Mabikiri 23

1Niŋ mani nu, Pooli i a ɲaniŋ da kitikwurutoŋ ki ra, ntiŋ i ǹʼbi tu : « Ńʼtindaŋ ni, fɔ ŋì i na so jiŋ sun, míŋ ciiru ki ńʼsɔsɔ-i ńʼtirika ɲaan ki sun Kirinŋ ɲaanfɛ sun kì. »

2 Kirinŋ tɛ sarakawɔrɔtɔnŋ kiri ŋununtiŋ bɛɛ wuru nmaŋ tu Ananiyasi. Niŋ Pooli wɔ wulu kiri rama-i waarinŋ wɔ̀ ru, niŋ tu ntiŋ tɔntɛtɔnŋ kiri ntiŋ bwɔ a tɔnŋ ki ru.

3Niŋ na, Pooli i ǹʼbi niŋ tɛ tu : « Kirinŋ yɛrima ki a na miŋ bwɔ, miŋ wulufuulibitɔnŋ ka a! Miŋ sɔɔ kwumaŋ, ńʼtu ŋi i kiti kwuru-ra ŋì i kɛɲɛ sariya ki wu, nka miŋ i ǹʼbi-ri tu kí míŋ bwɔ, niŋ dumiŋ i ji sariya ki sɔsɔ-a ji! »

4Koŋ wɔ̀ri wuru Pooli tɔntɛ, nini tu ntiŋ tɛ : « Miŋ i Kirinŋ tɛ sarakawɔrɔtɔnŋ ŋununtiŋ sinaŋ ki ki-a ka ɲaan ka tɛ kɛ! »

5Pooli tu kí tɛ : « Ńʼtindaŋ ni, míŋ ǹʼtɔ tu Kirinŋ tɛ sarakawɔrɔtɔnŋ ŋununtiŋ sinaŋ ki i kì. A niŋ ji-i kì, ǹʼsɛbɛ-i Kirinŋ wɔ wulu ki ru tu : ‹ Fa wulu kulinŋ bi nʼwɔ konanbi ki jɛntɔnŋ ki tɛ kì. › »#Pobi ki 22.27.

6Pooli ǹʼtɔ wuru tu kitikwurutoŋ ki kɛlinŋ tenŋ ki Sadusiyɛnŋ ni i, ǹʼkɛlinŋ tenŋ i ji Farinsiyɛnŋ ni i, niŋ na, ntiŋ i tu kí faninmwuŋ, ntiŋ i fali tu : « Ńʼtindaŋ ni, míŋ i Farinsiyɛnŋ i, ŋí i ji Farinsiyɛnŋ daŋ i. Yibɛɛ bili wɔ̀ tan-i ǹʼna tu konkwuu kiri ra ŋmɛni, niŋ ɲakilila ki i míŋ bo-a kiti ka ru kwumaŋ. »

7Pooli niŋ wulu ki bi-i mani wɔ̀ ru, sɔsɔɔlinŋ i jɔrɔkɔ Farinsiyɛnŋ kiri fa Sadusiyɛnŋ kiri faninmwuŋ, kitikwurutoŋ ki i rukila fuuli i. 8(Sadusiyɛnŋ kiri i ǹʼbi-a tu konkwuu kiri ra ŋmɛni kì, tu mɛlɛkɛn nmaŋ kì, niŋ fa tu ɲini fani dumiŋ nmaŋ kì, nka Farinsiyɛnŋ kiri i ǹʼbi-ri tu nini bataa sɛli, tu yìrì nmaŋ.)#Matiyu 22.23; Maraka 12.18; Luki 20.27. 9Niŋ i ji wulu sinaŋ kí faninmwuŋ. Farinsiyɛnŋ kiri wɔ sariya kalimɔɔ kiri bɛɛ ri i wulu ki shi fwuu wu, kí i fali shurubi wu tu : « Yibɛɛ kɔniŋ jɛ maŋ ja koŋ ka ra kì. Ŋì a so ji-i tu mɛlɛkɛn ki bɛɛ, walima ɲini kwuru ki bɛɛ wulubi ntiŋ tɛ! »

10Sɔsɔɔlinŋ ki i na kwulu, fɔ ŋì i kɛmi de surudashi kiri ŋununtiŋ sinaŋ ki ru, tu kí fa na ba kí i Pooli lucɛn arì faninmwuŋ kì. Ntiŋ i surudashi kiri bo, tu kí ta Pooli mwu san kí wu, tu kí i arì pwulu ta ntiŋ wu kubi ki ciiru.

