IVA A’A ANU IAKI 23
23
1Paulo Sunederi a’a inamu‐ekiekamakei’inave, erau voa kuruenave, Ovaki airavaki e, Eloi inu paku ai nai lai anana rokoane euna anea’anea eai.
2A’a Paulo arekamu oimakei’inave omoro amua Anania ekinave Paulo onu ane eve kavai oikiai.
3Paulo erau voa kurunave, Eloi vaki‐nimima vara maina kikiakeia vaki e: ni voa veve’i’iai i‐pa’amakei’i vupu unu opara orau; vupu ni inaka ama‐li’i, ni ekina oro vaki’i’miai?
4A’a arekamu ai oimakei’inave erau voa veve’enave, Eloi inu omoro amua a’a anakaia voa ni amakuru’i?
5Paulo erau voa kuruenave, Ovaki airavaki e, nai ipaliakape u omoro amua a’a kei’inave: uku ei voa kikiriakeina kapoi, Anakaia voa ni pa kuruai ni a’a aruru unu amua a’a eiai.
6Paulo inamu‐oimakei’inave Sunederi a’a kaupu kaupu koravakei’inave, kaupu monou Sadukea a’a, kaupu mo Parisea a’a, voa araro u erau voa kuruenave, Ovaki airavaki e, nai Parisea a’a, Parisea a’a anu mere ane: uku na araea’araea imua mere enu la’ava eiai nai voa veve’i’iakeina.
7Ei voa Parisea a’a, Sadukea a’a ane, voa kamu?-?kamu‐ekanave, a’a aruru awku koravakei’inave.
8Uku Sadukea a’a ipawkina imua mere la’ava eria keina, aivara avaea eria keina, avaea eria ane: Parisea a’a ipawkina ou awku uriria rokoakeina.
9Rawre ovara rokoanave, Parisea kaupu unu vupu kikiria a’a varomo lala’anave erau voa iviri kurunave, Namea eria ei a’a laru ai enei auina. Oiana avaea naea, aivara avaea naea, una ane epo mere kuruane euane!
10Voa kamukamu iara evere’emakei’inave ane, amua marevaki kore kei’inave oro Paulo a’ane‐iai, aiai ve’eai u ekinave Paulo Sunederi a’a mere oravai, aiai inu marea ai arekavai ane.
11Kipere pani ai Amua una mekai oinave, erau voa kurunave ane, Kopaili’ine Paulo e: uku orau Ierusalema ai Nai eiai ni ioneliane euna, orau Roma ai awku ni ioneliai limakina.
12Pani mereaka’ane Isaraela a’a varomo kaupukinave, ei kuruei voa oro kurunave, uku pei, ere ane, oro na’apea anea’anea oro Paulo a’ane.
13A’a ei kuruei voa kuruaka oro a’a 40, a’a mo ane, akoakei’inave.
14Omoro amua a’a ai, mai‐oro ai ane, oro anenave, erau voa kuruenave ane, Enei kuruei voa kuruane euna, enei pei eria navakana anea’anea enei Paulo a’ane.
15Ou uku eiai noro, Sunederi a’a ane, amua marevaki awkiai limakina Paulo namai lare u arekavai nomo paku ai, noro voa mo akere akere veve’eane‐iai: enei aioiaka‐pokoiakana, avakana ane, noro ai u aneapea.
16Paulo onu aro a’e enu mere uru viriaka’ane oro vauavaua aioiaka pokoimakei’inave Paulo avai, aiai inu marea u ikirinave, Paulo awkinave ane.
17Aiai inu marevaki monou u ai aneai Paulo laeali’inave, erau voa kurunave ane, Ei roropaea amua marevaki inu paku ai orane: uku u voa mi’ina amua awkiai.
18U roropaea ora’anave, amua marevaki inu paku ai arekanave ane, erau voa kurunave ane, Paulo kipura vaki laea‐ilau’unave, nawki‐ikanave ane ei roropaea ni paku ai arekavai. U voa mi’ina ni eiai.
19Amua marevaki roropaea eve ora’anave vauavaua mako ai, erau voa veve’enave ane, Oi voa ana ni mi’ina nai eiai?
20U erau voa kurunave, Isaraela a’a voa evere’eane euna oro nawki‐nikavai namai lare Paulo Sunederi a’a anu paku ai ni arekava’ane‐iai, oro moawku voa veve’eane‐iai oro auoimakina.
21Omo lai ni pa evere’eai, uku a’a 40, a’a mo ane, vaua?-?vaua aioiaka‐pokoimakina, oro kuruei voa kuruane euna, pei, ere ane, oro navapea anea’anea oro Paulo a’ane: oro eai evere’eakeina, aioiaka‐pokoimakina ane ni kuruei voa eiai.
22Amua marevaki roropaea enavai evere’enave, erau voa kurunave ane, A’a pa awkiai ei voa ni ikiane euna.
23Marevaki a’a rere u laea‐elau’unave, erau voa ekinave ane, Are rokoa aiai 200 kaupukine oro Kaisaria ai enavai, awki‐ena aiai 70 ane, anai‐ere‐mia aiai 200 ane, oro kipere pani enava’ane‐iai;
24Awki oro mi’inameki Paulo eiai, u upa mere area?-?enava’ane‐iai, Feliki kavana anu paku ai u arekavakeia’?-?ane‐iai.
25Revareva erau voa u kikirinave:
26Kalaudia Likia mere avioia anena Felikia kavana epe’epe eiai.
27Ei a’a Isaraela a’a a’akinave, oro avai awkamakei’inave, nai, aiai ane, anenave, iawkanave ane, uku nai virinave u Roma a’a kei’inave.
28Uku voa viriai oro avi?-?makei’inave Sunederi a’a paku ai nai ora’anave:
29Nai ipali’inave ane omo vupu unu ipawkia voa eiai u aviakei’inave, u namea liakape oro a’ane‐iai, piriane‐iai,
30Voa awku ikiakei’?-?inave Isaraela a’a vauavaua aioiaka‐pokoimakei’inave ei a’a avai, nai emoki okaiviriane euna ni ai; una avia a’a nai ekimakina omo avia voa ni paku ai mi‐enavai.
31Aiai orau oro ekiakei’inave oro Paulo mi’inave, kipere pani ai Anepateria ai arekanave ane.
32Namai lare are rokoa aiai omo marea ai vairunave, awki‐ena aiai Paulo kiripai aki‐enanave:
33Oro Kaisaria ai paiaka’ane, revareva oro kavana awkunave, Paulo kavana anu paku ai oro ora’anave ane.
34Kavana revareva oraiaka’ane, Paulo onu eiei nawi u voa veve’enave. U viriaka’ane u Kilikia eiei a’a;
35U erau voa kurunave, Ni avia a’a anea’ane, ni voa uriria nai viriakana. Paulo Heroda anu voa vevea marea laru ai piriaka‐pokoiai u awkinave.
Currently Selected:
IVA A’A ANU IAKI 23: IAR1920
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1920.
