रोमापा 2
2
को़न्क्षोकगी ढाङतेनगी ठीम्चो़
1होझ्येरी श्येम्माला क्यो़न चुक्कीन मी ख्यो़, ख्यो़ला घोयाङ मेतालाक घीझ्येरी ॱनाना दो़न घीला, ख्यी़ मी श्येम्माला क्यो़न चुक्यी, होदे दो़नगोला ख्यो़लाः क्यो़न चुक्कीलाक। घीझ्येरी ॱनाना श्येम्माला क्यो़न चुक्कीन ख्यी़याः, होदे लेगा झ्यीदालाक। 2धा देरे लेगा झ्यीगीनक्याई खाला को़न्क्षोकगी ठीम चे जेगीनगो, धेन्पा दुक ॱनेरी होराङ स्येलालाक। 3धा मी ख्यो़, देरे लेगा झ्यीगीनक्याला ख्यी़ क्यो़न चुक धेनी ख्यो़राङगोवाः हुरे लेगाराङ झ्यीना, को़न्क्षोकगी ठीम्चो़ने ख्यो़ थारटु साम्ये? 4याङना को़न्क्षोकगी ॱङीङजे नी, ख्यो़ला ग्यो़पा झ्यीदु च्युक्ती सेम ग्युरतु च्युक्येला हीन्गीनगो ॱहामाघोवा, ख्यो़ खोङगी ॱङीङजे क्षेन्बो धाङ थुकॱरेन धाङ थुक्शो़ला थोङछुङ झ्यीदाले? 5हीना ख्यी़ राङगी सेम ग्योङा धाङ ग्यो़पा मीझ्यीदा सेम माग्युरकीनगी झ्येरी, को़न्क्षोकगी ढाङतेनगी ठीम्चो़ ॱङो़न्गीन खोङबागी थुक्ठो़गी ङीमागी क्षीला, ख्यो़ राङगी खाला को़न्क्षोकगी थुक्ठो़ साःलाक। 6को़न्क्षोकगी मी रे-रेला, राङगी लेगाला थी़न्गीन ढेबु ॱनाङगीलाक। 7धेनी शो़पागी गोने ले शाङा झ्येरी, शीजे धाङ कुरती धाङ छीवा मेगीन छे चागीन मीक्याला, खोङगी थामेपे छेसोक ॱनाङगीलाक। 8हीना राङदो़ चागीन धाङ धेन्पाला ॱमीचीगीन धेनी ङेन्पाला घागीनक्याई, खाला खोङगी ठीम्चो़ थुक्ठो़गी गोने फोक्कीलाक। 9ङेन्पा झ्यीगीन मी घीरीगी खाला, दुक्ङेल धाङ काङे भाप्कीलाक। धाङपोगो याहुदापाक्याला धेनी याहुदापा मेन्गीनक्याला। 10हीना ले शाङा झ्यीगीन घीरीला, शीजे धाङ कुरती धाङ श्यीदे थोप्कीलाक। धाङपोगो याहुदापाक्याला धेनी याहुदापा मेन्गीनक्याला। 11घीझ्येरी ॱनाना को़न्क्षोकगी क्षोक्री मेजेदालाक।
12क्षो़ठीम मेताला धीक्पा झ्यीगीन घीरी, क्षो़ठीमने डारीराङ मेताला डोगीलाक धेनी क्षो़ठीमगी होकला झ्येरी, धीक्पा झ्यीगीन घीरीला क्षो़ठीमगी थोक्ने ठीम चेगीलाक। 13घीझ्येरी ॱनाना को़न्क्षोकगी डुङदु क्षो़ठीम घोरकीनक्या ढाङपो मेन्दा, क्षो़ठीमगी सुङगीन च्योक्रे, झ्यीगीनक्या ढाङपो चीगीलाक। 14धेनी क्षो़ठीम मेगीन याहुदापा मेन्गीनक्याई राङश्यीगी क्षो़ठीमला थी़न्गीन लेगा झ्यीना, खुङक्याला क्षो़ठीम मेनाः खुङक्याराङ खोराङक्याई क्षीदु क्षो़ठीम झ्युङालाक। 15धेनी खुङक्याई क्षो़ठीमगी काक्या राङगी सेमला ढीक हो़गीनगो तो़न्दालाक। धेनी खुङक्याई स्येशाङगीयाः पाङपो झ्यीदालाक धेनी खुङक्याई साम्लोगी दुगा क्यो़न चुक्वालाक धेनी दुगा ॱरुङक्योप झ्यीदालाक। 16दे नी ङी सेटाक झ्येजा ताम्शाङला च्योक्रे, मास्यीका येशुगी थोक्ने को़न्क्षोकगी मीक्याई साङवे लेगाक्याई, ठीम चेगीन ङीमागोला झ्युङगीलाक।
