Mabikiri 22

1Pooli tu kí tɛ Iburuwulu ki ru tu : « Míŋ tiŋ ni fa míŋ tindaŋ ni, ábɛɛ á tɔɔnye míŋ tɛ dɔɔ. Míŋ a ǹʼji ábɛɛ wu tu míŋ bijɛ ma kì. »

2Konaŋ kiri ǹʼja-i tu ntiŋ wulu ki bi-a arìbɛɛ tɛ Iburuwulu ki ru waarinŋ wɔ̀ ru, kí i arì tɔɔnyeka shɔ. Ntiŋ tu :

3« Míŋ i Yawutu u, nwɔ̀ ji-i Tarisi kili ki ra, Silisi sɔɔta ki ru, nka míŋ nakili-i Yerusalɛmu kwumaŋ. Míŋ ńʼwɔ kalinŋ ki bataa tan-i Gamaliyɛli gbɛ. Ninki míŋ kalika shɔ-i yibɛɛ tiŋ cɛɛnni kiri wɔ tagbɛ kiri bataa ra. Míŋ tɔnnabi ki bataa wuru Kirinŋ bi ki i, miŋ tu ǹʼyɔ ábɛɛ gbɛ ɲaan wɔ̀ tɛ jiŋ. 4Míŋ i saa ŋunaŋ wɔ̀ fan dɔɔ, míŋ wuru niŋ fan tiritɔnŋ kiri ɲani-na fɔ ŋí i ǹʼbɛɛ ri kilɛn-ni. Ŋí i kí pa-ri, ǹʼshuru bili ǹʼmari sun, ŋí i kí kɔli bo-ri nkasu ru. 5Kirinŋ tɛ sarakawɔrɔtɔnŋ kiri ŋununtiŋ ki fa cɛɛnni kwuru kiri jɛntɔnŋ kiri bataa i míŋ shɛɛri kiri i niŋ nu. Míŋ sɛbɛ ri kila wuru nini gbɛ, yìrì i ta wɔri Damasi kili ki ra yi tindaŋ Yawutu kiri tɛ. Míŋ wuru ta-a niŋ mani nu, nwɔma ŋí i ta bilinatɔnŋ kiri pa, ŋí i na kí kɔlimaan ki wu Yerusalɛmu kwumaŋ, nwɔma kí i na ɲani. »

Pooli bilinabi ki ma-i Yesu ra ɲaan wɔ̀ tɛ

6Pooli tu sɛbɛ : « Niŋ ɲaan ki tɛ, ŋì i míŋ tu saa ki fan, míŋ myɛmaan ki Damasi kili ki tɛ, sunŋ kwulu papa bɛɛ ra, manaanŋ tenŋ nu, manisarinŋ sinaŋ bɛɛ i po kirinpɔli ki ra, ŋì i na míŋ nakwunu. 7Míŋ i fɛɛn fwuniŋ sun niŋ fa míŋ i wulu bɛɛ rama, niŋ i ǹʼbi-ri míŋ tɛ tu : ‹ Sɔɔli, Sɔɔli#22.7 Pooli tɔ ki wuru tu Sɔɔli waarinŋ wɔ̀ ru, ntiŋ bilinabi ki ma-ni Ŋuntiŋ ki ra sun kì., miŋ míŋ cɔɔri-ra nfɛnŋ na? ›

8Míŋ i ǹʼnupwulu tu : ‹ Ábɛɛ nkɛnŋ, Ŋuntiŋ? › Wulu ki tu míŋ tɛ : ‹ Míŋ i Yesu ki i. Miŋ i nwɔ̀ ki cɔɔri-ra, míŋ yɛ, Yesu Nansarɛtitɔnŋ ki. › 9Míŋ tirishi kiri manisarinŋ ki ja-i, nka wulu wɔ̀ wuru bi-a míŋ tɛ, kí wuru niŋ nama-a míŋ fan kì.

