रोमापा 3
3
1धा ॱहाना याहुदापाक्याला फेन्थोक घी हो़ताले? याङना पाउ चेगीन ॱरोगी रीन्थाङ घी ले? 2छोक घीरीने फेन्थोक क्षे हो़तालाक। धाङपोगोला को़न्क्षोकगी का याहुदापाक्याला च्योवालाक। 3खुङक्याने रीङगागी को़न्क्षोकगी काला धेपा मीझ्यीनाः, घी हो़तालाक से? खुङक्याई धेपा मीझ्यीगीनगी झ्येरी, को़न्क्षोकगीयाः राङगी ॱलोते चामेदु जेगीले? 4हुरे फुक्की झ्युङगुमालाक। मी घीरी शोक्पो हो़ना, को़न्क्षोक धेन्पा हुङघो़। दी कोरला सुङरापला देरे ढीक हो़तालाक,
“खेराङ कामो़न सुङाराङ धेन्पा ॱङो़न्दास्योक,
धेनी खेराङला ठीम चेदाराङ ग्यालास्योक।”#सुङगुर ५१:४
5हीना होरी मेढाङा झ्यीगीन लेगाक्याई, को़न्क्षोकगी ढाङतेन सावो तो़न्ना, होराङ घी ॱनाये? को़न्क्षोकगी होरी खाला थुक्ठो़ जेगीनगोला, खोङ मेढाङा दुक ॱनेरी ॱनाये? (ङा मीगी क्षा श्याक्ती ॱनाहीन।) 6देरे फुक्की मालाक। देरे हीन्ना, को़न्क्षोकगी जीक्तेनला घाङगी झ्येरी ठीम्चो़ जे थुक्कीलाक से? 7हीना ङी शोकगी थोक्ने, को़न्क्षोकगी धेन्पा तो़न्दी खोङगी शीजे फेना, ङाला घीझ्येरी धोराङा धीक्चेन च्योक्रे छेपा का जेदाले? 8धेनी “शाङा झ्युङास्योक ॱनेरी ङेन्पा घीझ्येरी मीझ्यीये?” ॱनेरी, हेक्याई ॱनी ॱनेरी, मी रीङगागी हेक्याला ॱमेबेप तारी, क्यो़न चुक्वालाक। देरे ॱनागीनक्याला छेपा फोक्घोये दुक।
ढाङपो सुवाः मीदुक
9धा ॱहाना थामे दो़नगो घी ले? हे याहुदापाक्या मी श्येम्माक्याने ल्हाक शाङा हो़तालाक से? मेतालाक, फुक्की मेतालाक। घीझ्येरी ॱनाना याहुदापा धाङ याहुदापा मेन्गीन, मी घीरी धीक्पे वाङ होकदु हो़तालाक ॱनेरी, ङी तो़न्साहो़क। 10सुङरापला देरे ढीक हो़तालाक,
“ढाङपो सुवा मीदुक, च्यीगारा च्यीया मीदुक,
11ॱहाघोगीन च्यीया मीदुक,
को़न्क्षोकला चागीन सुवा मीदुक।
12घीरीगी खोङला ग्याप ॱलोक्दुक,
घीरी दो़न मेगीन झ्युदुक,
शाङा झ्यीगीन सुवा मीदुक,
च्यीगारा च्यीया मीदुक।”#सुङगुर १४:१-३;५३:१-३; ईक्लेस्यीया ७:२०
13“खुङक्याई मीक्पा नी, खा दाङदा धुरखाङ लाक,
खुङक्याई च्येमोगी ॱयो़क्यु स्येदीक।”#सुङगुर ५:९
“डुगी दुकगो खुङक्याई खाला दुक।”#सुङगुर १४०:३
14“खुङक्याई खा नी, ॱमेमो धाङ छीक चुक्वागी खाङदुक।”#सुङगुर १०:७
15“खुङक्याई काङबा नी, ॱरोक चेयेला ग्योक्वा दुक,
16खुङक्याई लामला तोरस्यीक धाङ दुक्ङेल दुक,
17धेनी श्यीदेगी लाम नी, खुङक्याला स्येये मीदुक।”#यस्याया ५९:७,८
18“खुङक्याई ॱमीकला को़न्क्षोकगी जीक्नाङ मीदुक।”#सुङगुर ३६:१