याहुदापाक्या धाङ क्षो़ठीम
17हीना ख्यो़ याहुदापा च्यीक हीन ॱनेरी ॱनाना, धेनी क्षो़ठीमला तेन्ना धेनी को़न्क्षोकमुला हो़गीन ढेवाला ङोम्सो झ्यीना, 18धेनी खोङबागी थुकोङ स्येना धेनी ख्यो़ला क्षो़ठीमगी ॱलापच्या थोप्था झ्येरी, शाङागो थाक्चो़ थुक्ना, 19-20धेनी क्षो़ठीमने ख्यो़ला स्येराप धाङ धेन्पा छाङगो थोप हो़गीनगी साम्लो झ्येरी, ख्यो़ राङला श्यारागी लाम्तो़न धाङ मी़नाकला हो़गीनक्याई हो़क धेनी ॱलेन्दागी ॱलोपो़न धाङ ॱनाटो ॱमाङ्येङ्याक्याई घेगेन हीन ॱनेरी, ख्यो़ तेन-तेन हो़ना, 21धा मी श्येम्माला ॱलाप्कीन, ख्यो़राङला ॱमेलावाले? श्येनला कुमा ॱमाकु ॱनेरी, स्येगीन ख्यो़राङगो कुवाले? 22धेनी लोक्येम माझ्यी ॱनेरी ॱनागीन, ख्यो़राङगो लोक्येम झ्यीदाले? कुन्डाला दाङा झ्यीगीन, ख्यो़राङगो ल्हाखाङक्याने कुवाले? 23क्षो़ठीमला ङोम्सो झ्यीगीन ख्यो़, क्षो़ठीमला ॱमीचीला को़न्क्षोकला ॱमेबेप झ्यीदाले? 24घीझ्येरी ॱनाना दी कोरला सुङरापला देरे ढीक हो़तालाक,
“ख्ये याहुदापाक्याई झ्येरी याहुदापा मेन्गीनक्याई, को़न्क्षोकगी छेनला कुरवा धेवी।”#यस्याया ५२:५; ईजीकीएल ३६:२०,२२
25धा ख्यी़ क्षो़ठीम ॱरुङना, पाउ चेगीन ॱरो दे, ॱङोन्ने फेन्थोक हुङालाक हीना ख्यी़ क्षो़ठीम ॱमीरुङना, ख्यी़ पाउ चेगीन ॱरोगो ॱमीरुङगीन च्योक्रे लाक। 26धा हुरे हीन्ना, पाउ चेगीन ॱरो ॱमीरुङगीन, मी च्यीकगी क्षो़ठीमगी काक्या ॱरुङना, खोला पाउ चेगीन ॱरो ॱरुङगीन मी च्योक्रे चीगीमाले? 27धा ली़गी थोक्ने पाउ चेगीन ॱरो ॱमीरुङगीन हीन्नाः क्षो़ठीमगो ॱरुङगीनक्याई, ख्ये ढीक्टा क्षो़ठीम हो़गीन धाङ पाउ चेगीन ॱरो ॱरुङगीन हीना क्षो़ठीमगो ॱमीचीना, खेक्याला ठीम्चो़ ताङगीलाक। 28घीझ्येरी ॱनाना फीदाने च्यीगा, याहुदापा हीन्गीनगो ॱङोन्ने याहुदापा मालाक। धेनी पाउ चेगीन ॱरोगोवाः फीदाने धाङ ली़ने च्यीगा ॱरुङये मालाक। 29हीना याहुदापा ॱङोन्नेगो सेम नाङने, याहुदापा हीन्गीनगो लाक धेनी पाउ चेगीन ॱरो ॱङोन्नेगो ढीक्टा क्षो़ठीमने मेन्दा, धाम्पे थुक्ङीगी थोक्ने झ्युङगीन सेम्ङीगी लाब लाक। देरे मीगी तो़टा नी, मीने मेन्दा को़न्क्षोकने झ्युङगीलाक।
Currently Selected:
रोमापा 2: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