11Niŋ cii ki ru, Ŋuntiŋ ki i a yɛri ji Pooli wu, ŋì i ǹʼbi ntiŋ tɛ tu : « Nʼtɔnnafuru. Miŋ míŋ wulu ki sunjo-i Yerusalɛmu kwumaŋ ɲaan wɔ̀ tɛ, miŋ kakan-i ŋi i ta ǹʼma mìŋ ɲaan tenŋ ki tɛ Ɔrɔmu sɛbɛ. »

Yawutu kiri wɔ ludemaan ki Pooli sun

12Niŋ sisarifuluntɔnŋ ki siira ki ru, Yawutu kiri bɛɛ ri i lude, kí i arì kɔni fɔ kí i arì yɛri danka tu arìbɛɛ ra nufinŋ walima ju mwunu Pooli kilɛnbali kì. 13Koŋ wɔ̀ri wuru niŋ lu ki sun, nini mwɔ wuru koŋ yaafuuli wu. 14Kí i ta Kirinŋ tɛ sarakawɔrɔtɔnŋ kiri ŋununtiŋ kiri fa cɛɛnni kiri tɛ, kí i ta ǹʼbi nini tɛ tu : « Yibɛɛ yi kɔni-i, yi i yɛri danka, tu yi a nufinŋ walima ju mwunu Pooli kilɛnbali kì. 15Niŋ ki ra, ábɛɛ fa kitikwurutoŋ ki fu ǹʼna, á i ta surudashi kiri ŋununtiŋ sinaŋ ki tɛ, tu ntiŋ Pooli wɔri á tɛ, á i ǹʼji miŋ tu ábɛɛ na-a ntiŋ wɔ bi ki rufɔɔka shɔ. Yibɛɛ kɔniŋ namɔnimaan yɛ, yi i ntiŋ suu saa ki ra, yi i ntiŋ kilɛn saa ki fan sana ntiŋ i so ábɛɛ sun kwumaŋ. »

16Nka ǹʼji ɲaan wɔ̀ tɛ woo, Pooli wɔ jiilinŋ bɛɛ i niŋ ludemaan ki wulu lama. Niŋ i bili ta surudashi kiri wɔ kubi ki ru, niŋ i ta niŋ bi Pooli tɛ. 17Niŋ ɲaan ki tɛ, Pooli i surudashi kwuru jɛntɔnŋ ki bɛɛ dɔri, ntiŋ i na ǹʼbi niŋ tɛ tu : « Ta ka ɲɔrɔkɔ ka jɛŋ surudashi kiri ŋununtiŋ sinaŋ ki tɛ, wulu i ntiŋ gbɛ, ntiŋ i ǹʼbi ntiŋ tɛ. »

18Niŋ surudashi kwuru jɛntɔnŋ ki i ta Pooli wɔ jiilinŋ ki jɛŋ surudashi kiri ŋununtiŋ sinaŋ ki tɛ, niŋ i ta ǹʼbi ntiŋ tɛ tu : « Nkasudaŋ Pooli míŋ dɔri-i, ntiŋ i ǹʼceeli míŋ gbɛ, tu míŋ na ɲɔrɔkɔ ka wu ábɛɛ tɛ, tu wulu ntiŋ gbɛ, ŋì i bi ábɛɛ tɛ. »

19Surudashi kiri ŋununtiŋ sinaŋ ki i ɲɔrɔkɔ ki pa a gbɛ sun, kí i ta kɛlinsun. Ntiŋ i ɲɔrɔkɔ ki ranɔri tu : « Nfɛnŋ wulu miŋ gbɛ ŋi i ǹʼbi míŋ tɛ? » 20Ɲɔrɔkɔ ki tu surudashi kiri ŋununtiŋ sinaŋ ki tɛ tu : « Yawutu kiri fu-i ǹʼsun tu arì ra na ábɛɛ rafɛ, tu ábɛɛ Pooli bo ta kitikwurutoŋ ki tɛ, arì i ǹʼji miŋ tu arì ta-a ntiŋ wɔ bi ki rufɔɔka shɔ. 21Nka á fa bili kí ra, á i á tu kì, sabu kɔ́ɔ́ koŋ kiri bɛɛ ri a na arì radu Pooli jɛŋ saa ki sun, kí i ntiŋ kilɛn. Niŋ koŋ kiri mwɔ-i koŋ yaafuuli wu. Kí arì kɔni-i, tu arìbɛɛ ra nufinŋ nu walima ju mwunu Pooli kilɛnbali kì. Kí ramɔni sɔɔmaan yɛ dɔɔ. Kí i finŋ wɔ̀ tenŋ suu-ra, niŋ i ábɛɛ i á tu, á i Pooli wɔri. »

22Niŋ na, surudashi kiri ŋununtiŋ sinaŋ ki i saa wɔri ɲɔrɔkɔ ki tɛ, ntiŋ i ǹʼbi furu niŋ tɛ tu, niŋ fa ncusun koŋ tɔri i niŋ wulu ki rama kili kì.

