Mabikiri 5

Ananiyasi fa Safira bi ki

1Shuru bɛɛ wuru nmaŋ sɛbɛ, nwɔ̀ tɔ wuru tu Ananiyasi, ntiŋ wɔ mari ki tɔ ki i ji tu Safira. Nini yɛrima ki i arɔɔ pwɔkulinŋ bɛɛ ju. 2Ananiyasi i ǹʼbɛɛ radu san ǹʼwari ki ra, ntiŋ i na ǹʼpyɛ ki wɔri cindaŋ kiri tɛ. Ntiŋ wɔ mari ki niŋ tɔ wuru-i.

3Pyɛɛri i ǹʼbi : « Ananiyasi, nfɛnŋ na miŋ i ncusun shitaanni i miŋ po puru bi ki sun Ɲiniwɔlinŋ ki tɛ ka ɲaan ka tɛ? 4A miŋ ji-ri nʼwɔ pwɔkulinŋ ki ju-ri kì, ǹʼwuru-ra ji tu-a mɔɔn bira nmaŋ kì wa? Hali ǹʼjumaan ki kɔɔtɛ, miŋ faan wuru ǹʼwari ki sun kì wa? Ka daalinŋ na ɲakilila ka jɛri miŋ ciiru dɔɔkunŋ? Miŋ puru bi konaŋ kiri tɛ kì dɛ! Miŋ puru bi-i Kirinŋ tɛ. »

5Ananiyasi niŋ wulu kiri rama-i waarinŋ wɔ̀ ru, ntiŋ i fɛɛn fwuniŋ sun, ntiŋ i beeni. Koŋ finŋ woo finŋ niŋ wulu ki rama-i, ŋì i kɛmi sinaŋ de nini bataa ru. 6Ɲɔrɔkɔ kiri i na ntiŋ kwuu ki sunye, kí i ǹʼshi, kí i ta ǹʼye. 7Lɛɛri byaŋ bishi fwuudemaan kɔɔtɛ, Ananiyasi wɔ mari Safira i na cindaŋ kiri maŋ ki ru. Bi wɔ̀ ma wuru nmari wɔ shuru ki wu, nmari niŋ tɔ-ri kì.

8Pyɛɛri i nmari ranɔri : « Sɛli yɛ tu ábɛɛ áwɔ pwɔkulinŋ ki ju-i tɔnŋ wɔ̀ ra, tu ábɛɛ niŋ jalinŋ ki bataa shi na kaa wa? » Safira tu : « Aawe, ǹʼbataa yɛ. » 9Niŋ na, Pyɛɛri i ǹʼbi nmari tɛ : « Ǹʼji dɔɔkunŋ ábɛɛ i fu ǹʼsun, á i Ŋuntiŋ ki ɲini ki darupo? Ayiwa, ǹʼshɛɛli, nwɔ̀ri ta-i mɔɔn shuru ki kwuu ki ye, kí i mani ki tɔnŋ na, kí a arì pwulu miŋ yɛrima ki wu nmaŋ sɛbɛ. »

10Mìŋ manaanŋ tenŋ ki ru, nmari i fɛɛn Pyɛɛri fɛ, nmari i beeni. Ɲɔrɔkɔ kiri de-i, kí i ta fa nmari beeni-i, kí i nmari kwuu ki shi, kí i ta nmari ye awɔ shuru ki kankantɛ. 11Niŋ bi kiri mamaan ki i kɛmi sinaŋ de bilinatɔnŋ kiri ru, ŋì i bo arì ramatɔnŋ ki bataa sun.

Cindaŋ kiri kabakobi mwɔɔnna wɔ̀ri ma-i

12Kabakobi ri fa taanmashɛ mwɔɔnna wuru ma-a cindaŋ kiri gbɛfɛ. Kí bataa wuru arìmaŋ nakɔli-la Kirinfusinaŋ ki tɔntɔɔ ki bɛɛ ru, ǹʼwuru bi-a nwɔ̀ tɛ tu Solomani wɔ Tɔntɔɔ. 13Koŋ pyɛ kiri tɔri tenŋ wuru arì ŋununfuru-ra ntiŋ i ta sɔɔ kí fan kì, nka konaŋ ki bataa wuru kí tɔ shɔɔrinŋ bi-a. 14Koŋ mwɔɔnna wuru bilinabi ki tan-a Ŋuntiŋ ki ra, shuru bo mari sun, kí i bo-ri bilinatɔnŋ kwuru ki sun jibi woo jibi. 15Konaŋ kiri wuru arɔɔ kiratɔnŋ kiri po bili-la gbangbaalinŋ ni fa byɛ ri sun, saa kiri tɔnŋ na. Kí wuru niŋ ma-a, nwɔma a Pyɛɛri ji de-a, ntiŋ miniŋ ki i so bili-i niŋ kiratɔnŋ kiri bɛɛ ri sun#5.15 Pyɛɛri miniŋ ki wuru bili-la kiratɔnŋ kiri sun, kí i kene-ni.. 16Konaŋ mwɔɔnna wuru po-a Yerusalɛmu tonfan kili kiri ra sɛbɛ, kí i na-ni arɔɔ kiratɔnŋ kiri fa ɲinijɛtiŋ kiri wu, nini fɔn i kene-ni.