10Míŋ i nanɔri tan tu : ‹ Ŋuntiŋ, míŋ kakan ŋí i nfɛnŋ ma? › Ŋuntiŋ ki tu míŋ tɛ : ‹ Jɔrɔkɔ, ŋi i tiri Damasi kili ki ru. Kirinŋ i ǹʼtɛ miŋ i bi woo bi ma, niŋ bataa ɲaan na ta bi fɔɔ miŋ tɛ niŋ mani nu nmaŋ. ›

11Manisarinŋ ki gbɛka jɛ ki, míŋ ɲaninaŋ kiri fwuu wuru-i, míŋ tirishi kiri i míŋ gbɛ pa de Damasi kili ki ciiru. »

12Pooli tu sɛbɛ : « Koŋ bɛɛ wuru kili ki ru nmaŋ, nwɔ̀ tɔ wuru tu Ananiyasi. Niŋ wuru kɛni-na Kirinŋ jɛŋ, ntiŋ i ǹʼwɔ sariya kiri bataa tirika shɔ-ri. Damasi kili ki ru, Yawutu kiri bataa wuru ntiŋ tɔ shɔɔrinŋ bi-a. 13Niŋ i na míŋ maŋ ki ru, ntiŋ i na tu míŋ kankantɛ, ntiŋ i ǹʼbi míŋ tɛ : ‹ Ńʼtindaŋ Sɔɔli, nʼɲaninaŋ kiri maannaja sɛbɛ. › Mìŋ manaanŋ tenŋ ki ru, míŋ ɲaninaŋ kiri i nawwulu, míŋ i Ananiyasi ja.

14Ntiŋ tu míŋ tɛ : ‹ Yibɛɛ tiŋ cɛɛnni kiri wɔ Kirinŋ ki miŋ ɲaannashi-i, nwɔma miŋ awɔ bi gbɛbilimaan kiri tɔ. Nwɔ̀ tenŋ pe telimaan yɛ, ŋì ncusun-i miŋ i niŋ ja, ŋi i ǹʼwulu lama, ŋì i po ǹʼyɛri ki tɔnŋ na. 15Niŋ ki ra, miŋ a ji ǹʼshɛɛri i. Miŋ bi wɔ̀ri ja-i, ŋi i nwɔ̀ri rama, miŋ a nini bataa sunjo konaŋ ki bataa tɛ. 16Dɔnsaŋ, fa ǹʼbi tu miŋ sɔɔ-ra ŋi i finŋ tɔri suu kili kì, jɔrɔkɔ kí i nʼwu, nwɔma nʼwɔ bijɛ kiri i wu san nʼna Ŋuntiŋ Yesu tɔ ki baraka ra. › »

Pooli cin-i shiya tɔri kiri tɛ ɲaan wɔ̀ tɛ

17« Niŋ bi kiri bataa kɔɔtɛ, míŋ i ńʼpwulu na Yerusalɛmu. Jibi bɛɛ, míŋ i ta Kirinfusinaŋ ki ra, ŋí i ta Kirinŋ nafɛ. Ŋì i míŋ tu Kirinŋ nafɛ ki ra, míŋ i jafinŋ bɛɛ ja. 18Míŋ i Ŋuntiŋ ki ja, ntiŋ i ǹʼbi-ri míŋ tɛ tu : ‹ Nʼnukwulu po san Yerusalɛmu kili ki ru, sabu miŋ a na finŋ woo finŋ bi míŋ bi ki sun, koŋ teennaanŋ a bili niŋ na kì. ›

19Míŋ i ǹʼnupwulu tu : ‹ Ŋuntiŋ, kí yɛrima ki ǹʼtɔ-i tu míŋ de kalinfu kiri ru, ŋí i ta miŋ na bilinatɔnŋ kiri pa, nwɔma kí i ta bo nkasu ru, kí i bwɔ. 20Kí miŋ shɛɛri Ecɛni kilɛn-i jibi wɔ̀, míŋ yɛri ki wuru nmaŋ. Míŋ ńʼtu-i Ecɛni kilɛn ki ra, míŋ yɛrima ki i ntiŋ kilɛntɔnŋ kiri wɔ jɛrɛbi kiri pa kí tɔntɛ, ŋí i yìrì ɲaannasuu-ri. ›

21Niŋ fa a fɔn na, Ŋuntiŋ ki tu míŋ tɛ : ‹ Tiri, sabu míŋ a miŋ cin mani narimaŋ nu shiya tɔri kiri tɛ. › »

