1 KORINTI 12
12
Mperupa-rupa pompowee sine aasa koa Penaa
12:1-11
1Kanandio-andio mongkona luwuno pompowee-Do Penaa. Ineheku, pepaekompo luwu-luwu, ka imento'orio menteeano. 2Imento'orio, nine i tempono napi imento'ori Ira Ue Ala, nahi konde impompewowolo mempinadii komiu a luwuno lahumoa anu beebe. 3Onaemo pu'uno ka kupauakomiu, nine nahina maupo te'asa mia anu mepau hangano Penaa-Do Ue Ala, mokompotae, ”Tetotonaa Iramo i Yesu!” ka nahina maupo te'asa mia, anu mokomangaku, ”Ondae i Yesu Ue,” sangkadio hangano Penaa Mempori.
4 #
Rom. 12:6-8
Hinao mperupa-rupa pompowee, sine aasa koa Penaa. 5Ka hinao mperupa-rupa pompekakaako, sine Ondae i Ue aasa koa. 6Ka hinao mperupa-rupa wineweu kinohali-haliako, sine Ondae Ue Ala aasa koa anu umanggao luwuno a laro luwuno mia.
7Sine a sompo-sompo mia pinoweeako mengkaa-Do Penaa gagi moikoado luwu. 8Hangano a mia anu aasa Ondae Penaa moweeakono pompowee ka ipepauako ponto'ori anu mentee, ka a mia anu susua Ondae Penaa anu mengkena moweeakono pompowee ka ipepauako ponto'ori mompewowolo. 9A mia anu aasa Ondae Penaa anu mengkena moweeakono pompe'ala-ala, ka a mia anu susua Dopoweeakono pompowee ka ipompokotompa. 10A mia anu aasa Ondae Penaa moweeakono pabawa ka ipoweweu anu kinohali-haliako, ka a mia anu susua Dopoweeakono ka ipompau anu ta gagi, ka a mia anu susua mbo'u Dopoweeakono pompowee ka iponto'ori mosisalao mperupa-rupa penaa. A mia anu aasa Dopoweeakono pompowee ka ipepauako mperupa-rupa pau, ka a mia anu susua Dopoweeakono pompowee ka iponto'ori pauo pengkonaano mperupa-rupa pau atuu. 11Sine luwuno andio Do'anggao Penaa anu aasa ka anu mengkena, anu moweeako ira pompowee a sompo-sompo mia anu tepakosi, kana anu inehe-Do.
Hadio parewa, sine aasa koroi
12:12-31
12 #
Rom. 12:4-5
Hangano mengkena kana koroi atuu aasa ka parewano hadio, ka luwuno parewa atuu, maupo hadio, me'asa ngkoroi koa, kanandio koa mbo'u Ondae i Kerisituu. 13Hangano a laro aasa Penaa luwuto, moiko to Yahudi, maupo to Yunani, moiko ata, maupo mia maradeka, mebinaho kitamo luwu gagi asa ngkoroi ka luwuto mempinopo'inu inso a aasa Penaa.
14Hangano koroi mbo'u komba butu aasa parewano, sine hadio parewano. 15Tewala motae karu, ”Hangano ongkue komba kae, nahi kutewinso a ngkoroi,” gaagi menteeke nahi tewinso a ngkoroi? 16Ka tewala motae biri, ”Hangano ongkue komba mata, nahi kutewinso a ngkoroi,” gaagi menteeke nahi tewinso a ngkoroi? 17Tewala asa ngkoroi onaemo mata, isuaomoke poronge? Tewala luwuno gagi biri, isuaomoke powoo? 18Sine Ondae Ue Ala moweeako iramo po'iangado nte'o'asa parewa a ngkoroi kana po'ehe-Do. 19Tewala luwuno onaemo aasa parewa, isuaomoke koroi? 20Lano hadio parewano, sine koroi aasa koa.
21Gaagi mata nahi ta motaeakono kae, ”Nahi kukereko.” Ka ulu nahi ta motaeakono karu, ”Nahi kukereko.” 22Tendeano luwuno parewa ngkoroi anu tengkita lalu molema, anu tedoa kinere. 23Ka a luwuno parewa ngkoroi anu montonda pongkitato makura ipinelangkai, tompoweeakono pompelangkai susua. Ka a luwuno parewa ngkoroito anu nahi tekosi, onae lalu tompekakaakono. 24Pompekakaako kanatuu nahi domengkereo parewa ngkoroito anu tekosi. Kanatuumo Dopotudao Ue Ala koroito, ranta a luwuno parewa ngkoroito anu nahi maramba pinoweeako pompelangkai susua, 25ka si gagi teposisalaa a laro ngkoroi, sine ka domambe pekakaako luwuno parewa anu nteposisingge atuu. 26Onaemo pu'uno tewala aasa parewa anu mompemahaki, luwuno parewa mpetonda mpompemahaki; tewala aasa parewa pinelangkai, luwuno parewa ntetonda mawongko.
27Omiumo luwu koroi-Do i Kerisituu ka omiu singge mia parewa ngkoroi-Do. 28#Eps. 4:11 Ka Dopakosiomo Ue Ala ba opia mia a laro bawaa: ko'aasa gagi tinena, ko'orua gagi nabi, ko'otolu anu mompaguru. Ka i'amba ondae anu mpohawe pompowee ka dompoweweu anu kinohali-haliako, ka dompompokotompa, ka dompompekakaako, ka dompetewawa, ka dompepauako pau penaa. 29Luwudoke tinena, ke nabi, ke anu pompaguru? Luwudoke mpohawe pompowee mpoweweu anu kinohali-haliako, 30ke ka dompompokotompa, ke ka dompepauako pau penaa, ke ka dompompau pengkonaano pau penaa?
31Gaagi impeteahakomo ka imehawe ira pompowee anu lalu moiko. Ka aku montisoakomiu sala anu lalu moiko mbo'u.
Currently Selected:
1 KORINTI 12: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
