1 Tawarika 14

Langkanae ka somborino i Daudi

14:1-7

(2Sam. 5:11-16; 1Taw. 3:5-9)

1I Hirami, mokole i Tirusi montena mia lumako ndi Daudi ka mo'oliwi mbo'u keu arasi, puu mpo'angga watu ka puu mpo'angga keu ka ira mpowanguakono asa langkanae. 2Ipokonto'oriomo i Daudi, nine Dopakosiomo i Ue onae gagi mokoledo to Isaraeli, hangano poparentaano tedoa pinelangkai hangano Isaraeli bawaa-Do. 3I Daudi mo'ala mbo'u ba opia kombiano i Yerusale, ka hinao mbo'u ana ntama ka beine. 4Ndiomo needo luwuno anano anu pine'anaako i Yerusale: i Samua, i Soba, i Natani, i Salomo, 5i Yibahari, i Elisua, i Elapele, 6i Nogahi, i Nepegi, i Yapia, 7i Elisama, i Beeliada ka i Elipele.

I Daudi numangi ira to Pelisiti

14:8-17

(2Sam. 5:17-25)

8Domerongeomo to Pelisiti, nine i Daudi inurapiomo gagi mokole a luwuno Isaraeli. Ka do'amba melako luwu to Pelisiti ira merakoo i Daudi. Rumongeo mongkona atuu, i Daudi lumako umaropi ira. 9Mansado mehawe to Pelisiti atuu ka dompesapoi i Lembono Repaimi, 10i Daudi mo'ema pontiso ndi Ondae Ue Ala, ipotae, ”Nde asalakonoke aku lumako umewai ira to Pelisiti ka nde Komiu meweengako irake a ngkaeku?” Pau-Do i Ue ndi onae, ”Lakomo, Aku koa meweengako ira a ngkaemu.” 11Ka i'amba i Daudi lumako i Ba'ala-Perasimi ka numangi ira i ra'ai. Motae i Daudi, ”Dorumpaiomo Ue Ala iwaliku molalo ongkue, kana uwoi anu morumpai.” Onaemo ka domeneeakono mia po'ianga atuu Ba'ala-Perasimi. 12To Pelisiti mebintao luwuno pinesombaido i ra'ai. Ka i'amba a mpetenano i Daudi, to Isaraeli mentunuo a api.

13Mansano to Pelisiti mposapoi mbo'u i lembono atuu, 14i Daudi wali mo'ema pontiso ndi Ondae Ue Ala, ka mepau Ira Ue Ala, ”Si melako i bungkudo, sine impelempamo kumadu ira, ranta kau pokosapoi ira te'aro inso a laro ngkeu murubei. 15I tempono urongeo unino lempa a untuno laro ngkeu murubei atuu, asalakono peluarakomo petea, hangano Ondae Ue Ala meluarako Iramo metea i aromiu numangi ira sorodadu to Pelisiti.” 16I Daudi weweuo kana parenta-Do Ue Ala ndi onae. Domenangi ira sorodadu to Pelisiti, mompu'u inso i Gibeoni hawe i Geseri. 17Onae ka itelelemo neeno i Daudi a luwuno wita ka gagi dinoitoako i olodo luwuno tongku.

Currently Selected:

1 Tawarika 14: XMZ

Highlight

Copy

Compare