Mabikiri 7

Ecɛni wɔ wulu ki Yawutu kiri tɛ

1 Kirinŋ tɛ sarakawɔrɔtɔnŋ kiri ŋununtiŋ ki tu Ecɛni tɛ : « Kí i wulu wɔ̀ bi-a miŋ sun, niŋ i sɛli i wa? »

2Ecɛni i wulu ki shi, ntiŋ tu : « Míŋ tiŋ ni fa ńʼtindaŋ ni, á á tɔɔnye míŋ tɛ! Nɔɔritiŋ Kirinŋ ki a yɛri ji-i yibɛɛ tiŋ cɛɛnni Aburahamu wu, ŋì i ntiŋ tu Mensopotami kɛniŋ ki ru, sana ntiŋ i na sɔɔ Haran kɛniŋ ki ru. Kirinŋ ǹʼbi-i ntiŋ tɛ : 3‹ Po san nʼwɔ kɛniŋ ki ru, ŋi i pani nʼtiŋ ki wɔ kaniŋ ki fa nʼwɔ konanbi ki ra, ŋi i ta sɔɔ kɛniŋ nu, míŋ a nwɔ̀ ji miŋ wu. › 4Niŋ wulu ki ramamaan ki kɔɔtɛ, Aburahamu i po san Kalide kɛniŋ ki ru, ntiŋ i ta sɔɔ Haran. Ntiŋ tiŋ ki na-i kɔ, Kirinŋ i ntiŋ jɛnpa po san niŋ mani nu, ŋì i na ntiŋ wu ka kɛniŋ ka ru, ábɛɛ sɔɔ ninwɔ̀ ru dɔnsaŋ. 5Niŋ waaci ki ru, Kirinŋ ka kɛniŋ ka mani dantenŋ wɔri-ri ntiŋ tɛ, ŋì i ji ntiŋ wɔ kì, hali kanŋ tumaŋ tenŋ. Nka, ŋì a tɔnŋ wɔri wuru ntiŋ tɛ, tu afinŋ a ka kɛniŋ ka wɔri ntiŋ daŋ kiri fa arì nupo kiri tɛ ntiŋ kɔɔtɛ. Kirinŋ niŋ bi-i ntiŋ tɛ waarinŋ wɔ̀ ru, jidaŋ wuru ntiŋ gbɛ sun kì. 6Kirinŋ ǹʼbi wuru ntiŋ tɛ tu ntiŋ nupo kiri ra na ji jɛ ri i kɛniŋ tɔri ru, tu niŋ kɛniŋ ki ru tɔnŋ kiri ra na kí ji joŋ ni i, kí i kí cɔɔri jiri jankɔli ciiru. 7Nka, tu shiya wɔ̀ri ra na kí ji arɔɔ joŋ ni i, tu afinŋ Kirinŋ yɛrima ki a na kiti ki fɛɛn nini sun. Niŋ kɔɔtɛ, tu Aburahamu nupo kiri ra na po san niŋ mani nu, kí i na kwumaŋ, kí i na afinŋ gbɛ. 8Niŋ kɔɔtɛ, Kirinŋ i sɔɔpeefɛmaanna ki ladaŋ ki wɔri Aburahamu tɛ, nwɔma niŋ i ji awɔ tɔnwɔri ki taanmashɛ ki i afinŋ fa ntiŋ faninmwuŋ. Niŋ ɲaan ki tɛ, Aburahamu na-i Ishaka kila, ntiŋ i niŋ sɔɔpeefɛ#7.8 sɔɔpeefɛ : Niŋ wuru ladaŋ i, Kirinŋ ǹʼbi wuru tu Aburahamu fa a nupo kiri ninwɔ̀ ma-ni, niŋ i ji awɔ tɔnwɔri ki taanmashɛ ɛ, a fa kí faninmwuŋ, nwɔ̀ i ǹʼji-a tu kí afɔɔn konanbi i. Niŋ ladaŋ ki i shurufinŋ ki tɔnŋ na pɔli ki tɛrimaanna. Tɔnwɔri Bwuumaan ki ru, Yawutu kiri wuru dɔri-ra tu « sɔɔpeefɛmaan kiri. » Nka Ɔrɔmutɔnŋ kiri wɔ sɛbɛ ki sɔɔta 2.29 ki i sɔɔpeefɛmaanna sɛlɛsɛli wulu bi-a, ninwɔ̀ i ciiru ki fɔɔ-ra. niŋ jimaan ki sunŋ fulupɔnɔtɔnŋ ki i. Ishaka i Yakuba ji, niŋ i niŋ sɔɔpeefɛ. Yakuba i yibɛɛ tiŋ cɛɛnni bwununfuuli ki ji, niŋ i nini sɔɔpeefɛ sɛbɛ.

