1 KORINTI 2
2
1Kanandio koa mbo'u, tempono kuhawe ndi omiu, pepaekompo, komba ndio aku hawe saru pau anu tekosi ke saru ponto'ori ka kupohaweakomiu ponsakosii-Do Ue Ala. 2Hangano kupakosiomo ka si kuponto'ori hapa-hapa i olomiu sangkadio Ondae i Yesu Kerisituu, onaemo Ondae anu pinaso a ngkeu pinotamba. 3#Tin. 18:9 Hawe akumo ngkuda ndi omiu a laro molema ka tedoa doito ka mondidi-ndidi. 4Moiko pinauku maupo pompaleleku komba kupohaweakono pau ponto'ori anu ta pine'ala-ala, sine saru pompe'ala-ala a roso-Do Penaa, 5ka si pompe'ala-ala miu momperorohi a ponto'orino mia sine a roso-Do Ue Ala.
Ponto'ori anu mentee
2:6-16
6Maupo kanandio kimempaleleo ponto'ori i olodo anu morosoomo pompe'ala-alado, onaemo ponto'ori anu komba inso i wawontolino andio, ka komba inso a anu mempabawa i wawontolino, onaemo luwuno anu pabawa anu ira mempinokotampula. 7Sine anu pinalelemami onaemo ponto'ori-Do Ue Ala anu tewuni ka anu nahi teto'ori, anu napi pinokogagi wawontolino, Dopatindaomo Ue Ala pokomarambato. 8Nahina anu pabawa i wawontolino andio tumo'orio, hangano bakanaano domento'orio, nahi domempaso Ira i Ue anu maramba a ngkeu pinotamba. 9#Yes. 64:4 Sine kana hinao teburi,
”Hapa anu nahi hori kumitao mata, ka nahi hori rumongeo biri, ka anu nahi hori me'umbaako i laro aroano mia: luwuno anu pinatinda-Do Ue Ala tiado anu mehohawa Ira.”
10Hangano ndi ontae Dopokomengkaaomo Ue Ala hangano Penaa, hangano Penaa mepenteeo luwuakoano, maupo mongkona anu tewuni mongkona Ondae Ue Ala. 11Isemake i olodo mia anu tumo'orio, hapa anu kongko i laro aroano mia sangkadio penaano onaeno mia anu kongko i larono? Kanandio koa mbo'u nahina mia anu tumo'orio, hapa anu kongko i laro aroa-Do Ue Ala sangkadio Penaa-Do Ue Ala. 12Komba penaa i wawontolino tompontarima, sine Penaa anu te'inso ndi Ondae Ue Ala, ka tomento'orio, hapa anu Doweeakita Ue Ala. 13Ka hangano mpompau kami pengkonaano mongkona penaa ndi ondae anu hinao Penaa, mpepauako kami pau anu komba kimempinaguruako ponto'orino mia, mongkona luwuno pompowee-Do Ue Ala. 14Sine mia tuwu ntolino nahi pontarima hapa anu te'inso a Mpenaa-Do Ue Ala, hangano ndi onae mongkona atuu onaemo aasa monge-mongea; ka nahi pokonto'orio, hangano mongkona atuu butu pinokonto'ori montonda rohani. 15Sine mia rohani mokonto'orio luwuakoano, sine onae isa'a nahi domentuduo mia susua. 16#Yes. 40:13 Hangano, ”isemake tumo'orio pinewowolo-Do i Ue, ranta ka ipokopompauako Ira?” Sine omami hinao pinewowolo-Do i Kerisituu.
Currently Selected:
1 KORINTI 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
