inso ndi Ondae i Ue, Ue Alado to Isaraeli, anu penduamo Dopepopokita ndi onae, 10ka umarimo ipinarentaako mongkona atuu, kasi petonda a pinesombai susua, sine nahi tondao hapa parenta-Do i Ue. 11Ka i'amba mepau Iramo i Ue ndi Salomo, ”Hangano pelelumu kanatuumo, ka nahi upekariao pedandia ka luwuno pompakosi-Ku anu umariomo Kuparentaakomu, menteeano Aku Kumansao poparentaa atuu inso ndi omue ka meweengakono a atamu. 12Sine, tempono da tuwuko andio nahi Aku weweuo hangano i Daudi, amamu; inso a ngkaedomo anamu Aku kumansao. 13Sine, nahi ta luwuno poparentaa atuu Aku Kumansao. Asa suku Aku weeko, hangano tetenaa-Ku i Daudi, ka hangano Yerusale anu Kubinikiomo.”

Luwuno anu umewaio i Salomo

11:14-40

14Ondae i Ue moweeakono asa mia umewaio i Salomo, onaemo i Hadadi to Edomi, inso a inuleno mokoledo to Edomi. 15I ndi'ipua mansano to Edomi ntenangi ndi Daudi, Tadulako Sorodadu Yoabi lumako kumaburu ira mia anu mempinepate, ka i'amba mepate ira luwu tama i Edomi; 16Onoo wula tehineno i Yoabi mo'ia i ra'ai saru luwudo to Isaraeli, ranta ka iropu ira tama i Edomi. 17Sine i Hadadi saru ba'opia ira to Edomi inso i olodo pegawaido amano, mpolai i wita Masiri; tempo atuu i Hadadi da mongura. 18Mpelungka ira inso i Midia ka domehawe i Parani, ka do'amba mpowawa ba opia mia inso i Parani ka domelako i wita Masiri ndi Pirao, mokole i wita Masiri. Ondae mokole moweeakono raha ndi Hadadi, mompatindaakono kaanga ka ipoweeakono asa ntia wita. 19I Hadadi mohawe pompehohawa anu langkai inso ndi Pirao, ranta iweeakono i Hadadi uaino kombiano onaeno, uaino kombiado mokole i Tahapenesi, gagi kombiano. 20Uaino i Tahapenesi atuu me'anaakono asa anano tama meneeako i Genubati. I Tahapenesi motoeo a langkanaeno i Pirao, ranta ipo'ia i Genubati a langkanaeno i Pirao, i olodo luwuno anano i Pirao. 21Tempono i Hadadi i wita Masiri, irongeo nine i Daudi mate ka i Yoabi, tadulako sorodadu mateomo, motaeomo i Hadadi ndi Pirao, ”Po'ineeomo kulako i witaku.” 22Mesikenoomo i Pirao ndi onae, ”Hapake makuramu ndi ongkue, ranta kanandio-andio kau pontoo lumako i witamu?” Sumangki i Hadadi, ”Nahina makuraku maupo hapa, sine maupo kanatuu, i'eheakunemo lumako.”

23Ondae Ue Ala moweeakono mbo'u i Salomo asa mia ewaino, i Resoni anano i Eliada anu molaiomo inso ndi ueno i Hadadeseri, mokole i Soba. 24I Resoni pumpu ira mia, ka i'amba onae gagi petewawado gerombola. Tempono i Daudi ta mepate ira, ondae melako i Damasi ka dompo'ia i ra'ai. Ka do'amba mempotoroo i Resoni gagi mokole i Damasi. 25Onae gagi ewaido to Isaraeli asa ntinuwuno i Salomo, moweweuako ira masukaraa kana anu wineweuno i Hadadi. Imokoburuako ira to Isaraeli ka igagi mokoledo to Arami.

