Galasitɔnŋ kiri 6
6
Bilinatɔnŋ kiri wɔ yemaŋ tɛ bi ki
(Ɔrɔmutɔnŋ kiri 2.3–11; Iburu kiri 6.10–12)
1Ńʼtindaŋ ni, a ǹʼbɛɛ ja ji pa bi kulinŋ ki bɛɛ ra, Ɲiniwɔlinŋ ki i ábɛɛ wɔ̀ri gbɛ, á ntiŋ bo saa shɔɔrinŋ sun, tɔnsunfili wu. Nka á fɔn tenŋ tenŋ á yɛri cɔye, nwɔma ábɛɛ yɛri kiri fa na ji bi kulinŋ matɔnŋ ni i kì.
2Á ye ámaŋ tɛ, á i ámaŋ wɔ shii shi, a niŋ ma, ábɛɛ ra Kirisa wɔ sariya ki rafaa niŋ ɲaan ki tɛ.
3A konwɔtiŋ ji a yɛri pari-ra koŋ pyɛ kiri wu, niŋ i faa ntiŋ finŋ tɔri i kì, nintiŋ i a yɛri sunnɛɛn-na. 4Koŋ fɔn tenŋ tenŋ a tirika ɲaan ki rufɔɔ, a ntiŋ a nagbɛ ŋuŋ kila, ntiŋ a ciirudi niŋ wu, ŋì i kɛɲɛ a yɛri ki tirika ɲaan ki wu, ntiŋ fa a yɛri pyi koŋ tɔri wu kì. 5Sabu koŋ fɔn tenŋ tenŋ a na tu a yɛri ki ŋununu bi wu.
6Konwɔtiŋ i miŋ kali-la Kirinŋ wɔ wulu ki ra, miŋ kakan-i ŋi i ntiŋ wɔ lu po nʼgbɛfɛfinŋ kiri bataa ra.
7Á fa á yɛri fɔni kì, koŋ yɛtan-a Kirinŋ sun kì, a miŋ bilaŋ wɔ̀ firi, miŋ i niŋ daŋ ki tɛri-ra. 8Konwɔtiŋ firi ki dintɛ bi ki firi, ntiŋ a bilaŋ tɛri firi tɛ, ninwɔ̀ i beŋ ki i. Nka konwɔtiŋ Ɲiniwɔlinŋ dintɛ bi ki firi, nintiŋ a bilaŋ ki tɛri ǹʼtɛ, ninwɔ̀ i ɲaninkulutɔnbi kɔbali ki i.
9Yi fa yi firi kilɛn yi i shɔɔrinŋ ma ki tɔnbo kì. Sabu a yibɛɛ yi firi kilɛn yi i shɔɔrinŋ ki tɔnbo kì, yibɛɛ ra ǹʼtɔnɔ ki kila a kila waaci ru.
10Niŋ ki ra, a shɔɔrinŋ ma ki so ki ji yi gbɛ waaci wɔ̀ ru, yi shɔɔrinŋ ki ma koŋ bataa tɛ, nka yi ǹʼtɔnpa yi tindaŋ bilinatɔnŋ kiri sun.
Pooli wɔ wulu lakɔɔra kiri
(Filipitɔnŋ kiri 3.2–11)
11 Á sɛbɛdaŋ kari ŋunungbɛka ɲaan ki shɛɛli, míŋ yɛrima ki gbɛ ki i niŋ sɛbɛ wɔri ta-a ábɛɛ tɛ.
12Nwɔ̀ri i ǹʼtɛ tu ábɛɛ i sɔɔpeefɛ faan sun, nini i ǹʼtɛ arì i arì yɛri bidi konaŋ ni tɛ. Kí i ǹʼtɛ tu konaŋ kiri i arì cɔɔri Yesu Kirisa kpinkpisuu ki bira kì. 13Sabu nwɔ̀ri i sɔɔpeefɛmaanna ki ji-a faan i, nini yɛrima kiri sariya ki rasɔɔ-ra kì. Nka kí i ǹʼbi-a tu ábɛɛ sɔɔpeefɛ, nwɔma arì i arì yɛri ragbɛ tu arìbɛɛ kiri ǹʼbi tu ábɛɛ sɔɔpeefɛ. 14Míŋ kɔniŋ na ńʼnagbɛ finŋ tɔri tenŋ bira yibɛɛ Ŋuntiŋ Yesu Kirisa kpinkpisuu ki ciniŋ kì. Niŋ kpinkpisuu ki bira, míŋ beeni-i juniɲa gbɛ, juniɲa i ji beeni míŋ gbɛ sɛbɛ. 15Nʼsɔɔpeefɛ woo, nʼsɔɔpeefɛ kì woo, niŋ bi sinaŋ i kì, nwɔ̀ i bi sinaŋ ki i Kirinŋ gbɛ, niŋ i tu miŋ ji koŋ ŋunaŋ i.
16Nwɔ̀ri i niŋ saa ki tiri-ra, míŋ tu Kirinŋ awɔ ɲaanfɛfili ki fa awɔ shɔɔrinŋ ki ma nini fa awɔ konanbi ki bataa tɛ, ninwɔ̀ i Isirayɛli i.
17Niŋ ki ra, ŋì i san jiŋ na, koŋ tɔri tenŋ fa ńʼcɔɔri kili kì, sabu tafatari ri i míŋ firi ki sun Yesu Kirisa bira.#6.17 sabu tafatari ri i míŋ firi ki sun Yesu Kirisa bira : Girɛkiwulu ki i ǹʼbi-a tu Míŋ i de-a Kirisa wɔ taanshɛ ki wu nʼfiri ki ra.
18Ńʼtindaŋ ni, yibɛɛ Ŋuntiŋ Yesu Kirisa shɔɔrinŋ wɔri á bataa tɛ. Amiina!
Currently Selected:
Galasitɔnŋ kiri 6: JOB
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
