Apokalupo 8
8
1Mamoe Mere taviri 7 vaki vepenave’ane, pani mau’u Pani Muku eiekavakei’inave.
2Aivara‐avaea 7 nai inamu‐ei’inave, oro ane oro Eloi inu paku ai oinave; pi’i 7 oro ekuakei’inave ane.
3Aivara‐avaea mo anenave iaa pakara arekamu ai oinave ane, laiko moni epomara u vakarumakei’inave: iau muri pei mo’onu u awkuakei’inave, uku kurua pei, iaa a’a anu nawki ane, laiko moni iaa pakara upa mere u aiane‐iai amua‐pakara paku ai.
4Iau muri inu iana, iaa a’a anu nawki ane, inanave Eloi inu paku ai aivara‐avaea anu eve mere.
5Aivara‐avaea epomara mi’inave, iau evoponave ane iaa‐pakara mere, pani va’au ai kai’inave ane: kaia anu kiri, voa ane, evao onu para ane, oioi ane, e’e’okanave.
6Aivara‐avaea 7 ane oro pi’i 7 emiaka, pi’i laea‐elauai oro evere’einave.
7Pinai aivara‐avaea una pi’i laeali’inave: lai‐rawre, iau ane, aro kiripai apaueakei’inave, pani va’au ai kinunave; iri kaupu rere kaiane enu kaupu monou iau ruawkavakei’inave, pono rokoa uriria ane ruawkavakei’inave.
8Reku aivara‐avaea una pi’i laeali’inave; pani va’au eiei akapu ovara mikirimakei’inave, iau para’amakei’?-?inave ane, ere aura ai kaiakei’inave; ere aura eiei rere kaiane enu eiei monou aro evere’enave.
9Inapei kaupu rere kaiane enu kaupu monou ere aura ai oro imunave; mapea kaupu rere kaiane enu kaupu monou e‐avakei’inave.
10Rere kaiane aivara‐avaea una pi’i laeali’inave; pani muku mere rawpu ovara ara’anave, ape’e orau u iau ruawkamakei’inave. Aiara rere kaiane kaupu unu aiara kaupu monou ai, ere awvi‐aumu ai ane, u ara’anave.
11Ei rawpu nawi Iara oroiakeina; ere eiei rere kaiane enu eiei monou ere iara evere’enave, uku ere iara evere’eaka, a’a aila ane ei ere na’anave oro imunave.
12Morere‐morere aivara‐avaea una pi’i laeali’inave; lare enu rere kaiane eiei inu eiei monou paueakei’inave, ia anu rere kaiane eiei inu eiei monou ane, rawpu kaupu rere kaiane enu kaupu monou ane muru‐eiakei’inave, lare pani eiei rere kaiane enu eiei monou, orau awku kipere pani inu eiei monou, pamea, eria kei’inave.
13Nai inamu‐ekinave, akiamu monou area‐enamakei’inave, voa araro vikirimakei’inave nai virinave, u erau voa kurumakei’inave, Au’a, Au’a, Au’a, pani va’au unu a’a eiai, uku pi’i mo onu laea aivara‐avaea rere kaiane laealiai awkamakina!
Currently Selected:
Apokalupo 8: IAR1920
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1920.