Surudashi kiri ŋununtiŋ sinaŋ ki a Pooli bo ta kɛnintiŋ Felikisi tɛ

23Niŋ kɔɔtɛ, surudashi kiri ŋununtiŋ sinaŋ ki i surudashi kwuru jɛntɔnŋ fuuli dɔri, ntiŋ i na ǹʼbi nini tɛ tu :

« Á surudashi koŋ yaabyinŋ (200), suutiŋ yaabyaŋ fa byinŋ (70), niŋ fa mwɔŋ keetɔnŋ yaabyinŋ (200) bo arìmaŋ sun, kí i arì ramɔni, nwɔma ciiku nukɔmaan kɔɔtɛ, kí i ta Sensare. 24Á i suu kiri bɛɛ ri ramɔni Pooli tɛ sɛbɛ, nwɔma ntiŋ shɔɔrinŋ i so kɛnintiŋ Felikisi sun. » 25Niŋ kɔɔtɛ, surudashi kiri ŋununtiŋ sinaŋ ki i ka sɛbɛ ka sɛbɛ wɔri ta kí gbɛ tu :

26« Míŋ Kulodi Lisiyasi i ka sɛbɛ ka wɔri ta-a ńʼwɔ kɛnintiŋ shɔɔrinŋ Felikisi tɛ. Á co.

27Míŋ i koŋ wɔ̀ bo ta-a ábɛɛ tɛ kaa, Yawutu kiri ntiŋ pa wuru-i, kí wuru juu-ra ntiŋ kilɛn. Míŋ fa ńʼwɔ surudashi kiri i ta ntiŋ mwu san kí wu, sabu míŋ ǹʼnama-i tu Ɔrɔmudanji i. 28Yawutu kiri wuru ntiŋ cɛfan ŋuŋ wɔ̀ ra, míŋ wuru ǹʼtɛ ŋí i niŋ tɔ. Niŋ na, míŋ i ta ntiŋ wu kɔ́ɔ́ kitikwurutoŋ ki ɲaanfɛ. 29Míŋ na-i ǹʼja tu kí ntiŋ cɛfan arì yɛri kiri wɔ sariya bi ri ra, a niŋ ji-i kì, ntiŋ bi tɔri tenŋ ma nwɔ̀ a ji sababu ntiŋ i kilɛn walima ntiŋ i bo nkasu ru kì. 30Niŋ kɔɔtɛ, kí i na míŋ tɔɔnnakwun tu ǹʼbɛɛ ri lude ntiŋ sun. Mìŋ manaanŋ tenŋ ki ru, míŋ ntiŋ bo na-i ábɛɛ tɛ, ɲa wɔ̀ri i ntiŋ cɛfan, ŋí i ǹʼbi nini tɛ, tu kí ta ntiŋ dɔri ábɛɛ ɲaanfɛ. Yi a ji faa. »

31Surudashi kiri i ǹʼma, miŋ tu ǹʼbi wuru kí tɛ ɲaan wɔ̀ tɛ. Kí i tiri Pooli wu mìŋ cii ki fan fɔ kili bɛɛ ra, nwɔ̀ tɔ wuru tu Antipatirisi. 32Niŋ sisarifuluntɔnŋ ki, surudashi kiri i suutiŋ kiri bo tiri Pooli wu, kíbɛɛ i arì pwulu kubi ki ru. 33Suutiŋ kiri so-i Sensare kili ki ra waarinŋ wɔ̀ ru, kí i ta sɛbɛ ki wɔri kɛnintiŋ ki tɛ, kí i Pooli ji ntiŋ wu. 34Kɛnintiŋ ki sɛbɛ ki kali kɔ-i waarinŋ wɔ̀ ru, ntiŋ i Pooli lanɔri tu ntiŋ po-a sɔɔta danwɔ ru. Pooli tu afinŋ po-a Silisi sɔɔta ki ru. 35Kɛnintiŋ ki tu Pooli tɛ tu : « Ɲa wɔ̀ri i miŋ cɛfan, a kí so kwumaŋ waarinŋ wɔ̀ ru, míŋ a mɔɔn kiti ki kwuru. » Ntiŋ tu kí ta Pooli bo Ɛrɔdi wɔ masafu ki ru.

Currently Selected:

Mabikiri 23: JOB

Highlight

Copy

Compare