1 KORINTI 15
15
Pewangu-Do i Kerisituu
15:1-11
1Ka kandio-andio, pepaekompo, aku mopoto'oriakomiu Lele Mawongkoa anu kupaleleo ndi omiu ka anu tinarimamiu, ka onaemo ka imemoroso mpentade. 2Hangano Lele Mawongkoa atuu ka imengkinadudui, poolo ka impe'ini moroso ndi onae kana anu kupaleleakomiumo – sangkadio tewala nahina tuduno impompe'ala-ala. 3#Yes. 53:5-12 Hangano anu lalu i wawonoako kupohaweakomiumo, onaemo hapa anu kutarimaomo ongkueku, onaemo nine Ondae i Kerisituu mate Iramo hangano luwuno halato, menunu saru Wunta Mempori, 4#Pud. 16:8-10; Mat. 12:40; Tin. 2:24-32 nine kinaburu Iramo, ka nine mewangu Iramo, a oleo anu ko'otolu, menunu saru Wunta Mempori; 5#Mat. 28:16-17; Mrk. 16:14; Luk. 24:34-36; Yoh. 20:19 nine mepopokita Iramo ndi Kepa ka i'amba a hopulu ka orua ana guru-Do. 6Umarino atuu mepopokita Ira a mpepaekompo torea lima etu mia pohona koa; hadio inso ndi ondae da mentuwu ira hawe kanandio-andio, sine ba opia ira i olodo memate iramo. 7Ka Do'amba mepopokita ndi Yakobu, umarino atuu a luwudo tinena. 8#Tin. 9:3-6 Ka anu pokotompaano ntu'u inso a luwuno mepopokita Ira mbo'u ndi ongkue, mengkena kana a nana'ote anu hina napi tempono. 9#Tin. 8:3 Hangano ongkuemo anu lalu i totono inso a luwuno tinena, tendeano nahi pototoku nineeako tinena, hangano kubobarasai iramo bawaa-Do Ue Ala. 10Sine hangano pompehohawa-Do Ue Ala ka kugagi kana teweweuku kanandio-andio, ka pe'aroa anu Doweeakune komba tetadi-tadi mpena. Tendeano laluaopo pe'iseiku mo'angga sekonopo luwudo; sine komba hangano ongkue, tendeano pompehohawa-Do Ue Ala anu kumongkomi aku. 11Onaemo pu'uno, moiko ongkue, maupo ondae, kanandiomo kimpompaguru ka kanandiomo ka impompe'ala-ala.
Pewanguato
15:12-34
12Gaagi, tewala kimempaleleo, nine Ondae i Kerisituu winangu inso i olodo mia mate, kana'umpeke ka ihina i olomiu anu motae, nine nahina pewangudo mia mate? 13Tewala nahina pewangudo mia mate, ka Ondae mbo'u i Kerisituu nahi Ira winangu. 14Sine tewala nahi Dowinangu i Kerisituu, nahina tuduno pompalelemami ka nahina mbo'u tuduno pompe'ala-alamiu. 15Ka mbo'u mengkaa mpegaupi kami ndi Ondae Ue Ala, hangano mongkona Ondae pinaumami, nine Dowangu Iramo i Kerisituu – kahinaano nahi Dowangu Ira, tewala mentee, nine mia mate nahi domewinangu. 16Hangano tewala mentee mia mate nahi domewinangu, asalakono Ondae mbo'u i Kerisituu nahi Dowinangu. 17Ka tewala Ondae i Kerisituu nahi Dowingu, nahina tuduno pompe'ala-alamiu ka da komiu mentuwu a laro halamiu. 18Kanandiomo memasola ira koa mbo'u anu memate mpompe'ala-ala ndi Ondae i Kerisituu. 19Tewala butu a laro ntumuwu andio topomperorohi ndi Ondae i Kerisituu, ka ontaemo mia anu tedoa me'urasa'o inso a luwuno mia.
20Sine anu mentee onaemo, nine Ondae i Kerisituu winangu Iramo inso i olodo mia mate, gagi anu amba-ambano inso a mia anu memate iramo. 21Hangano mengkena kana matea hawe hangano asa mia, kanandio koa mbo'u pewangudo mia mate hawe hangano asa mia. 22Hangano mengkena kana luwuno mia mate a ntepo'asaa saru i Adama, kanandio koa mbo'u luwuno mia ira wali mentuwu a ntepo'asaa saru Ondae i Kerisituu. 23Sine sompo-sompo mia montonda potudano: anu amba-ambano Ondae i Kerisituu; umarino atuu ondae anu gagi mia-Do i tempono hawea-Do. 24Ka i'amba hawe pokotompaano, onaemo tewala Dopeweengakonomo Poparentaa ndi Ondae Ue Ala Ama, umari-Do mokotampulao luwuno poparentaa, pabawa ka roso. 25#Pud. 110:1 Hangano asalakono Ira meparenta gagi Mokole hawe ka Donaa ira Ue Ala luwuno iwali-Do a ntoto ngkaru-Do. 26Iwali anu poko'ariano, anu pinokotampula onaemo matea. 27#Pud. 8:7 Hangano luwuakoano Donangiomo a ntoto ngkaru-Do. Sine tewala pinau, nine ”luwuakoano ninangiomo,” ka mengkaaomo, nine Ondae-Do isa'a anu numangio luwuakoano a ntoto ngkaru-Do i Kerisituu atuu nahi tewinso i larono. 28Sine tewala luwuakoano ninangiomo a ntoto pabawa-Do i Kerisituu, Ondae isa'a anu Ana Ira me'urumako a ntoto pabawa-Do, anu numangiomo luwuakoano a ntoto pabawa-Do, ka Dogagimo Ue Alano luwuno. 29Tewala komba kanandio, hapake tuduno wineweudo mia anu mebinaho tiado mia memate? Tewala mia mate nahi ta winangu, tembio ka domebehe mebinaho tiado mia anu memate iramo? 30Ka omami mbo'u – tembioke ka isompo tempo ka kimpo'ineeo koroimami a laro masolaa? 31Pepaekompo, sompo-sompo oleo kutepo'aroako matea. Hangano kupo'undeakomiu ndi Ondae i Kerisituu Yesu, Ueto, kupauo, nine mongkona andio mentee. 32#Yes. 22:13 Tewala butu koa me'empehiako luwuno pontimbangano mia kupelulukuakonomo kondehora lambaha i Epesu, hapake tuduno anu kanatuu ndi ongkue? Tewala mia mate nahi domewinangu, ka ”aiwamo ka tompongkaa ka mpo'inu, hangano tisomo kita memate.” 33Si ntepopo'oo: Mompewali-waliako anu mosa'o sumosa'orio gau anu moiko. 34Iwali mpewowoloo temoi-moiko ka si mpoweweu mbo'u hala! Hinao i olomiu anu nahi to'ori Ira Ue Ala. Mongkona andio kupauo, ka intekoko'ii koa.
