1 KORINTI 7
7
Mongkona pekombiaa
7:1-16
1Ka kanandio-andio mongkona luwuno anu imeburiakune. Onaemo moiko tama, ba nahi pekombia, 2Sine tumangkoroo masolaa a mpebelesua, moikoopo sompo tama ka ihina beineno onaeno ka sompo beine ka ihina tamano onaeno. 3Asalakono tama umihiio kinereno beineno, kanatuu koa mbo'u beine a ntamano. 4Beineno nahina pabawano a ngkoroino onaeno, sine tamano, kanatuu koa mbo'u tama nahina pabawano a ngkoroino onaeno, sine kombiano. 5Si memambe olaiako, sangkadio tepo'asaamiu a tempo anu sarai, ka ipohawe koa tempo mekakai. Umarino atuu ka iwali tuwu me'asa, ka si popandei komiu i Mosa'o, hangano nahi mpokompeteao po'eheno aroamiu. 6Mongkona andio kupauakomiu kana koloaa, komba songka. 7Maupo kanatuu tedoa moiko, tewala luwuno mia kana ongkue; sine sompo mia montarima pompowee inso ndi Ondae Ue Ala tiano onaeno, anu asa mia pompowee andio, anu mehano pompowee atuu. 8Sine a mia anu nahi dompekombia ka a ntuwu beine kupauako ira, moikoopo ka domekongko kana ongkue. 9Sine tewala nahi dompokompeteao, moikoopo dompekombia. Hangano moikoopo mekombia sekonopo mo'ai hangano po'eheno aroa.
10 #
Mat. 5:32; 19:9; Mrk. 10:11-12; Luk. 16:18 A mia anu mpekombia iramo ongkue – naahi, komba ongkue, sine Ondae i Ue – meparenta, aasa beine si teposuaakono tamano. 11Ka tewala onae teposua, asalakono ka ituwu mpiha nahina tamano ke mesintuwu saru tamano. Ka aasa tama si teposuaakono beineno.
12A mia susua ongkue, komba Ondae i Ue, motae: tewala hinao aasa pepaekompo mekombiaako asa mia anu nahi pompe'ala-ala ka beine atuu ineheno tuwu morokoakono, pepaekompo atuu nahi moiko iteposuaakono. 13Ka tewala hinao aasa beine metamaako asa mia anu nahi pompe'ala-ala ka tama atuu ineheno tuwu morokoakono, si teposuaakono tama atuu. 14Hangano tama anu nahi pompe'ala-ala atuu pinokomempori hangano kombiano ka kombiano anu nahi pompe'ala-ala atuu pinokomempori hangano tamano. Tewala komba kanandio, manasa luwuno anamiu onaemo ana mokoburu, sine kanandio-andio ondae onaemo nana'ote mempori. 15Sine tewala mia nahi pompe'ala-ala atuu ineheno teposua, po'ineeomo doteposua; mongkona anu kanandio pepaekompo tama ke beine maluaomo. Sine Ondae Ue Ala moboi komiu ka imentuwu a laro rodoa. 16Hangano kana'umpeke ka uto'orio, hei beine, nahi kokumaduduioke tamamu? Ba kana'umpeke ka uto'orio, hei tama, nahi kokumaduduioke beinemu?
Tuwu a laro nteweweu kana tempono Dopepoboi Ue Ala
7:17-40
17Ka i'amba asalakono sompo-sompo mia ka ikongko tuwu kana anu Dopakosiakonomo i Ue ka a nteweweu kana tempono Dopoboio Ue Ala. Ndiomo pompakosi anu kuweeako ira luwuno bawaa. 18Tewala asa mia pinoboi metindiomo, si koa i'ungkeakono ta wunio petindino atuu. Ka tewala asa mia pinoboi nahi petindi, siimo ipetindi. 19Hangano metindi ke nahi petindi komba kinere. Anu kinere onaemo tumondao luwuno songka-Do Ue Ala. 20Moikoomo sompo-sompo mia ka ipo'ia a nteweweu, kana tempono Dopoboio Ue Ala. 21Nde atakoke tempono upinoboi? Atuu komba tembio! Sine tewala mohaweko tempo ka upinotola, pakeomo tempo atuu. 22Hangano aasa ata anu pinoboi-Do i Ue a anggaa-Do, onaemo mia tola, mia-Do i Ue. Kanatuu koa mbo'u mia tola anu pinoboi-Do i Kerisituu, onaemo tetenaa-Do. 23Me'inoli komiumo ka olino lesoomo inowahi. Onaemo pu'uno si megagi atado mia. 24Pepaekompo luwu-luwu, po'ineeomo sompo-sompo mia ka ipo'ia i aro-Do Ue Ala a nteweweu kana tempono ipinoboi.
