Efɛsitɔnŋ kiri 1

Coolinŋ ki

1Míŋ Pooli wɔ̀ i Yesu Kirisa wɔ cindaŋ i Kirinŋ baraka ra, míŋ i ka sɛbɛ ka tan wɔri ta-a Kirinŋ wɔ wɔlinŋ kiri tɛ Efɛsi kili ki ru, nini wɔ̀ri i Kirisa Yesu bilinatɔnŋ kiri i. 2Yibɛɛ tiŋ Kirinŋ fa yi Ŋuntiŋ Yesu Kirisa shɔɔrinŋ fa ɲaanfɛfili wɔri á tɛ.

Kirinŋ wɔ shɔɔrinŋ ki bi ki Kirisa baraka ra

(Ɔrɔmutɔnŋ kiri 8.15–17, 28–30)

3Yi baraka bi Kirinŋ tɛ, ninwɔ̀ i yibɛɛ Ŋuntiŋ Yesu Kirisa tiŋ ki i. Mìnki shɔɔrinŋ ki fɔn kwuru ma-i yibɛɛ ɲini kiri tɛ Yesu Kirisa baraka ra kirinpɔlila mani narimaŋ kiri ru. 4Ntiŋ baraka ra, Kirinŋ yibɛɛ ɲaannashi-i juniɲa namɔni ki jɛŋ, nwɔma yibɛɛ i ji wɔlinŋ pɔlibali li i, a ɲaanfɛ. 5Kirinŋ niŋ gbɛbili-i ninkunŋ awɔ bidintɛbi ki baraka ra, tu afinŋ a na yibɛɛ ji awɔ rakilidaŋ ni i, Yesu Kirisa bira, ŋì i kɛɲɛ a yɛri ki dintɛ bi ki wu. 6Ŋì niŋ ma-i, nwɔma yibɛɛ i awɔ shɔɔrinŋ ki nɔɔri ki gbɛ, ŋì ninwɔ̀ wɔri-i yibɛɛ tɛ ǹʼgbansanŋ i, awɔ dintɛ daŋ ki bira.

7Yesu Kirisa cunŋ ki kɔnkɔlimaan ki baraka ra, Kirinŋ yibɛɛ ŋunsan-i, ŋì i yibɔɔ bijɛ kiri tu yi tɛ, ŋì i kɛɲɛ awɔ shɔɔrinŋ sinaŋ ki wu. 8Niŋ shɔɔrinŋ ki wɔ̀ ma-i yibɛɛ tɛ ǹʼmwɔɔnna, niŋ i kaa : Kirinŋ bitɔbi fa ɲakilitinbi sinaŋ wɔri-i yi fɔn tenŋ tenŋ tɛ. 9Ŋì a ciiru gonto ki ji-i yibɛɛ wu, ŋì i ninwɔ̀ gbɛbili wuru, ŋì i kɛɲɛ awɔ shɔɔrinŋ ki wu, Yesu Kirisa baraka ra. 10Ŋì i ǹʼgbɛbili wuru-i, tu waaci kiri na nafaa waarinŋ wɔ̀ ru, tu afinŋ a na pwɔkulinŋ sun finŋ kiri fa kirinpɔli la finŋ kiri bataa rakɔli, a i Kirisa ji yìrì ŋununtiŋ i.

11Kirinŋ yibɛɛ yɛrima kiri ɲaannashi-i, yi i ji awɔ ri Kirisa bira. Mìŋ Kirinŋ wɔ̀ ki i bi kiri bataa ma-a, ŋì i kɛɲɛ a yɛri ki dintɛ bi ki wu, ninki niŋ gbɛbili wuru kabi fɔlɔfɔlɔ, 12nwɔma yibɛɛ wɔ̀ri ji-i koŋ jɔnɔ kiri i, yi i yi gbɛbilimaŋ ki ji Kirisa, konaŋ ki i yibɛɛ rapwulumaan ki ja ntiŋ gbɛ, kí i ǹʼtɔ, tu ntiŋ fa gbɛ kakan, kí i ntiŋ gbɛ.