9Yibɛɛ tiŋ cɛɛnni kiri i arì tindaŋ Yusufu tɛnbi tan, kí i ntiŋ ju joŋ i, Misira kɛniŋ ki ru tatɔnŋ bɛɛ ri sun. Nka Kirinŋ i tu ntiŋ fan, 10ŋì i ntiŋ mwu a yɛlibi kiri bataa wu. Ŋì i ɲakilitinbi wɔri ntiŋ tɛ, ŋì i ntiŋ bidi Firawuna tɛ, ninwɔ̀ wuru Misira masa ki i. Niŋ i ntiŋ sɔɔ awɔ kɛniŋ ki fa awɔ kaniŋ ki bataa ŋununu.

11Bɛɛ sinaŋ i bo Misira kɛniŋ ki fa Kaanna kɛniŋ ki bataa ru. Niŋ i ji ɲaanfɛkwulu bi sinaŋ i, fɔ yibɛɛ tiŋ cɛɛnni kiri wuru nufinŋ kila-a kì. 12Ŋì i kí tu niŋ na, Yakuba na-i ǹʼnama tu bilaŋ Misira, ntiŋ i yibɛɛ tiŋ cɛɛnni kiri bo ta ǹʼbɛɛ sa niŋ mani nu. 13Kí ta ki kaan fuluntɔnŋ ki, Yusufu i ta a yɛri ji a wɔrinŋ kiri wu. Niŋ mamaan ki ra, Firawuna i kila ntiŋ i Yusufu shiya ki tɔ. 14Niŋ kɔɔtɛ, Yusufu i cinŋ bo tu Yakuba fa awɔ kaniŋ ki bataa shi na amaŋ ki ru. Nini wuru koŋ yaabyaŋ fa bwununtaanŋ a. 15Yakuba i tu Misira, ntiŋ i na beeni niŋ mani nu, yibɛɛ tiŋ cɛɛnni kiri yɛrima kiri i na beeni nmaŋ. 16Kí i ta kí kwuu kiri ye Sikɛmi kili ki ru, saali lu, yibɛɛ tiŋ cɛɛnni Aburahamu ninwɔ̀ sa wuru wari ra, Hemɔɔri danshuru kiri gbɛ.

17Kirinŋ a tɔnŋ wɔri wuru Aburahamu tɛ bi wɔ̀ ra, niŋ nafaa waari ki na-i myɛ, yibɔɔ konanbi ki i mwɔ na-ni, kí i Misira kɛniŋ ki faa-ri. 18Kí tu-i bwuu-ra niŋ ɲaan ki tɛ, fɔ Firawuna tɔri i na sɔɔ Misira faan ki sun, nwɔ̀ Yusufu tɔ kila-ri kì. 19Niŋ masa ki i yibɛɛ tiŋ kiri sunnɛɛn, ntiŋ i kí makwulujuu, ntiŋ i kí po arì kaan sun arì daŋ kiri tɛ, nwɔma nini i beeni.

20Niŋ waaci ki ru Musa i ji. Daŋ ki i shɔ, ǹʼbi i di Kirinŋ tɛ kusɛbɛ. Ǹʼjifinŋ kiri i ɲɛŋ wɔri ǹʼtɛ du ru, ɲɛ byaŋ ciiru arɔɔ kaniŋ ki sun. 21Daŋ ki jifinŋ kiri na-i ǹʼja tu daŋ ki a so radu-i kili kì, kí i ǹʼpo taanna. Firawuna danmari ki i ǹʼja, niŋ i ǹʼshi, niŋ i ǹʼnakili ji a daŋ i. 22Niŋ ɲaan ki tɛ, Musa i kali Misiratɔnŋ kiri wɔ ɲakilitinbi bi kiri bataa ra. Baraka wuru Musa wɔ wulu ki fa ntiŋ mabi kiri ru.

23Musa jiri yaafuuli kila-i waarinŋ wɔ̀ ru, ntiŋ tu a ra ta po a tindaŋ Isirayɛlitɔnŋ kiri tɛ. 24Ntiŋ i Misiratɔnŋ ki bɛɛ ja a tindaŋ Isirayɛlitɔnŋ ki bɛɛ makwulujuu-ra. Ntiŋ i ta a tindaŋ ki ŋununu kari tan, ntiŋ i Misiratɔnŋ ki bwɔ kilɛn. 25Musa cirasun tu afinŋ tindaŋ kiri ra ji-a ǹʼtɔ tu Kirinŋ a na arìbɛɛ mwu afinŋ baraka ra, nka kí niŋ tɔ-ri kì.

