1 Tawarika 15

Burua-Do i Ue linimba i Yerusale

15:1–16:6

(2Sam. 6:12-23)

1I Daudi wangu ira raha langkai tiano koroino i kota Daudi. Ka i'amba mompatinda po'iangano Burua-Do Ue Ala ka mompasaakono kema. 2#Win. 10:8I tempo atuu motae i Daudi, ”Si hina anu tumandeo Burua-Do Ue Ala sangkadio to Lewi, hangano ondaemo anu bininiki-Do i Ue mentandeo Burua-Do i Ue ka mekakaako Ira hawe nahina tampulaano.”

3Ka i'amba i Daudi pumpu ira luwu to Isaraeli melako i Yerusale mentandeo Burua-Do i Ue a mpo'ianga anu ipatindaakonomo atuu. 4I Daudi pumpu ira inuleno i Haruni ka to Lewi: 5inso a inuleno i Kehati: i Urieli, petewawano ka pe'etuno, anu porokono asa etu ka rua pulu mia; 6inso a inuleno i Merari: i Asaia, petewawano ka pe'etuno anu porokono rua etu ka rua pulu mia; 7inso a inuleno i Geresoni: i Yo'eli, petewawano ka pe'etuno anu porokono asa etu ka tolu pulu mia; 8inso a inuleno i Elisapani: i Semaya, petewawano ka pe'etuno anu porokono rua etu mia; 9inso a inuleno i Heberoni: i Elieli, petewawano ka pe'etuno anu porokono halu pulu mia; 10inso a inuleno i Usieli: i Aminada, petewawano ka pe'etuno anu porokono asa etu ka hopulu ka orua mia.

11Ka i'amba i Daudi moboio i Sadoki ka i Abiata, orua ira sando mpesomba atuu ka luwuno to Lewi, onaemo i Urieli, i Asaia, i Yo'eli, i Semaya, i Elieli ka i Aminada. 12Ipotaeako ira, ”Omiumo petewawa a mpepe'etuado to Lewi. Impokomemporiomo koroimiu, omiu ka luwuno pepaekompomiu, kai mentandeo Burua-Do i Ue, Ue Alado to Isaraeli a mpo'ianga anu kupatindaomo atuu. 13Hangano omiu nahi mehawe a amba-ambano, onaemo ka Dotiu kita i Ue, Ue Alato, hangano nahi tompo'ema pontiso-Do kana'umpe anu asalakono.” 14Ka i'amba luwuno sando mpesomba ka to Lewi mpokomemporio koroido ka domentandeo Burua-Do Ue Ala to Isaraeli. 15#Pel. 25:14 Ka i'amba inuleno i Lewi mentadeakono keu ponsela Burua-Do i Ue Ala atuu a wawo oweado, kana anu iparentaako ira i Musa, montonda pau-Do i Ue.

16I Daudi parenta ira luwuno petewawado to Lewi atuu, ka dotena ira luwuno pepaekompodo puu mpenani ka dompenaniako temeroku penani mawongko tinondaako parewa mpenani, gambusu, katapi ka simbali. 17To Lewi atuu tumena ira i Hemani anano i Yo'eli ka i Asapi anano i Berekia inso i olono pepaekompono; i Etani anano i Kusaia inso a inuleno i Merari, luwuno pepaekompodo; 18ka luwuno mbo'u pepaekompodo inso a ntudano ko'orua: i Sakaria, i Beni, i Yaasieli, i Semiramoti, i Yehieli, i Uni, i Eliabi, i Benaia, i Maaseia, i Matitia, i Elipele, i Mikaneia ka i Obe-Edomi saru i Yeieli, luwuno puu mpodagai pewowa langkai. 19#Pud. 46:1Luwuno puu mpenani atuu, i Hemani, i Asapi ka i Etani, asalakono mpemaeakono simbali mala. 20I Sakaria, i Asieli, i Semiramoti, i Yehieli, i Uni, i Eliabi, i Maaseia ka i Benaia, asalakono mpemaeakono gambusu montonda penani Alamoti. 21I Matitia, i Elipele, i Mikaneia, i Obe-Edomi, i Yeieli ka i Asasia, asalakono mpemaeakono katapi montonda penani Anu Ko'oalu tumondao penani. 22I Kenanya, petewawado to Lewi mohawe anggaa pontandea; onae gagi petewawano pontandea, hangano onae tumo'orio mongkona atuu. 23I Berekia ka i Elikana, onaemo puu mpodagai pewowa i arono Burua; 24I Sebania, i Yosapati, i Netene'eli, i Amasai, i Sakaria, i Benaia ka i Elieseri, luwuno sando mpesomba atuu, mpopuuri napiri i arono Burua-Do Ue Ala; i Obe-Edomi ka i Yehia, onaemo puu mpodagai pewowa i arono Burua atuu. 25Ka i'amba i Daudi ka luwuno mia memota'u Isaraeli saru luwuno petewawa sorodadu asa nsowu memawongko ira melako me'alao Burua Pedandia-Do i Ue inso a rahano i Obe-Edomi. 26Hangano Dotulungi iramo Ue Ala to Lewi anu mpontande Burua Pedandia-Do i Ue atuu, pinesombaakoomo opitu sapi laki ka opitu bimba laki. 27I Daudi mompokona lemba meloe inso a nsawu lena alusu, kanatuu koa mbo'u luwudo to Lewi anu mentandeo Burua atuu ka luwuno puu mpenani saru i Kenanya gagi petewawado anu wawa ira puu mpenani. I Daudi mompake mbo'u lemba epo inso a nsawu lena. 28Luwudo to Isaraeli mewawao Burua pedandia-Do i Ue tinondaako peboo-booli ka unino tawuwua, napiri ka simbali saru pemaeno gambusu ka katapi. 29Tempono Burua-Do i Ue mewinso i kota Daudi, i Mikali ana beineno i Saulu, mentango inso a mpentangoa ka ikitao mokole Daudi melonso-lonso ka melense-lense mawongko. Onaemo pu'uno ipokongkodeio i Daudi i laro aroano.

Currently Selected:

1 Tawarika 15: XMZ

Highlight

Copy

Compare