1 Tawarika 13

Burua-Do Ue Ala linimba inso i Kiriati-Yearimi

13:1-14

(2Sam. 6:1-11)

1I Daudi teriso saru luwuno petewawa sorodadu asa nsowu ka sorodadu asa etu saru luwuno mia pinemota'u. 2Mepau i Daudi a luwuno bawaa Isaraeli, ”Tewala impemoikoo ka tewala Dopemoikoo i Ue, Ue Alato, moikoomo tompotena mia a luwuno pepaekompoto anu da mpo'ia a witado to Isaraeli, ka a luwuno mbo'u sando mpesomba ka to Lewi anu mpo'ia a luwuno kota saru wita pompakambia, ka dontepo'asa saru ontae. 3Moikoomo tomewawao Burua-Do Ue Alato mekule ndi ontae, hangano tempono i Saulu nahi tomperioo.” 4Luwuno bawaa atuu mpotae nine ira meweweuo kanatuu, hangano pinewowolo atuu moiko a pongkitado luwuno tongku. 5#1Sam. 7:1-2Ka i'amba i Daudi pumpu ira luwuno to Isaraeli inso a ngkoro Sikori i Masiri hawe a nsala te'aro i Hamati, ka domewawao Burua-Do Ue Ala inso i Kiriati-Yearimi. 6#Pel. 25:22I Daudi ka luwuno to Isaraeli mpelungka melako i Ba'ala, melako i Kiriati-Yearimi anu tewinso wita Yehuda, ira mewawao inso i ra'ai Burua-Do Ue Ala, Ue anu mentoro i wawono kerubi, anu nee-Do pinebooliako i ra'ai. 7Dome'ulao Burua-Do Ue Ala atuu a laro ngkareta anu wo'ohu inso a rahano i Abinada, ka i'amba i Usa ka i Ahio mese'elungio kareta atuu. 8I Daudi ka luwudo to Isaraeli mpelense-lense i aro-Do Ue Ala tompaano rosodo, tinondaako penani, katapi, gambusu, rabana, simbali ka napiri.

9Tempono domehawe a mposesaano i Kidoni, i Usa tumasio kaeno ka uminio Burua atuu, hangano sapi atuudo telendo. 10Tensilaomo tekuda-Do i Ue ndi Usa. Dopepateo i Usa, hangano i'inio Burua atuu. Kanandiomo imate i ra'ai i aro-Do Ue Ala. 11Nahi pesanaao i Daudi hangano i Usa Dotiuomo i Ue tedoa mongkokongiri, onaemo po'iangaa atuu ka inineeako Peresi-Usa hawe kanandio-andio. 12Itempo atuu i Daudi doito ndi Ondae Ue Ala, ipotae, ”Kana'umpe aku mokowawao Burua-Do Ue Ala atuu a mpo'iangaku?” 13Onaemo pu'uno i Daudi nahi limbao Burua atuu a mpo'iangano, i kota Daudi, sine pansia ka iwawao a rahano i Obe-Edomi, to Gati. 14#2Sam. 6:11; 1Taw. 26:4-5 Burua-Do Ue Ala kongko a rahano i Obe-Edomi, meronga somborino i larono otolu wula. Ondae i Ue rumonsoo somborino i Obe-Edomi ka luwuno arataano.

Currently Selected:

1 Tawarika 13: XMZ

Highlight

Copy

Compare