Yesu wɔ cindaŋ kiri pa fuluntɔnŋ ki

17Niŋ ki ra, cindaŋ kiri ɲaannajuubi i de Kirinŋ tɛ sarakawɔrɔtɔnŋ kiri ŋununtiŋ sinaŋ ki fa a cɛfantɔnŋ kiri ru, nini wɔ̀ri wuru Sadusiyɛnŋ ni i. 18Kí i Yesu wɔ cindaŋ kiri pa bo nkasufu sinaŋ ki ru. 19Nka cii ki ru, Ŋuntiŋ ki wɔ mɛlɛkɛn ki bɛɛ i na nkasufu ki tɔnŋ kiri rawwulu, niŋ i kí po, ŋì i ǹʼbi kí tɛ : 20« Á tiri Kirinfusinaŋ ki ra, á i ta ka ɲaninkulutɔnbi ŋunaŋ ka wulu ki bataa bi konaŋ ki tɛ. »

21Kí i mɛlɛkɛn ki wɔ wulu ki pa, kí i sɔli tiri Kirinfusinaŋ ki ra, kí i ta konaŋ ki kali ki tɔnpa.

Kirinŋ tɛ sarakawɔrɔtɔnŋ kiri ŋununtiŋ sinaŋ ki fa a cɛfantɔnŋ kiri i Isirayɛlitɔnŋ kiri wɔ kitikwurutoŋ ki ru konaŋ ki bataa rakɔli. Kí i surudashi kiri bɛɛ ri bo ta nkasufu ki ru, tu kí i ta cindaŋ kiri po na. 22Surudashi kiri so-i nkasufu ki ru waarinŋ wɔ̀ ru, kí ta fa cindaŋ kiri wu nmaŋ kì, kí i arì pwulu na niŋ ɲaanbi kitikwurutoŋ ki tɛ. 23Kí tu : « Yibɛɛ ta-i nkasufu ki tɔnŋ nalaka shɔmaan kila a ɲaan tɛ, nkasufu ki ɲaannasuutɔnŋ kiri tu-i ji ǹʼtɔnŋ ki na arì tumaŋ kiri ru. Nka yibɛɛ nkasufu ki tɔnŋ ki rawwulu-i waarinŋ wɔ̀ ru, yibɛɛ koŋ tenŋ ja nmaŋ kì. » 24Kirinfusinaŋ ki ɲaannasuutɔnŋ kiri ŋununtiŋ ki fa Kirinŋ tɛ sarakawɔrɔtɔnŋ kiri ŋununtiŋ kiri niŋ wulu ki rama-i waarinŋ wɔ̀ ru, cindaŋ kiri bi ki i kí ciiru daalinŋ kɔ. Kí i arì yɛri ranɔri-ri tu niŋ kɔɔtɛ ki a na ji dɔɔkunŋ? 25Niŋ waarinŋ ki ru, koŋ bɛɛ i na ǹʼbi kí tɛ tu, kíbɛɛ koŋ wɔ̀ri bo-ri nkasu ki ru, tu kí Kirinfusinaŋ ki ra nmaŋ, kí i konaŋ ki kali-li. 26Niŋ na, Kirinfusinaŋ ki ɲaannasuutɔnŋ kiri ŋununtiŋ ki fa surudashi kiri bɛɛ ri i tiri cindaŋ kiri dɔri na tɔnsunfili la. Sabu kí wuru kɛni-na, tu konaŋ ki fa na arìbɛɛ jɛri kwɔ ra kì. 27Kí na-i so cindaŋ kiri wu kitikwurutɔnŋ kiri ɲaanfɛ waarinŋ wɔ̀ ru, Kirinŋ tɛ sarakawɔrɔtɔnŋ kiri ŋununtiŋ ki i ǹʼbi kí tɛ tu : 28« Yibɛɛ ǹʼbi furu ábɛɛ tɛ tu ábɛɛ fa koŋ kali ka Yesu bi ka sun kili kì kì wa? Nka, á ǹʼshɛɛli, ábɛɛ Yerusalɛmu faa-a áwɔ kalinŋ ki wu. Ábɛɛ i ǹʼtɛ á i niŋ koŋ ki cunŋ ki yɛkɛ ki fɛɛn yibɛɛ sun dɛ! » 29Nka Pyɛɛri fa cindaŋ kiri i ǹʼnupwulu tu : « Ǹʼkakan-i yibɛɛ i Kirinŋ wulu ki pa, ŋì i fwuu konaŋ kiri wɔ ki sun. 30Yibɛɛ tiŋ cɛɛnni kiri wɔ Kirinŋ ki Yesu ŋmɛni-i, ábɛɛ ninwɔ̀ kilɛn-i kpinkpisuu ki sun. 31Kirinŋ ntiŋ fɛshi-i, ŋì i ntiŋ ji Masa fa Mwutɔnŋ i, ŋì i ntiŋ sɔɔ a pantɛ, nwɔma tu, a Isirayɛlitɔnŋ kiri ntɔri bi, kí i na Kirinŋ tɛ, ŋì i kɔ́ɔ́ bijɛ kiri tu kí tɛ. 32Yibɛɛ i niŋ bi kiri shɛɛri kiri i, yibɛɛ fa Ɲiniwɔlinŋ ki, Kirinŋ i ninwɔ̀ wɔri-ra a gbɛtɔnŋ kiri tɛ. »