19धा क्षो़ठीमगी घी सुङगीन घीरी, क्षो़ठीमगी वाङ होकला हो़गीनक्याला सुङालाक ॱनेरी, होरी स्येलालाक। दे नी, मी घीरीगी खा काक्ये धाङ जीक्तेनगी मी हो़ले, को़न्क्षोकगी ठीम्चो़ होकदु ठीक्ती हुङयेगी क्षीदु लाक। 20होझ्येरी क्षो़ठीमगी लेगाने सुवा, को़न्क्षोकगी डुङदु ढाङपो चीगीमालाक। हीना क्षो़ठीमगी थोक्ने होरी, धीक्पा झ्यीगीनगो स्येरु च्युक्वालाक।
धेपागी गोने ढाङतेन
21हीना धान्दा को़न्क्षोकगी होराङला क्षो़ठीम ॱमारुङवालाः, खोङगी डुङदु ढाङपो झ्युङयेगी लाम तो़न जे हो़तालाक। धेनी देगी पाङपो, मोशेगी क्षो़ठीम धाङ ॱङो़नस्येखेनक्याई झ्यीदालाक। 22धेनी को़न्क्षोकगी डुङदु होराङ ढाङपो झ्युङये दे, येशु मास्यीका खाला होरी धेपागी थोक्ने झ्युङालाक। धेनी दे नी, धेपा झ्यीगीन घीरीला ॱयेवा मेजेदा ॱनाङालाक। 23घीझ्येरी ॱनाना मी घीरीगी धीक्पा झ्ये हो़तालाक धेनी को़न्क्षोकगी शीजेने ग्याङ रीङदु शो़ हो़तालाक। 24हीना राङगी थुक्जेगी रीङ मेगीन ॱनाङज्यीनने, को़न्क्षोकगी मी घीरीला ढाङपो जेदालाक। दे नी, मीक्याला धीक्पाने थारपा जेगीन, येशु मास्यीकागी थोक्ने जेदालाक। 25धेनी खोङ मास्यीकागी कुठाक ॱली़री, धीक्पा सेल्येगी ॱमारछो़ झ्युङयेला, को़न्क्षोकगी खोङला पुवालाक। दे नी धेपा झ्येरी च्यीगा थोप्कीलाक। धेनी दे को़न्क्षोकगी राङगी ढाङतेन ॱङो़न्येगी क्षीदु जेपालाक घीझ्येरी ॱनाना एम्मा को़न्क्षोकगी शो़पा जेदी, मीक्याई झ्येजा धीक्पाक्याला छेपा का माजेपालाक। 26हीना खोङबाराङ ढाङपो हीन्गीन धाङ येशुला धेपा झ्यीगीनक्याला खोङबागी ढाङपो जेयेगी क्षीदु, खोङबागी धान्दागी धी़ला मीक्याई धीक्पाला दो़नाङ जेदालाक।
27धा ॱहाना होराङ घीन्गी कोरला, ङोम्सो झ्यीगुलाक से? ङोम्सो झ्यीये घीयाः मेतालाक। क्षो़ठीम घारेगी झ्येरी लाक से? लेगा झ्यीघोये क्षो़ठीमगी झ्येरी ले? मालाक हीना, होरी धेपागी झ्येरी लाक। 28घीझ्येरी ॱनाना क्षो़ठीमगी सुङगीन च्योक्रे, लेगा झ्येरी मेन्दा हीना धेपागी थोक्ने मीक्या को़न्क्षोकगी डुङदु ढाङपो झ्युङालाक ॱनेरी, होराङ चीलालाक। 29याङ को़न्क्षोक याहुदापाक्याई च्यीगा को़न्क्षोक लाक से? खोङ याहुदापा मेन्गीनक्यागीयाः को़न्क्षोक माले? लाक, खोङबा याहुदापा मेन्गीनक्यागीयाः को़न्क्षोक लाक। 30धेनी को़न्क्षोक नी च्यीकराङ हो़तालाक। धेनी खोङबागी पाउ चेचाक्याला धेपागी थोक्ने, धाङ पाउ ॱमाचेचाक्यालाः धेपागी थोक्ने ढाङपो जेगीलाक। 31धा हुरे हीन्ना धेपागी थोक्ने, क्षो़ठीमगो दो़न मेगीन झ्युङालाक से? देरे फुक्की मालाक। ॱयोल्ले होराङ क्षो़ठीम तेन्पो झ्येरी ॱरुङालाक।
Currently Selected:
रोमापा 3: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
