1 Tawarika 16

1Burua-Do Ue Ala atuu winawa mewinso, ka i'amba ninaa i tonga-tongano kema anu pinasano i Daudi tiano atuu. Ka do'amba mpopesombaako pesomba tinunu ka pesomba tekaduduia i aro-Do Ue Ala. 2Mansano umari mpopesombaako pesomba tinunu ka pesomba tekaduduia, i Daudi rumonso ira tongku atuu a nee-Do i Ue. 3Ka i'amba sompo mia Isaraeli, moiko tama maupo beine, singge mia tiniaako asa roti bonggoli, asa hea bau ka asa mpole kukisi kisimisi.

4Ipotoro ira mbo'u inso a nto Lewi atuu ba opia mia gagi puu pompekakaako i arono Burua-Do i Ue kai pinebooliako nee-Do i Ue, Ue Alado to Isaraeli ka mpenaniako potarima kasi saru po'unde-unde ndi Ondae. 5Petewawano onaemo i Asapi ka mia ko'orua onaemo i Sakaria, ka i'amba i Yeieli, i Semiramoti, i Yehieli, i Matitia, i Benaya, i Obe-Edomi ka i Yeieli, anu memaeakono gambusu ka katapi, i Asapi anu memaeakono simbali. 6I Benaya ka i Yahasieli, orua ira sando mpesomba anu nahi dohori ineu mompuuri napiri i arono Burua Pedandia-Do Ue Ala.

Penani mpo'unde-undeno i Daudi

16:7-36

7Ia oleo mbo'u atuu, anu amba-ambano i Daudi tumenao i Asapi ka luwuno pepaekompono mpenaniako pontarimakasi ndi Ondae i Ue:

8 # Pud. 105:1-15 Pontarimakasimo ndi Ondae i Ue,

pebooliakonomo nee-Do, popoto'oriomo winewu-Do i olono luwuno tongku!

9Penaniako Iramo, unde-unde Iramo,

popauomo luwuno wineweu-Do anu kinohali-haliako!

10Impo'undemo a nee-Do anu mempori,

kai mawongkomo

aroado mia anu umungke Ira i Ue!

11Ungke Iramo i Ue ka roso-Do,

ungkeomo mpiha rupa-Do!

12Imerorambeomo luwuno wineweu-Do anu kinohali-haliako,

luwuno pabawa-Do ka luwuno pompakosi anu pinau-Do,

13oo! Ana'ueno i Isaraeli, tetenaa-Do,

oo! Luwuno anano i Yako, luwuno mia anu bininiki-Do!

14Ondaemo i Ue, Ue Alato,

i asa wawontolino melempa pompakosi-Do.

15Impewowoloomo pedandia-Do ranta nahina tampulaano,

pau anu pinakosi-Do tiano asa nsowu api ntumuwu,

16 # Teg. 12:7; 26:3 pedandia anu wineweu-Do saru i Burahima,

ka sumpa-Do ndi Saki,

17 # Teg. 28:13 anu pinokoroso-Do gagi pompakosi tiano i Yako,

gagi pedandia nahina tampulaano tiado to Isaraeli:

18Ndi omue ”Aku meweengakono wita Kana'a

gagi tia pusaka anu pinakosi tiamu.”

19Mansano nami domehadio,

asa bawaa mia mehawe i wita atuu,

20ka mpolio-lio inso a tongku lumako a tongku,

inso a asa poparentaa lumako a tongku susua,

21 # Teg. 20:3-7 Nahi Dopo'ineeo maupo te'asa mia mokonsii ira;

ka mopoto'oriako ira luwuno mokole, hangano ondae,

22”Si mensosanggoli ira mia inurapi-Ku,

ka si mpoweweu mosa'o a luwuno nabi-Ku!”

23 # Pud. 96:1-13 Impenanimo tia-Do i Ue, oo asa wawontolino,

paleleomo pongkadudui-Do sompo-sompo oleo.

24Tutuluomo maramba-Do i olono luwuno tongku

ka luwuno wineweu-Do anu kinohali-haliako i olono luwuno tongku.

