1 KORINTI 9
9
Pabawa ka lano anggaado tinena
9:1-27
1Kombake ongkue tinena? Kombake ongkue mia malua? Kombake kukita Iramo i Yesu, Ueto? Kombake omiu wuano inanggaku ndi Ondae i Ue? 2Maupo a mia susua ongkue komba tinena, sine ndi omiu ongkue tinena. Hangano tuwumiu ndi Ondae i Ue onaemo tondonino ongkue tinena. 3Ndiomo pe'alaakoku ndi ondae anu mentata aku.
4Nahi moikoke ba kipongkaa ka mo'inu? 5Nahinake pabawamami ka kipowawa beinemami to Kerisituu a laro pelempaamami, kana tinena mehano ka pepaekompo-Do i Ue ka i Kepa? 6Ke butu koa ongkueke ka i Baranaba anu nahina pabawa ka kipinokompenaa-naa inso a mpo'anggano kaemami? 7Isemake anu horio metonda a laro mpeteaa tumembio luwu kinereno? Isemake anu mompahoakono lere anggoro ka nahi kaano wuano? Ke isemake anu mompakambi bawaano bimba ka nahi po'inu susuno bimba atuu? 8Hapa anu pinauku andio komba butu pinewowolono mia. Kombake songka Taura motae mbo'u kanandio? 9#Win. 25:4; 1Tim. 5:18 Hangano a songkano i Musa hinao teburi, ”Si kapuo ngusuno sapi anu kontongaano monsesa!” Sapike anu pinerio-Do Ue Ala? 10Ke ontaeke anu tinoo-Do? Humbee, tiatomo ka ibinuri mongkona andio, onaemo mompadeko asalakono mompadeko a laro pomperorohia ka monsesa asalakono monsesa a laro pomperorohia ka ipohawe tiano.
11 #
Rom. 15:27
Gaagi, tewala kiporawoakomiumo inii rohani, laloomo lahike, ba kipohawe pompowee tolino inso ndi omiu? 12Tewala mia susua hinao pohawado pomperorohi anu kanatuu inso ndi omiu, kombake omami hinao pabawa anu lalu langkai?
Sine komba kipakeo pabawa atuu. Tendeano kitembio luwuakoano, ka si kipompokohina pontombolei a pompalelea Lele Mawongkoa-Do i Kerisituu. 13#Win. 18:1 Nahi imento'orioke, nine ondae anu mpompekakaako a mpo'ianga mempori mpohawe pepotuwudo inso a mpo'ianga mempori atuu ka nine ondae anu mpompekakaako meda pontunua pesomba, mpohawe tiado inso a meda pontunua pesomba atuu? 14#Mat. 10:10; Luk. 10:7 Kanatuu koa mbo'u Ondae i Ue Dopakosiomo, nine ondae anu mpompalele Lele Mawongkoa, asalakono mentuwu inso a pompalelea Lele Mawongkoa atuu.
15Sine nahi kuhori mompake maupo te'asa inso a luwuno pabawa atuu. Kuburio luwuno andio, komba ka kuwineweu mbo'u kanandio. Hangano lalukupo mate sekonopo moweweu kanatuu! Mentee ntu'u, anu kupo'undeakono nahina moko'onini maupo isemamo koa! 16Hangano tewala kupaleleo Lele Mawongkoa, nahina pepu'uano aku mompelangka-langkai. Hangano atuu lano anggaaku. Masola akumo, tewala nahi kupaleleo Lele Mawongkoa. 17Tewala mansa kuweweuo montonda po'eheku ongkueku, lano tekona kupontarima tambo. Sine hangano kuweweuo komba montonda po'eheku ongkueku, pompalelea atuu onaemo anggaa anu kupinopotembiako. 18Tewala kanandio hapake tamboku? Tamboku onaemo andio: nine moiko kupompalele Lele Mawongkoa nahina tambo, ka nine nahi kupompake pabawaku kana pompalele Lele Mawongkoa.
19Maupo ongkue komba atado luwuno mia, kupokogagio koroiku atado luwuno mia, ka ihadio koa mia hinaweku. 20Kanandiomo a nto Yahudi gagi akumo kana to Yahudi, ka kupongko'ala ira koa to Yahudi. A mia anu mentuwu mpontonda songka Taura gagi akumo kana mia anu mentuwu mpontonda songka Taura, maupo kutuwu komba montonda songka Taura, ka kupongko'ala ira koa anu mentuwu mpotonda songka Taura. 21A mia anu mentuwu komba mpontonda songka Taura gagi akumo kana mia anu mentuwu komba mpontonda songka Taura, maupo kutuwu komba mebungkuio songka-Do Ue Ala, hangano kutuwu montonda songka-Do i Kerisituu, ka kupongko'ala ira koa anu mentuwu komba mpotonda songka Taura. 22A mia anu memolema gagi akumo kana mia anu memolema, ka kupokokadudui ira koa anu memolema. A luwuno mia gagi akumo luwuakoano ka ihina koa kupompoko'ala ba te'opia mia inso i olodo. 23Luwuakoano andio kuweweuo hangano Lele Mawongkoa, ka kupohawe tia i larono.
24Nahi imento'orioke, nine a mpetandia luwuno anu ntewinso mpetonda mpelulu, sine asa mia koa anu mohawe tambo? Onaemo pu'uno impelulumo kanatuu, ranta ka imehaweo! 25Sompo-sompo mia anu metonda a mpetandia, ka ipokompeteao koroino a luwuakoano. Domeweweuo kanandio ka dompohawe ramba-ramba ulu anu ta tampula, sine ontae ka tompohawe ramba-ramba ulu anu nahina tampulaano. 26Onaemo pu'uno nahi kupelulu tewala nahina tinunggaiku ka ongkue komba puu mpetidu anu mondeenomo koa metunduhi. 27Sine kupokoleleoo koroiku ka pabawaio luwuno, ka umariku paleleako ira mia susua Lele Mawongkoa, ka ongkue isa'a nahi tinarima.
Currently Selected:
1 KORINTI 9: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
