1 KORINTI 11
11
1 #
1Kor. 4:16; Plp. 3:17 Imetonda akumo, mengkena koa mbo'u kana ongkue metonda ndi Ondae i Kerisituu.
Ramba-ramba uluno beine
11:2-16
2Asalakono ku'unde-unde komiu, hangano a laro luwuakoano impewowolo aku mpiha ka mpe'ini moroso a pompaguru anu kupotilaloakono ndi omiu. 3Sine ineheku, ka imento'orio mongkona andio, onaemo petewawano sompo tama Ondaemo i Kerisituu, petewawano beine onaemo tama ka petewawa-Do i Kerisituu onaemo Ondae Ue Ala. 4Sompo-sompo tama anu mekakai ke mompau anu ta gagi saru kongko tutuwi uluno, ipokoko'iio uluno. 5Sompo-sompo beine anu mekakai ke mompau anu ta gagi ka nahi tutuwio uluno, ipokoko'iio uluno, hangano onae mengkena saru beine anu kineru wuuno. 6Hangano tewala beine nahi behe tumutuwio uluno, asalakono ka igontio koa mbo'u wuuno. Sine tewala a beine onaemo mokoko'iia, nine wuuno ginonti ke kineru, ka asalakono ka itutuwio uluno. 7#Teg. 1:26-27 Hangano tama siimo itutuwio uluno: onae mewantahiako gambara ka maramba-Do Ue Ala. Sine beine mewantahiako marambano tama. 8#Teg. 2:18-23 Hangano tama komba te'inso a beine, sine beine te'inso a ntama. 9Ka tama komba pinokogagi hangano beine, sine beine pinokogagi hangano tama. 10Onaemo pu'uno, beine asalakono ka ipompokona petondoni pabawa a uluno hangano luwuno mala'eka. 11Sine maupo kanandio, ndi Ondae i Ue nahina beine ba nahina tama ka nahina tama ba nahina beine. 12Hangano mengkena kana beine te'inso a ntama, kanandio koa mbo'u tama ipe'anaakono beine; ka luwuakoano te'inso ndi Ondae Ue Ala.
13Imentimbangaomo liomiu: Metoto koake beine mekakai ndi Ondae Ue Ala ba nahi tutuwio uluno? 14Kombake wawontolino isa'a mokomengkaa ndi omiu, nine onaemo tataano tama, tewala onae mewuu ondau, 15sine a beine onaemo pelangkaino, tewala onae mewuu ondau? Hangano wuu wineeako beine gagi petutuwino.
16Sine tewala hinao mia anu mingki mengengeakono, omami maupo luwuno bawaa-Do Ue Ala komba kimeleleoakono anu kanandio.
Luwuno gau anu sala a pelimbua wongi
11:17-34
17Sine a luwuno atora anu tudano nahi kupolio umunde-unde komiu, hangano luwuno tepotowoamiu nahi powawa moikoa, sine mowawa mosa'oa. 18Hangano amba-ambano kurongeo, nine tewala ntepumpu komiu a tempumpua bawaa, hinao teposisalaa i olomiu, ka mongkona atuu tedei hadio kupe'ala-alao. 19Hangano i olomiu hinao teposisalaa, ka imengkaa lembuino isema i olomiu anu mokompompetea. 20Tewala ntepumpu komiu, komba ntepumpu komiu pongkaa a pelimbua-Do i Ue. 21Hangano a pelimbua atuu sompo-sompo mia kumaano se'elu kaangano onaeno, onaemo ka imokoninggo anu asa mia ka anu mehano molangu. 22Nde nahinake lano rahamiu ka impongkaa ka mpo'inu? Ke inehemiu tokoa mokongkodei ira bawaa-Do Ue Ala ka mokoko'ii ira mia anu nahina hapa-hapado? Hapake anu kupauakomiu? Umunde-unde komiu? Anu kanandio komba ku'unde-undeo.
23Hangano hapa anu kupohaweo ndi omiu, kutarimaomo inso ndi Ondae i Ue, onaemo nine Ondae i Ue Yesu, a wongi tempono Dopineweengako, mo'ala Ira roti 24ka umarino atuu Dopontarimakasiakono; Dosiba-sibao ka Dopotae, ”Ndiomo koroi-Ku, anu pineweengako hangano omiu; imeweweuomo andio gagi rorambe-Ku!” 25#Pel. 24:6-8; Yer. 31:31-34 Kanandio koa mbo'u Do'alao tonde, umari-Do mongkaa, ka Do'amba motae, ”Tonde andio onaemo pedandia wo'ohu anu tinondoniako rea-Ku; imeweweuomo andio, sompo ime'inuo, gagi rorambe-Ku!” 26Hangano sompo impongkaa roti andio ka mpo'inu a ntonde andio, imempaleleo matea-Do i Ue ranta ka Dohawe. 27Gaagi ba isema anu nahi pototono ka ipongkaa roti ke mo'inu a ntonde-Do i Ue, onae tehala a ngkoroi-Do ka rea-Do i Ue. 28Onaemo pu'uno sompo-sompo mia ka iparesao koroino onaeno ka i'amba umarino atuu ikaano roti ka mo'inu inso a ntonde atuu. 29Hangano ba isema mongkaa ka mo'inu nahi tuduo koroi-Do i Ue, moweweuomo hukuno koroino. 30Onaemo pu'uno hadio i olomiu anu molema ka mahaki, ka komba tedei anu mate. 31Tewala toparesao koroito ontaeto, nahi alu kita pohuku. 32Sine tewala montarima kita pohuku inso ndi Ondae i Ue, mempinaguru kita, ka si tomehinuku meronga saru wawontolino.
33Onaemo pu'uno, pepaekompoku luwu-luwu, tewala komiu mpepumpu mpongkaa, imambesikori koa. 34Tewala hinao mia anu mokoninggo, laluopo ka ipongkaa ari i rahano, ka si mpepumpu ka imehinuku. Mongkona anu mehano ka ku'amba umatorao, ba kuhawe.
Currently Selected:
1 KORINTI 11: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