26Niŋ sisarifuluntɔnŋ, ntiŋ i ta fa a tindaŋ fuuli wu kari-ra. Ntiŋ i ji ǹʼtɛ a i kí bi de arìmaŋ nu, ntiŋ tu : ‹ Ábɛɛ i tindaŋ tenŋ ni i, á fa kari kì dɛ! › 27Nka konwɔtiŋ wuru a tindaŋ ki makwulujuu-ra, niŋ i Musa curu san nmaŋ, niŋ i ǹʼbi tu : ‹ Nkɛnŋ miŋ sɔɔ yibɛɛ ŋununtiŋ, ŋi i ji yibɔɔ kitikwurutɔnŋ i? 28Miŋ fa ji ǹʼtɛ, ŋi i míŋ kilɛn miŋ tu miŋ Misiratɔnŋ ki kilɛn-i ɲaan wɔ̀ tɛ ciŋ kì dɛ? › 29Niŋ wulu kiri bimaan ki ra, Musa i bili tiri sɔɔ Madiyanŋ kɛniŋ ki ru. Ntiŋ i mari cɛn niŋ mani nu, ntiŋ i daŋ fuuli kila.

30Jiri yaafuuli fwuudemaan kɔɔtɛ sɛbɛ, Kirinŋ wɔ mɛlɛkɛn bɛɛ i a yɛri ji Musa wu jirinŋ doaŋ tuuɲɛntiŋ nu, ŋì i ntiŋ tu jaŋ ki faninmwuŋ Sinayi tɔnŋ ki kankantɛ. 31Musa niŋ jirinŋ doaŋ tuuɲɛntiŋ ki ja-i waarinŋ wɔ̀ ru, niŋ i bo ntiŋ tɔnŋ sun, ntiŋ i a kpari-ri ǹʼtɛ, tu a ra ǹʼnufɔɔ, Ŋuntiŋ ki i wulubi ntiŋ tɛ tu : 32‹ Mínki i miŋ tiŋ cɛɛnni kiri wɔ Kirinŋ ki i, Aburahamu, Ishaka fa Yakuba wɔ Kirinŋ ki. › Musa i kɛni, ntiŋ i tu sɛrɛsɛri-ra, ntiŋ jɛɛn ntiŋ i ǹʼshɛɛli kili kì.

33Ŋuntiŋ ki i ǹʼbi ntiŋ tɛ sɛbɛ tu : ‹ Nʼwɔ kari kiri san nʼkanŋ kiri ra, sabu miŋ tu-i mani wɔ̀ ru kaa, mani wɔlinŋ yɛ. 34Mɔ́ɔ́n konanbi ki i ɲaniŋ wɔ̀ ru, Misira kɛniŋ ki ru, míŋ niŋ ja-i. Kí cɔɔn wulu ki i ji so míŋ sun. Míŋ jɛri na-i, ŋí i na kí mwu. Dɔnsaŋ, na, ŋí nʼcin ta Misira kɛniŋ ki ru. › 35Isirayɛlitɔnŋ kiri arì kaan wuru Musa wɔ̀ tɛ, kí i ǹʼbi tu : ‹ Nkɛnŋ miŋ sɔɔ yibɛɛ ŋununtiŋ fa yi wɔ kitikwurutɔnŋ i? › Kirinŋ ninki yɛrima ki cin-i, niŋ i ta ji kí ŋununtiŋ ki fa kí mwutɔnŋ ki i, mɛlɛkɛn ki baraka ra, ninwɔ̀ a yɛri ji wuru ntiŋ wu jirinŋ doaŋ ki ru. 36Niŋ Musa ki Isirayɛlidaŋ kiri po san wuru Misira Kɛniŋ ki ru, kabakobi ri fa taanmashɛ ri mamaan ni wu niŋ kɛniŋ ki ru, baa ju kilɛn ki fwuumaŋ ki ru, niŋ fa jaŋ ki faninmwuŋ tirimaŋ ki ru, jiri yaafuuli ciiru.

37Mìŋ Musa tenŋ ki ǹʼbi wuru Isirayɛli nupo kiri tɛ tu : ‹ Kirinŋ a na míŋ bishi cintɔnŋ po ábɛɛ tindaŋ kiri kanfɛ. › 38Isirayɛlidaŋ kiri wuru jaŋ ki faninmwuŋ waarinŋ wɔ̀ ru, mìŋ Musa tenŋ ki wuru mɛlɛkɛn ki wɔ wulu ki raso-a yibɛɛ tiŋ cɛɛnni kiri sun Sinayi tɔnŋ ki sun. Kirinŋ i ji awɔ wulu barakamaan kiri wɔri mìntiŋ ki tɛ, ntiŋ i yìrì raso yibɛɛ tiŋ cɛɛnni kiri sun.

