1 KORINTI 8
8
Mongkona pesomba a lahumoa
8:1-13
1Mongkona bau pesomba a lahumoa tomento'orio, ”luwuto hinao ponto'orito.” Ponto'ori anu kanandio weweuo mia gagi mompelangka-langkai, sine pompehohawa mowangu. 2Tewala hinao asa mia anu potaeno, nine hinao aasa ”ponto'orino,” ka onae naapo koa mbo'u ihaweo ponto'ori, ba kana'umpe anu asalakono ka ihaweo. 3Sine mia anu mehohawa Ira Ue Ala, Doto'orio Ue Ala.
4Mongkona mongkaa bau pesomba a lahumoa tomento'orio, ”nahina lahumoa i wawontolino ka nahina Ue Ala susua sangkadio Ondae Ue Ala anu asa-asa-Do.” 5Hangano maupo hinao hapa anu nineeako ”pinesombai susua,” moiko i suruga, maupo i tolino – ka lano mentee hadio ”pinesombai susua” ka hadio ”ue” anu kanandio – 6sine ndi ontae butu koa aasa Ue Ala, onaemo Ondae i Ama, anu ndi Ondae insoano luwuakoano ka anu tia-Do tomentuwu, ka aasa koa Ue, onaemo Ondae i Yesu Kerisituu, anu hangano Ondae luwuakoano pinokogagiomo ka hangano Ondae ka tomentuwu. 7Sine komba luwuno mia anu hinao ponto'ori atuu. Hinao mia, anu hangano da te'onggo mpiha a luwuno lahumoa, mongkaa bau atuu kana bau pesomba a lahumoa. Ka hangano molema aroado, aroado atuu tesosa'ariako onae. 8”Kaanga komba iwawa kita lalu umpedaako Ira Ue Ala. Nahina hapa-hapa rugito, ba nahi tompongkaa ka nahina hapa-hapa urato, ba tompongkaa.” 9Sine idagaiomo, ka si maluamu andio gagi watu tetidudo mia anu molema. 10Hangano tewala domengkita komiu mia anu hinao ”ponto'ori,” tekonai mpentoro mpongkaa a raha mpesombaa lahumoa, kombake mia anu molema aroano atuu pinokoroso ka ikaano bau pesomba a lahumoa? 11Nde ba kanandio mia anu molema, onaemo pepaekompomu, anu tiano koa mbo'u ka Domate i Kerisituu, gagi mate hangano ”ponto'ori” mu. 12Tewala hangano anu kanandio ka utehala a luwuno pepaekompomu ka belaio aroado anu molema, a menteeano omue tehala ndi Ondae i Kerisituu. 13Onaemo pu'uno tewala kaanga gagi watu tetiduno pepaekompoku, ranta nahina tampulaano nahi aku mongkaa mbo'u bau, ka si kugagi watu tetiduno pepaekompoku.
Currently Selected:
1 KORINTI 8: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
