Mabikiri 24

Yawutu kiri ta-i Pooli dɔri Felikisi tɛ

1Niŋ ɲaan ki tɛ, sunŋ taanŋ fwuudemaan kɔɔtɛ, Kirinŋ tɛ sarakawɔrɔtɔnŋ kiri ŋununtiŋ sinaŋ ki, nwɔ̀ tɔ wuru tu Ananiyasi, niŋ fa cɛɛnni kiri bɛɛ ri, ŋì i bo wulutɔtɔnŋ#24.1 wulutɔtɔnŋ : Niŋ i bi-a koŋ kaalipatɔnŋ kiri tɛ, ǹʼbɛɛ ri tu afoka. bɛɛ sun, nwɔ̀ tɔ wuru tu Tɛritulusi, kí i jɛri Sensare kili ki ru. Bi wɔ̀ wuru kí fa Pooli faninmwuŋ, kí i na niŋ ɲaanbi kɛnintiŋ Felikisi tɛ.

2Felikisi tu kí na Pooli wu. Ntiŋ na-i waarinŋ wɔ̀ ru, Tɛritulusi i wulu ki shi, ntiŋ tu : « Kɛnintiŋ Felikisi, ábɛɛ ǹʼnama tu yibɛɛ ɲaanfɛfili sinaŋ nu jiŋ, ábɛɛ yɛ. Ábɔɔ bi ɲaanpoka ɲaan ki bi shɔɔrinŋ mwɔɔnna so-i ka shiya ka sun. 3Yɔɔ coolinŋ mwɔɔnna i á tɛ niŋ bi kiri bataa bira waarinŋ bataa ru. 4Nka, nwɔma míŋ fa ábɛɛ yɛlika jitan kì, á ǹʼma áwɔ shɔɔrinŋ ki bira, á i á tɔɔnye yibɛɛ tɛ pyaanniŋ.

5Yibɛɛ ǹʼja-i, tu koŋ kaa finŋ jɛ yibɔɔ konanbi ki kanfɛ. Ntiŋ yibɔɔ konanbi ki bataa ciiru ɲakili lapwulu-i, mani ki bataa ru. Niŋ fa Nansarɛtitɔnŋ kiri wɔ pariti jɛntɔnŋ ki yɛ. 6Ntiŋ wuru ǹʼtɛ a i Kirinfusinaŋ ki yɛri ki nɔɔ. Niŋ waarinŋ ki ru, yibɛɛ i ntiŋ pa. [Yibɛɛ wuru ǹʼtɛ yi i kiti ki kwuru ntiŋ sun ŋì i kɛɲɛ yɔɔ sariya ki wu. 7Nka surudashi kiri ŋununtiŋ sinaŋ ki, Lisiyasi i na ntiŋ mwu san yibɛɛ wu faan sun. 8Niŋ kɔɔtɛ, ɲa wɔ̀ri wuru ntiŋ cɛfan, Lisiyasi i na ǹʼbi nini tɛ tu kí na ntiŋ dɔri ábɛɛ tɛ.] A ábɛɛ yɛrima kiri ntiŋ nanɔrika shɔ, yibɛɛ i ntiŋ kari-ra bi wɔ̀ri bira, ntiŋ yɛri ki a so nini bi-i ábɛɛ tɛ. »

9 Yawutu wɔ̀ri wuru nmaŋ, nini bataa i tu Tɛritulusi cɛru, tu niŋ nwɔ̀ bi, tu sɛli i.

Pooli a a ɲa kiri wulu sɔsɔ

10Niŋ kɔɔtɛ, kɛnintiŋ ki i wulu ki wɔri Pooli tɛ. Niŋ na, Pooli tu : « Yɔɔ kɛnintiŋ, míŋ ǹʼtɔ-i, ábɛɛ jiri mwɔɔnna ma-i ka shiya ka wɔ kiti kwuru ki ra kɔ. Niŋ ki ra, míŋ ɲakili sɔɔmaan a ńʼyɛri ŋununu wulu bi, ŋí i ǹʼji ábɛɛ wu tu míŋ bijɛ ma kì. 11Ábɛɛ yɛrima kiri ra so nanɔri tan-i, á i ǹʼtɔ tu míŋ na ki Yerusalɛmu, ŋí i na Kirinŋ gbɛ, tu niŋ fwuu sunŋ bwununfuuli sun sun kì. 12Koŋ míŋ fa koŋ kila sɔsɔɔlinŋ tan-a, walima ntiŋ i ńʼkila konaŋ ni nuye-a kili ki ru walima Kirinfusinaŋ ki walima kalinfu kiri bɛɛ ri ru walima mani tɔri ru kì. 13Kí i míŋ kari-ra bi wɔ̀ri bira, mani tɔri tenŋ kí gbɛ kí a so ǹʼji-i ábɛɛ wu ɲaan wɔ̀ tɛ, tu sɛli i kì.