39Nka yibɛɛ tiŋ cɛɛnni kiri arì tu kí i ntiŋ wulu pa kì, kí i arì kaan ǹʼtɛ, kí i ji ǹʼtɛ arì i arì pwulu Misira kɛniŋ ki ru nmaŋ. 40Kí i ǹʼbi Aruna tɛ : ‹ kirinŋ ni namɔni wɔri yi tɛ, nwɔ̀ri ra yibɛɛ jɛnpa. Musa tɔ wɔ̀ yibɛɛ jɛnpa po san-i Misira kɛniŋ ki ru, finŋ wɔ̀ niŋ kila-i, yibɛɛ niŋ tɔ kì. › 41Niŋ shikaŋ, kí i naannaŋ bishi bɛɛ ramɔni. Kí i na saraka wɔri niŋ pɛli ki tɛ. Kí i ɲaannabyɛ sinaŋ tan arì gbɛɛra finŋ namɔnimaan ka tɛ. 42Niŋ na, Kirinŋ i a kɔɔye kí ra, ŋì i kí bo kirinpɔli la finŋ ni gbɛ sun, miŋ tu ǹʼsɛbɛ-i Kirinŋ wɔ cintɔnŋ kiri wɔ wulu sɛbɛ ki ru ɲaan wɔ̀ tɛ tu :

‹ Isirayɛlitɔnŋ ni, á fa npwulu-li tu ábɛɛ wuru áwɔ nafulufinŋ saraka kiri fa saraka tɔri kiri wɔri-ra mínki tɛ ka jiri yaafuuli ka ciiru kì dɛ!

43Ábɛɛ wuru juulinfu wɔ̀ ki shi de-a, ábɛɛ wuru niŋ shi de-a áwɔ tanfinŋ ki tɔ ra, nwɔ̀ tɔ i Mɔlɔki,

niŋ fa ábɛɛ wuru áwɔ pɛli Erefani wɔ sɔriniŋ ki shi de-a. Niŋ tanfinŋ kiri, ábɛɛ yɛrima kiri gbɛ kiri yìrì ramɔni-i, á i yìrì gbɛ-ri.#7.43 Sɛli ki ra, kí wuru juulinfu ki shi de-a Kirinŋ tɔ wu, kí i arɔɔ pɛli kiri ka-ri sɛbɛ. Niŋ ki ra, Kirinŋ i ǹʼbi tu afɔɔn fu ki wuru niŋ i kì.

Niŋ ki ra, míŋ a ábɛɛ rakɔli tiri fɔ Babilɔni#7.43 Babilɔni wuru kili i, nwɔ̀ wuru kɛniŋ bɛɛ ru, nwɔ̀ tɔ wuru tu Babilɔni sɛbɛ. kili ki kɔɔtɛ. › »

44Ecɛni i ǹʼbi sɛbɛ tu : « Nwɔ̀ i Kirinŋ wɔ fu ki bi ki i, ŋì i yibɛɛ tiŋ cɛɛnni kiri tu jaŋ ki faninmwuŋ, juulinfu wuru kí gbɛ, nwɔ̀ wuru ǹʼji-a tu Kirinŋ kí fan. Musa niŋ juulinfu ki ramɔni wuru miŋ tu Kirinŋ nʼji wuru ntiŋ wu ɲaan wɔ̀ tɛ. 45Niŋ tu-i yibɛɛ tiŋ cɛɛnni kiri gbɛ, kí i na ǹʼtu arì daŋ kiri tɛ. Nini fa arì jɛnpatɔnŋ Yosuwe i ǹʼshi na arì gbɛ kɛniŋ ka ru, Kirinŋ ninwɔ̀ ru tɔnŋ kiri kalikali po san wuru kí jɛŋ, ŋì i ǹʼwɔri kí tɛ, ŋì i ji kɔ́ɔ́. Niŋ juulinfu ki i tu kí gbɛ, fɔ ŋì i na so masa Dawuda wɔ sunŋ ki sun.

46Dawuda bidi wuru Kirinŋ tɛ, fɔ ntiŋ i na Kirinŋ nafɛ tu ŋì ncusun a i fu tan juulinfu ki rucini, arìbɛɛ Yakuba nupo kiri ra so arɔɔ Kirinŋ ki gbɛ-i nwɔ̀ ru. 47Nka Dawuda danshuru Masa Solomani na-i niŋ fu ki tan.

