Mabikiri 6

Koŋ jɔnpɔni ɲaannashi bi ki, kí i ye cindaŋ kiri tɛ

1Niŋ waaci ki ru, bilinatɔnŋ kiri ŋuniŋ kpaa ki i na mwɔ, koŋ wɔ̀ri wuru Girɛkiwulu ki bi-a, nini i arì kaashi Iburuwulu bitɔnŋ kiri tɔ bi-ri. Kí tu koŋ a ɲakili tu-a arìbɔɔ kanimari#6.1 kanimari : Nini wuru mari ri i, nwɔ̀ri shuru tɔri shi-ri arɔɔ shuru kiri beenimaan ki kɔɔtɛ kili kì. kiri ra nufinŋ lu waari ki ru kì.#Timote (1) 5.1–16. 2Cindaŋ bwununfuuli ki i bilinatɔnŋ kiri bataa rakɔli, kí i ǹʼbi kí tɛ tu : « Yibɛɛ ra so Kirinŋ wɔ wulu ki sunjorama ki tɔnbo-i, yi i ji nufinŋ ɲaanpotiiri i kì. 3Niŋ ki ra, yi tindaŋ ni, á koŋ jɔnpɔni ceeli á yɛrima ki ru, nwɔ̀ri tɔ shɔɔrinŋ i konaŋ kiri tɔnŋ na, kí faamaan i ji-i Ɲiniwɔlinŋ ki ra, ɲakilitiŋ ni i ji-i, yibɛɛ ra na nini bo ka cinŋ ka ra. 4Nwɔ̀ i yibɛɛ, yibɛɛ ra tu Kirinŋ nafɛ ki fa ǹʼwɔ wulu sunjorama ki ra. »

5Niŋ wulu ki i di konaŋ ki bataa tɛ. Niŋ ɲaan ki tɛ, kí koŋ wɔ̀ri ɲaannashi-i, nini tɔ kiri wuru kari i : Ecɛni, niŋ kɔɔ wuru bilinabi ki ru, ntiŋ i faa Ɲiniwɔlinŋ ki ra, niŋ fa Filipu, Porokori, Nikanɔri, Timɔ, Parimenasi niŋ fa Nikola, ninwɔ̀ de wuru yawutubi ki ru, ntiŋ i po-ri Antiyɔsi. 6Kí i kí ji cindaŋ kiri wu, nini i Kirinŋ nafɛ kí tɛ, niŋ kɔɔtɛ kí i arì gbɛ bili ki sun, kí i kí biye Kirinŋ gbɛsun.

7Kirinŋ wɔ wulu ki wuru jeɲe ta-a mani ki bataa fan. Bilinatɔnŋ kiri i mwɔ na-ni Yerusalɛmu. Kirinŋ tɛ sarakawɔrɔtɔnŋ kiri mwɔɔnna fani i arì tu, kí i bilinabi ma Yesu ra.

Ecɛni pa bi ki

8Kirinŋ baraka de wuru Ecɛni nu, ŋì i sotinbi sinaŋ wɔri ntiŋ tɛ, ntiŋ i kabakobi sinaŋ ni fa taanmashɛ ri ma-ni konaŋ ki kanfɛ. 9Yawutu bɛɛ ri i jɔrɔkɔ, kí i Ecɛni sɔsɔ-ri. Nini wuru arìmaŋ nakɔli-la kalinfu wɔ̀ ru, kí wuru niŋ dɔri-ra tu Joŋ Ŋunsanmaan kiri wɔ Kalinfu. Niŋ koŋ kiri wuru Sirɛnitiiri i fa Alɛkisandiritiiri i. Ǹʼbɛɛ ri wuru po-a Silisi fa Asi sɔɔta ki ru. 10Nka kɔ́ɔ́ wulu ki so faan kila-i Ecɛni wɔ ki sun kì, sabu niŋ wuru awɔ wulu ki bi-a ɲakilitinbi wu Ɲiniwɔlinŋ ki baraka ra. 11Niŋ ki ra, kí i konaŋ kiri bɛɛ ri sali tu nini puru ye ntiŋ wu. Nini i ǹʼbi tu : « Wú i wulu ki bi-a, wú i Musa fa Kirinŋ tɔ ki li-ri, yibɛɛ yɛri kiri niŋ nama-i wú tɔnŋ na. » 12Kí i Yawutu kiri fa arì jɛntɔnŋ kiri fa Sariya kalimɔɔ kiri ruye bo Ecɛni sun. Nini i ta ntiŋ pa faan sun, kí i ntiŋ cɛɛn tiri arɔɔ kitikwurutoŋ ki ɲaanfɛ. 13Kí i na shɛɛri purubitɔnŋ bɛɛ ri wu, nini i na ǹʼbi tu : « Ka weŋ ka i wulu jɛ bi-a waarinŋ bataa ru, Kirinfusinaŋ wɔlinŋ ki fa Musa wɔ sariya ki bi sun. 14Yibɛɛ ǹʼnama-i wú tɔnŋ na, tu ka Yesu Nansarɛtitɔnŋ ka a Kirinfusinaŋ ka gwu, niŋ fa tu Musa sariya wɔ̀ri wɔri yibɛɛ tɛ, tu ntiŋ a nini napwulu. » 15Konaŋ wɔ̀ri wuru kitikwurumaŋ ki ru, nini bataa i Ecɛni shɛɛli-li a ɲaanfɛ, kí i ǹʼja tu ntiŋ ɲaanfɛ ki miŋ tu mɛlɛkɛn ɲaanfɛ.

Currently Selected:

Mabikiri 6: JOB

Highlight

Copy