14Nka, míŋ a ńʼtu nwɔ̀ ra ábɛɛ ɲaanfɛ, niŋ i kaa : Míŋ i baara ki ma-a yibɛɛ tiŋ cɛɛnni kiri wɔ Kirinŋ ki tɛ saa ŋunaŋ fan. Kíbɛɛ tu niŋ sɛli i kì. Niŋ i faa, míŋ bili-i sariya sɛbɛ ki fa cintɔnŋ kiri wɔ sɛbɛ kiri ru wulu kiri bataa ra. 15Gbɛbilimaŋ wɔ̀ i míŋ gbɛ Kirinŋ bi ki ru, miŋ tu mìŋ tenŋ ki i kíbɛɛ gbɛ ɲaan wɔ̀ tɛ, niŋ i kaa : Konkwuu kiri bataa ra ŋmɛni, koŋ telimaan kwuu bili koŋ telibali kwuu sun. 16Niŋ ki ra, míŋ i ńʼbanba-a waaci bataa ru, nwɔma míŋ ciiru ki fa ńʼsɔsɔ ńʼtirika ɲaan ki sun Kirinŋ fa konaŋ kiri ɲaanfɛ kì.

17Míŋ jiri mwɔɔnna ma-i Yerusalɛmu kɔɔtɛ, niŋ kɔɔtɛ ŋí i ńʼpwulu na nmaŋ, ŋí i na jalinŋ mwɔɔnna saan wu yibɔɔ shiya ki tɛ niŋ fa ŋí i na saraka wɔri Kirinŋ tɛ. 18Niŋ ɲaan ki tɛ, kí na-i fa míŋ wu niŋ wu fɔɔ bi ɲaan kiri rakɔmaŋ ki ru Kirinfusinaŋ ki ra. Konaŋ kwuru wuru míŋ fan nmaŋ kì, sɔsɔɔlinŋ dumiŋ wuru míŋ fa koŋ faninmwuŋ nmaŋ kì. 19Nka, Asi sɔɔta ki ru Yawutu bɛɛ ri wuru nmaŋ, nini kakan wuru-i kí i ji ábɛɛ ɲaanfɛ kwumaŋ dɔɔ, a míŋ ji bi wɔ̀ ma ǹʼpɔlimaan, kí i so niŋ bi-i. 20Walima waaci wɔ̀ ru, kí míŋ dɔri-i kitikwurutoŋ ki ɲaanfɛ, koŋ wɔ̀ri wuru niŋ mani nu, kí i ji kwumaŋ dɔɔ, tu bi pɔlimaan wɔ̀ ji kila míŋ mwɔɔn nu, tu nini niŋ bi á tɛ. 21Míŋ tu-i konaŋ ki kanfɛ, míŋ fali-i ŋí i ǹʼbi tu : ‹ Míŋ bili-i konkwuu kiri ŋmɛnibi ki ra, ninki ncin-i míŋ ji kiti ru ábɛɛ ɲaanfɛ. › Niŋ wuludaŋ tenŋ ki bantenŋ bimaan ki i míŋ pɔli-la wa? »

22Kɛnintiŋ Felikisi wulu mwɔɔnna nama wuru Ŋuntiŋ ki wɔ saa ki bi sun, ntiŋ i kiti ki pwulu bo jibi tɔri sun, ntiŋ tu kí tɛ : « Á tiri, waarinŋ wɔ̀ ru, surudashi kiri ŋununtiŋ sinaŋ Lisiyasi ja na, míŋ a na ábɔɔ kiti ki kwuru. » 23Niŋ na, ntiŋ tu surudashi kiri ta Pooli bo nkasu ki ru nmaŋ, nka tu kí fa ntiŋ fɔɔn kì, niŋ fa tu kí i ncusun ntiŋ wɔ wɔshuru kiri i so ntiŋ maku shɔ-i.

Pooli wɔ wulu ki kɛnintiŋ ki fa awɔ mari ki tɛ

24Sunŋ dama fwuudemaan kɔɔtɛ, kɛnintiŋ Felikisi i na awɔ mari ki wu. Niŋ mari ki wuru Yawutu u, nwɔ̀ tɔ wuru tu Durusili. Kí i koŋ bo ta Pooli dɔri na. Ntiŋ i na. Konanmini kakan-i ŋi i bili Yesu Kirisa ra ɲaan wɔ̀ tɛ, Pooli i niŋ bataa ɲaanbi kí tɛ.

25Kirinŋ i konanmini shɛɛli-la koŋ telimaan a ɲaan wɔ̀ tɛ, niŋ fa konanmini kakan-i ŋì i a yɛri pa bijɛ ki tɔntɛ ɲaan wɔ̀ tɛ, niŋ fa lahara kiti ki a ta ji ɲaan wɔ̀ tɛ, Pooli wɔ wulu kiri wuru nini ɲaanbi-a. Kɛnintiŋ Felikisi niŋ wulu kiri rama-i waarinŋ wɔ̀ ru, ntiŋ i kɛni, ntiŋ i ǹʼbi tu : « Jɔrɔkɔ ŋi i tiri sun, a míŋ na waarinŋ tɔri kila, míŋ a na miŋ dɔri sɛbɛ. »

26Ǹʼwuru ntiŋ cirasun sɛbɛ tu Pooli a wari wɔri afinŋ tɛ, niŋ ki ra, ntiŋ i Pooli dɔri na-ni a tɛ waarinŋ mwɔɔnna nu, kí i na bari ma-ni.

27Kí i jiri fuuli ma niŋ na ninkunŋ. Niŋ kɔɔtɛ, Pɔrisusi Fɛsitusi i na Felikisi ta ru kɛnintinbi ki sun. Nka Felikisi i Pooli tu nkasu ki ru nmaŋ, nwɔma a i a yɛri bidi Yawutu kiri tɛ.

Currently Selected:

Mabikiri 24: JOB

Highlight

Copy

Compare