Kamhinhin 21
21
1An iemahm neai vi mene ten vi; mero in ka neai aupan mene ten aupan keniava miavan, an tehe reknika.
2An iemahm nauanu ausim Jerusalem vi ratite mesipe le neai le Wuhgin, kenepinapina ita rolkoma ierik keniap vi to nemirin.
3An iemerou noian asul resipe le thron mameni, Ahm ru nimwa te Wuhgin ramarik to neremim, an in tereparik to ilar, an ilar teparol neremim tahan, an Wuhgin in atu terepamarik to ilar.
4An tereprai ita hninemrin ilar petum, an nemisan terepuka; an nerapan mene nasakan mene nahmean terepuka. Nar aupan min kenarua maruan.
5An ierem remowata le thron netereni, Ahm ru tiakol vi naremnar min. An netereni Rai, Mero in ka nakaran min uk keisanen maiparhien.
6An netereni tonio, Kenolita ilar. Io Alfa mene Omeka, nerwowunan mene naunin. Io tiapofen apnapenam nu aualual te nemihwan kam ierem remowawa.
7Ierem tererai ita terepos nar min uk tahan ena, an io tiapol, Wuhgin tahan, an tapol in neruk.
8Mero nerem kamarigen mene nerem kasanian nuparhienan mene nerem ouloul mene nerem kamahro til mene nerem kamarol tehwaga tat le beravin wa naman mene nerem kamarol pisapis min mene nerem kameihwak kam nanumun nar mene neiwa min, nowanverin tenilar le nesiu rakawou le nekam mene nies, in uk nemisan ierem rol kiu.
9An ker le agelo katilum mekiu, ierem min kamaros nevigenar katilum mekiu ret le netetan katilum mekiu ierem min kaiwatisig aken, neterua mamakar kam io, mameni, Ua, an tiafhinhin tonik ierik nuai Lam.
10An netereles ita io le nanumun to towar asul rapahm, an neterhinhin tonio mauanu ausim Jerusalem ratite mesipe le neai le Wuhgin.
11Ramos nevitan te Wuhgin; nisia tahan rolkoma kapiel ut aken ena, rolkoma kapiel jasper rhahlel kama kristal.
12Ramos nipai asul rapahm, nukulu lan katilum katilum mekiu, an le nukulu min agelo katilum katilum mekiu, an netig kamrai le ilar, netige nahuto katilum katilum mekiu le nereri Israel.
13Bat nukulu kisil, an ihiu nukulu kisil, an pis nukulu kisil, an paha nukulu kisil.
14An nipai le nauanu nelikin katilum katilum mekiu, an le ilar netig katilum katilum mekiu te apostelo katilum katilum mekiu te Lam.
15An ierem ramakar kam io ramos to nahmaukeran nuig kamol le kold moma terahmauker nauanu mene nukulu min lan mene niapia lan.
16An neuanu rakamel le nikalin kuer, an napahman tahan rauker in ierem reluau in. An neterahmauker nauanu le nuig ferlog 12,000; napahman mene neluauan in mene netan tahan khaiuker.
17An neterahmauker nipai lan kiubit 144, nahmaukeran taha ieremim, ierem ka taha agelo.
18An nipai lan kamol le jasper, an nauanu in kold rhahlel rolkoma klas rhahlel.
19Neliki nipai le nauanu kenol vi — le kapiel ut min; nelikin ierem aupan in jasper, ierem rol kiu in safair, ierem rol kisil in kalsedoni, ierem rol kuer in emerald.
20Ierem rol katilum in sardoniks, ierem rol katilum makarena in sardias, ierem rol katilum mekiu in krisalis, ierem rol katilum mekisil beril, ierem rol katilum mekuer in topas, ierem rol katilum katilum in krisoprasi, ierem rol katilum katilum makarena in jasinth, ierem rol katilum katilum mekiu in amethist.
21An nukulu katilum katilum mekiu ilar perl katilum katilum mekiu, nukulu pusen pusen min kamol le perl karena kiten; an suatu le nauanu in kold rhahlel rolkoma klas rhahlel.
22An iesahman nimwa ahwak lan, mero in ka Ieremera Wuhgin ierem resanen to nar min in nimwa ahwak tahan, ilau Lam.
23An nauanu resolkeikeian mit mene mouk moma tukuasia lan, mero in ka nevitan te Wuhgin ramasiakapun in, an nisia tahan in Lam.
24An netig min tepailiwak le hnakakan tahan; an neremera le ten teparos nevitan tenilar marua ton.
25An nukulu min tahan tepesharigan lan le nian, mero in ka lapin rika iken.
26An teparos nevitan mene nesiaian te netig min marua ton.
27An terepesuenan lan nar kashapelan ker wa ierem ramol ouloul nar mene neiwean; mero nerem kamrai netigen ilar le nawowa te nemihwan te Lam.
Currently Selected:
Kamhinhin 21: LEN1902
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1902, reprinted in 1935.
