1 KORINTI 1
1
Tabea
1:1-3
1Inso ndi Paulu, anu hangano po'ehe-Do Ue Ala pinoboi gagi tinena-Do i Kerisituu Yesu, ka inso ndi Sositene, pepaekompoto, 2#Tin. 18:1 a bawaa-Do Ue Ala i Korinti, onaemo ondae anu pinokomempori ndi Ondae i Kerisituu Yesu ka anu mempinoboi gagi mia memempori, saru luwuno mia a luwuno po'ianga, anu mpebooli a nee-Do Ueto i Yesu Kerisituu, onaemo Uedo ka Ueto. 3Pompehohawa ka rodoa inso ndi Ondae Ue Ala, Amato, ka inso ndi Ondae Ue Yesu Kerisituu kumongkomi komiu.
Pontarimakasi
1:4-9
4Montarimakasi aku mpiha ndi Ondae Ue Alaku hangano omiu a mpe'aroa-Do Ue Ala anu Doweeakomiu ndi Ondae i Kerisituu Yesu. 5Hangano ndi Ondae gagi komiumo mengkaea a luwuakoano: a laro mperupa-rupa pinau ka mperupa-rupa ponto'ori, 6menunu saru ponsakosii mongkona Ondae i Kerisituu, anu pinokomorosoomo i olomiu. 7Kanandiomo omiu nahi memakuraako maupo te'asa pompowee kontongaamiu mensikorio hawe-Do Ueto i Yesu Kerisituu. 8Ira koa mbo'u mokoroso komiu hawe a mpoko'ariano, ranta nahina tataamiu a oleo-Do Ueto i Yesu Kerisituu. 9Ondae Ue Ala, anu moboi komiu a ntepo'asaa saru Ana-Do i Yesu Kerisituu, Ueto, anu nahi bali.
Teposisalaa a laro bawaa
1:10-17
10Sine ku'oliwi komiu, pepaekompo, a nee-Do Ueto i Yesu Kerisituu, ka impe'asa mpau ka si hina teposisalaa i olomiu, sine tendeano ka imemoroso ntepo'asa ka mpe'asa aroa mpe'asa pompewowolo. 11Hangano, pepaekompoku, domempauakunemo mia inso a nsomborino i Keloe mongkona omiu, nine hinao teposisalaa i olomiu. 12#Tin. 18:24 Anu tinooku onaemo, nine singge komiu mpotae: Ongkue inso a binawaano i Paulu. Ke ongkue inso a binawaano i Apolo. Ke ongkue inso a binawaano i Kepa. Ke ongkue inso a binawaa-Do i Kerisituu. 13Nde tetia-tia Irake i Kerisituu? Nde pinaso a ngkeu pinotambake i Paulu hangano omiu? Ke mebinaho komiuke a neeno i Paulu? 14#Tin. 18:8; 19:29; Rom. 16:23 Montarimakasi aku nine nahina maupo te'asa mia i olomiu anu binahoku sangkadio i Kerisipu ka i Gayusi, 15onaemo ka nahina mia anu mokompotae nine mebinaho komiu a neeku. 16#1Kor. 16:15 Somborino mbo'u i Setepanu ongkue anu baho ira. Sangkadio ondae nahi kuto'orio, bara'ura hinao mbo'u mia anu binahoku. 17Hangano Dotena aku i Kerisituu komba ka kupobaho, sine ka kupaleleo Lele Mawongkoa; ka maupo atuu komba saru ponto'ori pau, ka imentudu koa keu pinotamba-Do i Kerisituu.
Ponto'ori-Do Ue Ala ka ponto'orino mia
1:18–2:5
18Hangano pompalele mongkona keu pinotamba onaemo lano monge-mongedo anu ira memate, sine ndi ontae anu mengkinadudui pompalele atuu onaemo moroso-Do Ue Ala. 19#Yes. 29:14 Hangano hinao teburi,
”Aku rumopuo ponto'orido mia mponto'ori
ka pandedo mia anu pande mposongka Aku mokotampulao.”
20 #
Ayb. 12:17; Yes. 19:12; 33:18; 44:25 Isua iramoke mia mponto'ori? Isua iramoke guru agama? Isua iramoke mia marampengenge inso i wawontolino andio? Kombake Doweweuomo Ue Ala ponto'orino wawontolino andio gagi monge-mongea? 21Hangano a laro ponto'ori-Do Ue Ala, wawontolino nahi to'ori Ira Ue Ala mesala a ponto'orino, onaemo ka Dopemoikoo Ue Ala kumadudui ira anu mpompe'ala-ala hangano monge-mongea pompalelea Lele Mawongkoa. 22To Yahudi mpo'ema petondoni ka to Yunani mpo'ungke ponto'ori, 23sine omami mempalele Ira i Kerisituu anu pinaso a ngkeu pinotamba: a nto Yahudi aasa watu tetidua ka a mia komba to Yahudi aasa monge-mongea, 24sine ndi ondae anu mempinoboi, moiko to Yahudi, maupo mia komba to Yahudi, Ondae i Kerisituu onaemo moroso-Do Ue Ala ka ponto'ori-Do Ue Ala. 25Hangano anu monge-monge inso ndi Ondae Ue Ala langkaiopo ponto'orino sekono mia ka anu molema inso ndi Ondae Ue Ala morosoopo sekono mia. 26Impewowoloomo koa, pepaekompo, ba kana'umpe teweweumiu, tempono imempinoboi: montonda posongkado mia komba hadio mia anu pande mosongka, sine hadio mia anu hinao pabawano, komba hadio mia anu mentinudu. 27Sine hapa anu pinemonge-mongeno wawontolino, Dobiniki ira Ue Ala ka dopokoko'ii ira mia anu mponto'ori, ka hapa anu pinemolemano wawontolino, Dobiniki ira Ue Ala ka dopokoko'ii ira anu memoroso, 28ka hapa anu nahi tinudu ka anu pinokongkodei i wawontolino, Dobiniki ira Ue Ala, maupo hapa anu nahina pengkonaano, Dobiniki ira Ue Ala ka dome'oninio hapa anu hinao pengkonaano, 29ka si hina maupo te'asa mia anu mawongko i aro-Do Ue Ala. 30Sine hangano Ondae ka imekongko ndi Ondae i Kerisituu Yesu, anu hangano Ondae Ue Ala gagiomo ponto'orito anu mentee. Ondae mompokomentee, mompokomempori ka tumolosi kita. 31#Yer. 9:24 Onaemo pu'uno kana hinao teburi, ”Ba isema anu mawongko, po'ineeomo ka imawongko ndi Ondae i Ue.”
Currently Selected:
1 KORINTI 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