26I Yerobea anano i Nebati, to Eparai inso i Sereda, umewai ira mbo'u mokole. Onae asa mia pegawaino i Salomo ka ineno, asa tuwu beine, meneeako i Seruya. 27Onaemo pu'uno kai masa umewai ira mokole: I Salomo mowangu Milo ka itutuo bolono bente kota Daudi, amano. 28I Yerobea, asa mia sorodadu anu moroso ntu'u. Mansano kumitao i Salomo nine mia mongura mokua mo'angga, onaemo kai poweeakono anggaa dumagai ira luwu mia mpo'angga inso a inuleno i Yusupu. 29Tempo ipeluarako i Yerobea inso i Yerusale, i nabi Ahia to Silo tepohaweakono a nsala mesoumbuako sangka wo'ohu. Butu orua ira i tonga mpada. 30I'inio moroso i Ahia sawu wo'ohu anu pinokonano ka iberi-berio gagi hopulu ka orua beri. 31Ka i'amba motaeakono i Yerobea, ”Alaomo tiamu hopulu beri, hangano kanandiomo pau-Do i Ue, Ue Alado to Isaraeli: Menteeano Aku kumansao poparentaa atuu inso a ngkaeno i Salomo ka meweengakono ndi omue hopulu suku. 32Sine, asa suku ta me'ueo mpiha hangano i Daudi, tetenaa-Ku ka hangano Yerusale, kota anu Kubinikio inso a luwuno sukudo to Isaraeli. 33Hangano dompembungkui Akumo ka mpenggolontu ira mpesombaio i Asitore, pinesombaido to Sidoni, i Kamosi, pinesombaido to Moabi, ka i Miliko, pinesombaido inuleno i Amoni. Ondae mbo'u nahi domentuwu mentondao sala-Ku ka mpoweweu anu mentee a pongkita-Ku, luwuno pompakosi ka atora-Ku kana i Daudi, amano. 34Nahi Aku umalao luwu poparentaa atuu inso a ngkaeno, sine onae pinokogagi mpiha mokole asa ntinuwuno hangano i Daudi tetenaa-Ku anu Kubinikiomo ka anu tumondao luwuno parenta ka pompakosi-Ku. 35Aku umalao poparentaa atuu inso a ngkaeno anano ka meweengakono hopulu suku ndi omue. 36Ndi anano Aku weeakono asa suku, kaihina mpiha inuleno tetenaa-Ku i Daudi i aro-Ku i Yerusale, kota anu Kubinikio kai po'ia nee-Ku i ra'ai. 37Omue Aku umalako ka omue komoparenta a luwuno anu inehemu ka gagi mokoledo to Isaraeli. 38Tewala uperorongeakono luwuno anu Kuparentaakomu, tuwu montonda sala-Ku, ka moweweu hapa anu mentee a pongkita-Ku ka mekariao pompakosi ka parenta-Ku kana anu iweweuomo i Daudi, tetenaa-Ku, manasa Aku kumongkomiko, wanguakomu aasa sombori anu moroso, kana anu Kuwanguakono i Daudi ka meweengakono Isaraeli ndi omue. 39Onaemo pu'uno Aku mokongkodeio inuleno i Daudi, sine komba ta kanatuu mpiha.”

40I Salomo mosongka ta mepateo i Yerobea, sine i Yerobea ronga molai lumako i wita Masiri ndi Sisaki, mokole i wita atuu, ka mo'ia i ra'ai ranta ka imate i Salomo.

Mateno i Salomo

11:41-43

(2Taw. 9:29-31)

41Anu susua mbo'u inso a nteweweuno i Salomo, luwuno anu wineweuno ka ponto'orino, kombake luwuno atuu teburi a wunta tutuluno i Salomo. 42I Salomo parentao luwuno Isaraeli pato pulu nta'u tehineno. 43Ka i'amba i Salomo mate ka kinaburu i kota Daudi, amano. I Rehabea, anano umeuo gagi mokole.

Currently Selected:

1 Mokole 11: XMZ

Highlight

Copy

Compare