25Kanandio-andio mongkona luwuno ana beine. Mongkona ondae nahi kupohawe parenta inso ndi Ondae i Ue. Sine kupauo pohaweno aroaku kana asa mia anu pine'ala-ala hangano pe'aroa anu tinarimano inso ndi Ondae Ue Ala. 26Pohaweno aroaku, nine mewowoloo tempo masukara kanandio-andio, moikoopo mia ka ikongko kana tuwuno. 27Nde te'onggokoke a aasa beine? Si po'ungke-ungkeako koteposua! Nde nahi ute'onggoke a aasa beine? Siimo mbo'u po'ungke te'asa mia! 28Sine tewala mekombiako, komba tehalako. Ka tewala aasa ana beine mekombia, onae komba moweweu hala. Sine mia anu kanandiodo ta umalu ira masusaa ngkoroi ka aku motola komiu inso a masusaa atuu. 29Pepaekompo luwu-luwu, ndiomo anu aku pauo, onaemo: owowaomo tempo! Onaemo pu'uno a tempo anu da hinao andio mia anu hinao beinedo asalakono ka dompelelu kana nahina beinedo; 30ka mia anu mpengese kana nahi dompengese; ka mia anu memawongko kana nahi domemawongko; ka mia anu mpo'oli kana nahi dompe'ueo hapa anu inolido; 31owowaano luwuno mia anu mompake parewa ntolino kana poore komba domempakeo. Hangano wawontolino anu tomento'orio kanandio-andio ta tampula. 32Ineheku, ka imentuwu nahina pinorerengko. Mia anu nahina beineno ka ipo'asao aroano a mpo'ehe-Do i Ue, ba kana'umpe ka Dopemoikoo i Ue. 33Mia anu hinao beineno ka ipo'asao aroano a mpo'eheno wawontolino, ba kana'umpe ka ipokonsanaao beineno, 34ka ba kanandio aroano tetia-tia. Beine anu nahina tamano ka luwuno ana beine dompo'asao aroado a mpo'ehe-Do i Ue, ka imempori koroido ka penaado. Sine baine anu hinao tamano mo'asao aroano a mpo'eheno wawontolino, ba kana'umpe ka ipokonsanaao tamano.
35Luwuno andio kupauo moikoamiu koa, komba tumomboleio po'eheno aroamiu, sine tendeano ka impoweweu hapa anu mentee ka moiko, ka ipekakaako Ira i Ue nahina morerenggoti. 36Sine tewala potaeno asa mia, nine nahi tekona wineweuno a nsamborano, tewala samborano atuu komota-mota'unomo ka mentee ntu'u ipewowoloo, nine asalakono ka dopekombia, moikoomo dopekombia, tewala ineheno. Mongkona atuu komba hala. 37Sine tewala asa mia, anu komba dinadai ka ipoweweu kanandio, ipe'ala-alao ntu'u i laro aroano ka ipabawaio ntu'u po'eheno, iputusiomo nahi ta kumombiao samborano, onae moweweu moiko. 38Gaagi mia anu kumombiao samborano moweweu moiko, ka mia anu nahi kombiao samborano moweweu lalu moiko. 39Beineno te'onggo tempono da tuwu tamano. Tewala mateomo tamano, maluaomo ba ipekombiaako isemamo koa anu ineheno, poolo mia atuu asa mia anu mompe'ala-ala. 40Sine montonda pohaweku, me'uraopo, ba ikongko mo'ia a ntinuwuno. Ka pohaweku, nine ongkue mbo'u hinao Penaa-Do Ue Ala.
Currently Selected:
1 KORINTI 7: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