25Hangano langkai pabawa-Do i Ue ka tedoa inunde-unde,

langkaiopo pabawa-Do sekono luwuno anu pinesombai susua.

26Hangano anu pinesombai susua luwuno tongku, butu lahumoa nahina pengkonaano,

sine Ondaemo i Ue anu mokogagio langi.

27Langkaia ka marambaa kongko i aro-Do,

roso ka mawongka kongko a mpo'ianga-Do.

28Weeako Iramo i Ue, oo luwuno tongku,

weeako Iramo i Ue marambaa ka roso!

29Weeako Iramo i Ue marambano nee-Do,

wawaomo pesomba ka pewinsomo pe'aro ndi Ondae!

Penggolontuumo pesombai Ira i Ue a maramba memporia.

30Impondendemo i aro-Do i Ue, oo asa wawontolino;

tolino montoro ntu'u, nahi telelu.

31Moikoomo langi mawongko ka tolino mpebooli mpo'unde,

moikoomo dompotae mia i olono luwuno tongku, ”Ondae i Ue atuu Mokole!”

32Moikoomo irundu tahi saru ihino,

moikoomo imawongko pada ka luwuno anu mo'ia i larono,

33humbee, moikoomo luwuno keu a ntobu domemawongko

i aro-Do i Ue, hangano hawe-Do mohuku tolino.

34 # Pud. 106:1; 47–48 # 2Taw. 5:13; 7:3; Esr. 3:11; Pud. 100:4-5; 106:1; 107:1; 118:1; 136:1; Yer. 33:11 Pontarimakasimo ndi Ondae i Ue, hangano moiko Ira!

Menteeano ranta nahina tampulaano petenunu ka pompehohawa-Do.

35Ka potaemo, ”Kadudui kamimo, oo Ue Ala, puu pongkaduduimami,

pumpu kamimo ka potola kamimo inso i olono luwuno tongku,

ka kimpotarimakasi a nee-Miu anu mempori,

ka mpo'unde a laro po'unde-unde ndi Omiu.”

36Inunde-unde Iramo i Ue, Ue Alado i Isaraeli,

inso i ndi'ipua hawe nahina tampulaano.

Ka i'amba luwuno bawaa mpotae, ”Ami! Unde-unde Iramo i Ue!”

Mpo'angga a mpesombaa

16:37-43

37I Daudi bintao i Asapi ka luwuno pepaekompono i ra'ai i arono Burua Pedandia-Do i Ue, ka dopompekakaako mpiha i arono Burua atuu, kana'umpe anu asalakono sompo oleo, 38tewinso mbo'u i Obe-Edomi ka nomo pulu ka oalu mia luwuno pepaekompono. I Obe-Edomi anano i Yedutuni ka i Hosa, onaemo puu mpodagai pewowa langkai.

39Sine sando mpesomba Sadoki ka luwuno pepaekompono, luwuno sando mpesomba, ibinta ira i arono Kema Mempori-Do i Ue, a mpesombaa i Gibeoni, 40ka dowela mpopesombaako pesomba tinunu ndi Ondae i Ue i wawono meda pontunua pesomba tinunu mo'oru ka ngkiniwia, menunu saru luwuno anu teburi i larono Taura-Do i Ue anu Doparentaako ira to Isaraeli. 41Meronga saru ondae kongko mbo'u i Hemani, i Yedutuni ka luwuno mia tebiniki susuano, anu neeno tiniso kai pontarimakasi ndi Ondae i Ue, ”Menteeano ranta nahina tampulaano petenunu ka pompehohawa-Do.” 42I Hemani ka Yedutuni, to'oriado napiri ka simbali pakeado luwuno puu mpemae, luwuno mbo'u parewa mpenani anu tumonda penani unde-unde-Do Ue Ala. Luwuno anano i Yedutuni medagaio pewowa langkai.

43 # 2Sam. 6:19-20 Umarino atuu mpekule iramo luwuno tongku atuu, singge mia lumako i rahano. I Daudi mbo'u mekule moweeako ira tabea poronso ndi ondae luwuno ihino rahano.

Currently Selected:

1 Tawarika 16: XMZ

Highlight

Copy

Compare