Pooli tu surudashi kiri ŋununtiŋ sinaŋ ki tɛ tu afinŋ Ɔrɔmudanji i

22Konaŋ ki a tɔɔnye wuru Pooli wɔ wulu kiri tɛ, fɔ ntiŋ tɔnŋ i na so a cin wulu ki sun shiya tɔri kiri tɛ. Kí i fali, kí i ǹʼbi tu : « Ka koŋ kwuru ka kakan-i ntiŋ i kilɛn! Ntiŋ ɲaninkulutɔnŋ kakan ŋì i tu kì! » 23Kí i yaalinpo, kí i arɔɔ jɛrɛbi kiri san arì sun, kí i yìrì kee-ri. Kí i fwuu ki shi kee-ri kirina.

24Surudashi kiri ŋununtiŋ sinaŋ ki ǹʼja-i ninkunŋ, ntiŋ tu kí de Pooli wu kubi ki ru, kí i ntiŋ bwɔ shɛnŋ na fɔ ntiŋ i sɛli bi, ŋuŋ wɔ̀ ra konaŋ ki i yaalinpo-a ntiŋ kilɛnnama ki cɛfan. 25Waarinŋ wɔ̀ ru kí Pooli kɔli-i tu arì ra ntiŋ bwɔ, ntiŋ tu surudashi kiri wɔ kwuru jɛntɔnŋ ki tɛ tu : « Nʼyɛkɛtu! Ŋì i kɛɲɛ sariya ki wu, koŋ i Ɔrɔmudanji bwɔ-a shɛnŋ wu kiti ki fɛɛnbali ntiŋ sun wa? »

26Surudashi kwuru jɛntɔnŋ ki niŋ wulu kiri rama-i waarinŋ wɔ̀ ru, niŋ i bili ta surudashi kiri ŋununtiŋ sinaŋ ki tɛ, niŋ tu : « Ábɛɛ i ǹʼtɛ á i bi kwuru danwɔ ma kɔɔn? Koŋ ka i Ɔrɔmudanji i dɛ! »

27Niŋ ki ciiru, surudashi kiri ŋununtiŋ sinaŋ ki i a pwulu na Pooli lanɔri tu : « Sɛli ki ra, miŋ i Ɔrɔmudanji ncinŋ wa? » Pooli tu : « Aawe. » 28Surudashi kiri ŋununtiŋ sinaŋ ki tu Pooli tɛ : « Míŋ wari mwɔɔnna sali-i, ŋí i kila ŋí i niŋ tumaŋ ki kila dɛ! »#22.28 Koŋ wuru so-a Ɔrɔmu danjibi sɛbɛ ki sa-i jalinŋ na faantiŋ kiri gbɛ. Sɛbɛ wuru wɔri-ra nʼtɛ, miŋ tu nashɔnalite. Pooli tu : « Míŋ kɔniŋ ji-i ǹʼnu. »

29Niŋ wulu ki ramamaan ki sun, koŋ wɔ̀ri wuru-ra Pooli bwɔ, nini bataa i ta arì kɔɔtɛ. Nwɔ̀ wuru surudashi kiri ŋununtiŋ sinaŋ ki i, kɛmi i de niŋ nu, sabu ninki ǹʼbi wuru tu kí Pooli kɔli, niŋ i faa Ɔrɔmudanji i ji-i.

Pooli wɔ wulu ki kitikwurutoŋ ki tɛ

30Surudashi kiri ŋununtiŋ sinaŋ ki wuru ǹʼtɛ a i Yawutu kiri jɔrɔkɔ ŋuŋ ki tɔka shɔ Pooli cɛfan. Niŋ ki ra, niŋ sisarifuluntɔnŋ ki, ntiŋ i Pooli po, ntiŋ i Kirinŋ tɛ sarakawɔrɔtɔnŋ kiri ŋununtiŋ kiri fa kitikwurutoŋ ki bataa rakɔli. Niŋ kɔɔtɛ, ntiŋ tu kí na Pooli wu nini ɲaanfɛ.

Currently Selected:

Mabikiri 22: JOB

Highlight

Copy

Compare