33Kitikwurutɔnŋ kiri niŋ wulu ki rama-i waarinŋ wɔ̀ ru, kí tɔnŋ i kwulu, kí i ji ǹʼtɛ arì i cindaŋ kiri kilɛn san arì ɲaanfɛ. 34Nka Farinsiyɛnŋ bɛɛ wuru nmaŋ, nwɔ̀ tɔ wuru tu Gamaliyɛli. Niŋ wuru sariya kalimɔɔ tɔtiŋ sinaŋ i, koŋ bataa wuru nwɔ̀ gbɛ-a. Niŋ i jɔrɔkɔ tu konaŋ ki faninmwuŋ, ntiŋ i ǹʼbi tu kí ka koŋ kari po taanna sun. 35Kí cindaŋ kiri po-i taanna waarinŋ wɔ̀ ru, Gamaliyɛli tu : « Isirayɛlidaŋ ni, á fa bi kulinŋ ma koŋ kari wu kì dɛ! 36Ǹʼcin-i sun kì, koŋ bɛɛ jɔrɔkɔ-i, ntiŋ tɔ ki wuru tu Tedasi. Niŋ i a yɛri ji koŋ tɔtiŋ sinaŋ i. Koŋ jankɔli (400) bishi ǹʼpa wuru ntiŋ cɛfan. Nka niŋ nakɔɔra na-i kilɛn. Koŋ finŋ woo finŋ ǹʼpa wuru niŋ cɛfan, nini fɔn i na jeɲe, niŋ bi ki i kɔ ninkunŋ nmaŋ. 37Niŋ fɔn kɔɔtɛ, nubitan waari ki ru, Galiletɔnŋ bɛɛ jɔrɔkɔ-i, nwɔ̀ tɔ wuru tu Yudasi. Ntiŋ i konaŋ mwɔɔnna kila bo a cɛfan. Niŋ i kilɛn sɛbɛ. Koŋ finŋ woo finŋ ǹʼpa wuru ntiŋ cɛfan, nini bataa i jeɲe.

38Niŋ ki ra, míŋ a ǹʼbi ábɛɛ tɛ, ńʼtu á á tɔnŋ po san koŋ kari bi ki bataa ru. Á i kí pani. A ka ɲakilila ka walima bi kari ji po-a konanmini nu, ŋì a li jibi bɛɛ. 39Nka, a ǹʼji po-a Kirinŋ nu, ábɛɛ ra so kí suu-u ǹʼsun kì. Á á yɛri kɔrɔshi, ábɛɛ fa na ji Kirinŋ karitiiri i kì dɛ! »

40Kitikwurutɔnŋ kiri i arì tu Gamaliyɛli wɔ wulu ki ra. Kí i cindaŋ kiri dɔri na, kí i kí bwɔ suulinŋ na. Kí i ǹʼbi furu kí tɛ tu kí fa Yesu wulu bi koŋ tɔri tenŋ tɛ kili kì. Kí i kí pani.

41Cindaŋ kiri i po san kitikwurumaŋ ki ru, kí i tiri. Kí ciirudi wuru-i, sabu kɔ́ɔ́ ɲaankwunŋ kilamaan ki Yesu bira, kí niŋ ji wuru gbɛbi i. 42Jibi woo jibi, ŋì i kí tu Kirinfusinaŋ ki ra walima kaniŋ kiri sun, kí wuru konaŋ kali-la ka Wulujii ka wu, tu Yesu Kirinŋ Ɲaannakonshimaan ki i.

Currently Selected:

Mabikiri 5: JOB

Highlight

Copy