Pewanguno koroi
15:35-58
35Sine bara'ura hinao mia anu mesikeno, ”Kana'umpeke domewinangu mia mate? Ka koroi kana'umpeke ba dowali mehawe?” 36Hei mia monge-monge! Hapa anu rinawomu omuemu, nahi ta tuwu, ba nahi mate ari. 37Ka anu rinawomu komba koroino pinopaho anu ta tuwu, sine wukuno anu nahina kulino, kana wukuno gandu ke wukuno anu susua. 38Sine Ondae Ue Ala moweeako aasa koroi, kana po'ehe-Do: Sompo-sompo wuku mpinopaho Dopoweeakono koroino. 39Komba mengkena luwu ihi: ihino mia susua sekono bauno pinotuwu, susua sekono bauno manu-manu, susua sekono bauno bou. 40Hinao koroi nsuruga ka hinao koroi ntolino, sine marambano koroi nsuruga susua sekonopo marambano koroi ntolino. 41Marambano mata oleo susua sekonopo marambano wula, ka marambano wula susua sekonopo marambado anano wula, ka marambano anano wula anu aasa teposisingge saru marambano anano wula anu mehano. 42Kanandio koa mbo'u teweweuno saru pewangudo mia mate. Rinawo a laro masolaa, winangu a laro anu nahi ta masola. 43Rinawo a laro mokoburua, winangu a laro marambaa. Rinawo a laro molemaa, winangu a laro morosoa. 44Anu rinawo onaemo koroi ntolino, anu winangu onaemo koroi rohani.
Tewala hinao koroi ntolino, ka hinao mbo'u koroi rohani. 45#Teg. 2:7 Kana hinao teburi, ”Mia amba-ambano, i Adama pinokogagi hinao penaano anu tuwu,” sine i Adama anu pokotompa gagi penaa anu mompotuwu. 46Sine anu hawe amba-ambano komba anu rohani, sine anu tolino; lembuino ka i'amba hawe anu rohani. 47Mia amba-ambano te'inso a awu wita ka mekoroi ntolino, mia anu ko'orua te'inso i suruga. 48Luwuno anu mentuwu i wawontolino mengkena saru onae anu te'inso a awu wita ka luwuno anu mentuwu i suruga mengkena kana Ondae anu te'inso i suruga. 49Mengkena kana ontae mperupaako kitamo anu inso i wawontolino, kanandio koa mbo'u kita mperupaako anu inso i suruga. 50Pepaekompo, ndiomo anu aku pauakomiu, onaemo nine ihi ka rea nahi pohawe tia a laro Poparentaa-Do Ue Ala ka nine anu mate nahi pohawe tia a hapa anu nahina tampulaano. 51#1Tes. 4:15-17 Menteeano kupokomengkaao ndi omiu aasa rahasia: nahi kita memate luwu, sine kita mebinali luwu, 52i larono asa mpiniro, i tempono unino tawuwua pokotompa. Hangano tawuwua ta pino'uni ka mia memate ira mewinangu a ngkoroi anu nami ta mate ka kita mebinali luwu. 53Hangano anu ta tampula andio asalakono mompokona anu nahi ta tampula, ka anu ta mate andio asalakono mompokona anu nahi ta mate. 54#Yes. 25:8 Ka umarino anu ta tampula andio mompokona anu nahi ta tampula ka anu ta mate andio mompokona anu nahi ta mate, ka tamo inihii pau-Do i Ue anu teburi,
”Matea tineleomo a mpoponangia.
55 #
Hos. 13:14
Hei matea isuaomoke poponangimu?
Hei matea, isuaomoke sengumu?”
56Senguno matea onaemo hala ka pabawano hala onaemo songka Taura. 57Sine inunde-unde Iramo Ue Ala, anu moweeakitamo poponangia hangano Ondae i Yesu Kerisituu, Ueto. 58Onaemo pu'uno, pepaekompo anu pinehohawaku, impentademo temoroso, si ntelelu, ka impeteahako mpiha a anggaa-Do i Ue! Hangano imento'orio, nine a ntepo'asaa saru Ondae i Ue pe'iseimiu nahi tetadi-tadi.
Currently Selected:
1 KORINTI 15: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