13Dɔnsaŋ, ábɛɛ yɛrima kiri wɔ ki ma-i mìŋ ɲaan tenŋ ki tɛ. Kabi ábɛɛ sɛli wulu ki rama-i, ninwɔ̀ i Wulujii ki i, ábɛɛ bili-i ǹʼna. Niŋ Wulujii ki ábɛɛ mwu-i. Ábɛɛ bili-i Yesu Kirisa ra, niŋ ki ra, Kirinŋ i taanmashɛ bo ábɛɛ ra. Niŋ taanmashɛ ki i Ɲiniwɔlinŋ ki i, ŋì a tɔnŋ wɔri wuru ninwɔ̀ bira. Niŋ mamaan ki ra, Kirinŋ ǹʼji-i tu yibɛɛ afɔɔn ni. 14Niŋ Ɲiniwɔlinŋ ki i ǹʼji-a yibɛɛ wu, tu Kirinŋ bi shɔɔrinŋ finŋ woo finŋ tɔnŋ wɔri yibɛɛ tɛ, tu niŋ bataa ra ma a ɲaan tɛ, waarinŋ wɔ̀ ru Kirinŋ a na awɔ kiri bataa ŋuniŋ mwu kɔ, nwɔma a nɔɔri sinaŋ ki i gbɛ.

Pooli wɔ Kirinŋ nafɛ ki

(Kɔlɔsitɔnŋ kiri 1.3–6, 9–13; Filipitɔnŋ kiri 2.9–11)

15Ábɛɛ bili-i Yesu ra ɲaan wɔ̀ tɛ, niŋ fa ábɛɛ Kirinŋ wɔ wɔlinŋ kiri bidi-i á tɛ ɲaan wɔ̀ tɛ, míŋ niŋ bataa rama-i. 16Niŋ ki ra, míŋ i coolinŋ wɔri-ra Kirinŋ tɛ ábɛɛ bira, ŋí i ǹʼnafɛ-ri á tɛ waarinŋ bataa ru.

17Míŋ i ǹʼnafɛ-a Kirinŋ nɔɔritiŋ ki gbɛ, ninwɔ̀ i yibɛɛ Ŋuntiŋ Yesu Kirisa tiŋ ki i, tu ŋì ɲakilitinbi wɔri á tɛ, ŋì i a yɛri ji á wu, nwɔma á i ǹʼtɔka shɔ. 18Míŋ i ǹʼnafɛ-a tu ŋì ábɛɛ ɲakili kiri rawwulu, nwɔma ŋì ábɛɛ dɔri-i, ŋì i gbɛbilimaŋ wɔ̀ wɔri á tɛ, á i niŋ tɔ, niŋ fa tu ŋì bi shɔɔrinŋ finŋ woo finŋ tɔnŋ wɔri-i awɔ wɔlinŋ kiri tɛ, á i niŋ nafan ki tɔ.

19Míŋ i ǹʼnafɛ-a sɛbɛ, ńʼtu ŋì sotinbi sinaŋ wɔ̀ wɔri-i yibɛɛ bilinatɔnŋ kiri tɛ, ŋì i kɛɲɛ a yɛri ki wɔ sotinbi ki wu, ábɛɛ i niŋ fa a mwɔbi ki tɔ.

20Mìŋ sotinbi tenŋ ki baraka ra, Kirinŋ Kirisa ŋmɛni po san-i konkwuu kiri ru, ŋì i ntiŋ sɔɔ a pantɛ kirinpɔlila mani narimaŋ kiri ru. 21Ntiŋ sɔɔ-ɔ ŋununtinbi jabali kiri bataa ŋununu, miŋ tu masabi kiri fa faan kiri niŋ fa sotinbi kiri. Tɔ woo tɔ i dɔri-ra ka juniɲa ka ru, niŋ fa tɔ woo tɔ a na dɔri juniɲa na wɔ ki ru, Kirisa gbɛ-i niŋ bataa wu sɛbɛ. 22Kirinŋ finŋ bataa kulu-i Kirisa tɛ, ŋì i ntiŋ sɔɔ awɔ bilinatɔnŋ kwuru kiri bataa ŋununu, bi bataa ra. 23Bilinatɔnŋ kwuru kiri i ntiŋ firi ki i. Finŋ woo finŋ i Kirisa ru, niŋ bataa i bilinatɔnŋ kwuru kiri ru, ŋì i ji juniɲa mani ki bataa ru.

Currently Selected:

Efɛsitɔnŋ kiri 1: JOB

Highlight

Copy

Compare