48Nka yi fɔn i ǹʼtɔ-a tu, Kirinŋ a so kwun-i konanmini gbɛɛra fu tanmaan nu kì. Miŋ tu Kirinŋ wɔ cintɔnŋ ki bɛɛ ǹʼbi-i ɲaan wɔ̀ tɛ, tu Kirinsinaŋ ǹʼbi tu :

49‹ Kirinpɔli ki i mɔ́ɔ́n masawaalinŋ ki i.

Pwɔkulinŋ ki i ji míŋ kanŋ tumaŋ i, Ŋuntiŋ ki tu ninkunŋ.

Ábɛɛ ra nfɛnŋ ma fu tan míŋ tɛ kili?

Ɲaan tɔri tɛ, mani danwɔ nmaŋ kili,

tu míŋ a kwun nwɔ̀ ru, ŋì i ji míŋ nufaanmaŋ i?

50Mínki gbɛ ki nini bataa ramɔni kì wa? › »

51Ecɛni tu kí tɛ sɛbɛ : « Ábɛɛ koŋ tɔɔnnufuru kari, ábɛɛ kɔniŋ sɔɔ-ɔ peefɛ á firi kiri ru, nka ábɛɛ ciiru kiri rapwulu kì, á tɔɔn kiri rayemaan i ji-i Kirinŋ wɔ wulu ki jɛŋ. Ábɛɛ i Ɲiniwɔlinŋ ki sɔsɔ-a waarinŋ bataa ru á tiŋ cɛɛnni kiri sali. Ábɛɛ fa á tiŋ cɛɛnni kiri fɔn i tenŋ dɛ! 52Cintɔnŋ danwɔ ji nmaŋ tu ábɛɛ tiŋ cɛɛnni kiri nwɔ̀ makwulujuu-u kì? Cintɔnŋ wɔ̀ri wuru koŋ telimaan ki na wulu ki sunjo-a, kí nini kilɛn-i. Dɔnsaŋ, ábɛɛ ji-i niŋ koŋ telimaan ki janfatɔnŋ kiri fa ntiŋ kilɛntɔnŋ kiri i. 53Mɛlɛkɛn kiri Kirinŋ wɔ sariya ki wɔri-i ábɛɛ kiri tɛ, nka ábɛɛ tiri á i kɛɲɛ niŋ wu kì. »

Ecɛni beŋ ki

54Kitikwurutɔnŋ kiri niŋ wulu ki rama-i waarinŋ wɔ̀ ru, niŋ i kí tɔnŋ kiri ŋɔni. Kí i arì ɲiinnaŋ kiri rataa-ri Ecɛni cɛfan. 55Nka, Ecɛni faamaan ki Ɲiniwɔlinŋ ki ra, ntiŋ i kirinpɔlila shɛɛli, ntiŋ i Kirinŋ nɔɔri ki ja, Yesu tu i ji ǹʼpantɛ. 56Ntiŋ tu : « Á ǹʼshɛɛli, míŋ ɲaniŋ i kirinpɔli ki rawwulumaan ki ra, Koŋ Danshuru ki tu-i ji Kirinŋ pantɛ. » 57Niŋ ma-i, kí i yaalinŋ cɛɛn, kí i arì tɔɔnta kiri raye. Kí bataa i cɛn byiri ntiŋ sun. 58Kí i ntiŋ cɛɛn po ta kili ki kɔɔtɛ, kí i ntiŋ jɛri-ri kwɔ ra, nwɔma arì i ntiŋ kilɛn. Kí i arɔɔ jɛrɛbi kiri bo ɲɔrɔkɔ bɛɛ kankantɛ, niŋ tɔ ki wuru tu Sɔɔli. 59Waarinŋ wɔ̀ ru, kí wuru Ecɛni jɛri-ra kwɔ ki ra, ntiŋ i rafɛ ka tan tu : « Ŋuntiŋ Yesu, míŋ ɲini ki mwu. »#7.59 Ka mani ka fa Yesu wɔ Kirinŋ nafɛ wulu ki po-i a kilɛntɔnŋ kiri bira, ninwɔ̀ i kila-a Luki 23.46 ki ru tu « Míŋ Tiŋ, míŋ a ɲini ki pwulu ábɛɛ sun. » 60Niŋ kɔɔtɛ, ntiŋ i a kwushiri fwuniŋ ki sun, ntiŋ i fali ntiŋ i ǹʼbi tu : « Ŋuntiŋ ki, á fa ka bijɛ ka shi kí cɛfan kì. » Niŋ bimaan ki kɔɔtɛ, ntiŋ i beeni.

Currently Selected:

Mabikiri 7: JOB

Highlight

Copy