Heberu 7
7
1Uku ei a’a Melekideka, Salema anu amua a’a, Eloi Mukua Epe’epe enu omoro a’a ane, u ane u Aberahamo au‐awkunave, kopai‐awkanave ane Aberahamo onu vairua pani ai u amua a’a awkoni‐ekavaka’ane,
2Mani amua a’a anu aruku Aberahamo oro mere miaka aua 10 u kokoranave, aua monou u Melekideka awkunave ane: ei nawi Melekideka anu pinai miki eire, opara anana anu Amua, miki mo eire, Salema anu Amua, kurua nawi inu miki, Airu unu Amua:
3Mekai eria, mei ane eria, kiri a’a ane eria: kinia pani eria, imua pani eria ane, kikiriakeia’ane euna u eiai, Eloi inu Mere enu aipo u eakei’inave, ei a’a Melekideka omoro a’a pokoi?-?liviai opai keiakana eiai.
4Ei amua‐omoro a’a anu avioia ovara‐mai kei’inave, u eiai Aberahamo mai‐vaki una no’ovea aruku aua 10 mere aua monou iou‐mi’inave, aua monou awkunave ane.
5Oro ane oro Levi inu kiri a’a, omoro a’a ane, i Vupu iva ekuakeina a’a anu aru aua monou miai a’a aruru unu aru aua 10 mere, omo ovaki airavaki mere, lia, oro mere oro Aberahamo onu kiri a’a.
6A uku ei a’a, u ane u Levi inu kiri a’a peo, u aru aua monou Aberahamo mere mi’inave, kopai‐awkanave ane, u ane u maura‐voa mia a’a kei’inave.
7Rurupu a’a i amua a’a kopai‐awkavakeina a’a voa e kevakeva kuruai liapea.
8Ei voa ane, eu ai a’a ane oro imuna aru aua oro mi’ina, a iou ai a’a monou aru aua mi’ina, u eiai voa ioneliakeina u ua‐rokona.
9Nai erau voa kuruane naea, i Aberahamo mere Levi awku vupu aru aua ekuna:
10Kurua pani ai Levi una mai‐vaki inu muri ai a‐kei’inavea, pani ane Melekideka Aberahamo au‐awkunave ane.
11A’a opara anana Levi inu omoro kaupu a’a mere miaka livilia, (uku kurua omoro kaupu a’a mere a’a aruru Vupu mi’inave,) uku oiana oea uakei’inave omoro a’a e la’avai, Melekideka anu omoro kaupu a’a, Arona anu omoro kaupu a’a peo?
12Omoro kaupu a’a ae’?-?eane, Vupu awku ae’eai limakina.
13A u eiai laikorava voa kuruakeina u kaki e enu a’a, una kaki a’a kapeo omoro iaki liane euna.
14Uku ei voa ipawkiakeina, ene Amua Iuda kiri a’a mere kinia‐kei’inave; ei kaki a’a eiai Mose voa eria kurunave uku omoro a’a anu iaki eiai.
15Ei voa parea ipawkiakeina enei oraiane omoro kaupu e enu omoro a’a la’avakana, Melekideka anu omoro kaupu a’a,
16I opai rokoa anu iva Una omoro iaki U a’akiakana, i a’a anu Vupu peo.
17Uku ei voa ioneliakeina, Ni omoro a’a opai keiakana eiai, Melekideka anu omoro kaupu a’a.
18Eu ai enei ipakiakeina eni Vupu, uku eapa, pai‐oka eria ane, paueakeina.
19Uku Vupu awku eria anana‐eakei’inave, a eai araea’araea nawawrea, ima‐ima ane, mi‐aneakeimakina enei mi’ina, i ei araea’araea Eloi arekamu ai enei anena.
20Uku maura‐voa au?-?miakei’inave, a ei a’a, maura‐voa eria, omoro iaki a’akina,
21A i maura‐voa U mere omoro iaki U a’akina, U ane U erau voa kurunave, Amua maura‐voa kuruane euna, Una voa U paueapea, Ni omoro a’a opai keiakana eiai,
22Orau awku kurua kuruei‐voa anu miki ipawkiai Iesu omoro a’a evere’eane euna, kuruei‐voa ima‐ima miki ane.
23Oro a’a aila omoro a’a anu iaki ekuakei’inave, uku oro a’a kei’inave, oro imunave ane.
24A U ane, uku U omoro a’a opai keiakana eiai pokoi?-?liviai, Una omoro iaki a’a e miapea.
25Oro ane i U mere oro Eloi ai anena U iekavai li’ina, uku panipani ai U rokona Eloi nawki‐awkavai oro eiai.
26Ei Omoro Amua orau enei oea‐rokoanave, iaa, mua eria ane, upu eria ane, namea a’a amai mere lai‐awkavakeina ane, pani muku upai epe’epe are’eakeina ane;
27U ane U oea‐rokoapea lare kavakava epie pei ekuai, pinai Una namea eiai, neko mere ai a’a aruru unu namea eiai; U ei opara pani monou li’inave uku pani uriria eiai Una nane, epie pei, U awkunave’ane.
28A’a ane oro eapa mi’ina Vupu omoro a’a iaki ekuna, a maura‐voa kuruakei’inave’?-?ane Vupu unu pani neko mere ai anenave, kurua maura‐voa Omoro Amua Mere oroina, U ane U anana?-?eakeia’ane euna.
Currently Selected:
Heberu 7: IAR1920
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1920.
