Mabikiri 21

Pooli taka ɲaan ki Yerusalɛmu

1Niŋ ɲaan ki tɛ, yibɛɛ na-i so saa kila-i Milɛti bilinatɔnŋ kiri gbɛ waarinŋ wɔ̀ ru, yi i de kwurinŋ ki ru, yi i ta kili bɛɛ ra, nwɔ̀ tɔ i tu Kɔsi#21.1 Kɔsi wuru kili tɔ ɔ, ŋì i ji ju faninmwuŋ tintiŋ ki tɔ ɔ sɛbɛ.. Niŋ sisarifuluntɔnŋ ki, yi i so Ɔrɔdɛsi#21.1 Ɔrɔdɛsi wuru ju faninmwuŋ tintiŋ ki bɛɛ ɛ sɛbɛ.. Yi i po Ɔrɔdɛsi, yi i ta Patara kili ki ra. 2Niŋ mani nu, yi i ta kwurinŋ bɛɛ kila, niŋ i ta-ri Fenisi kɛniŋ ki ru. Yibɛɛ i de niŋ kwurinŋ ki ru, yi i tiri. 3Yibɛɛ ta-i fwuude, yi i Sipirɛ kɛniŋ ki tu yi kɛlinsun yi nɔrintɛ, yi i tiri Siri kɛniŋ ki ru. Niŋ mani nu, kwurinŋ ki i ta tu Tiiri kili ki ra, kwuruntumaŋ ki ru, sabu shii kiri kakan wuru yìrì i jɛri niŋ mani nu.

4Yibɛɛ i bilinatɔnŋ kiri bɛɛ ri kila niŋ kili ki ra, yi i sunŋ jɔnpɔni ma nini fan. Ŋì i kɛɲɛ Ɲiniwɔlinŋ ki wɔ wulu kiri wu, nini i ǹʼbi-ri Pooli tɛ, tu ntiŋ fa ta Yerusalɛmu kì. 5Yibɛɛ niŋ kufuluntɔnŋ ki rafaa-a kí fan waarinŋ wɔ̀ ru, yibɛɛ i saa ki pa. Bilinatɔnŋ kiri fa arɔɔ mari kiri fa arì daŋ kiri i po, kí i ta yibɛɛ bo fɔ kili ki kɔɔtɛ. Niŋ mani nu, yibɛɛ fa kí i yi kwushiri wɛɛlufinju ki tɔnŋ na, yi i Kirinŋ nafɛ. 6Niŋ kɔɔtɛ, yi coolinŋ kiri wɔri kɔ-i yimaŋ tɛ waarinŋ wɔ̀ ru, yibɛɛ i de kwurinŋ ki ru, kíbɛɛ i arì pwulu arɔɔ mani ni nu.

7Kwurinŋ ki po-i yibɛɛ wu Tiiri kili ki ra, yi i ta so Pitolemayisi kili ki ra, yibɔɔ ju sun tiri ki i kɔ niŋ mani nu. Yibɛɛ i ta coolinŋ bo niŋ mani nu bilinatɔnŋ kiri tɛ, yi i sunŋ tenŋ ma kí fan. 8Niŋ sisarifuluntɔnŋ ki, yibɛɛ po-i niŋ mani nu, yi i ta so Sensare kili ki ra. Yibɛɛ i ta jɛri Kirinŋ wɔ Wulujii bitɔnŋ Filipu wɔ mani nu. Yerusalɛmu bilinatɔnŋ kiri koŋ jɔnpɔni wɔ̀ri ɲaannashi wuru-i, Filipu#21.8 Filipu ɲaannashi wuru Yerusalɛmu bilinatɔnŋ kiri gbɛ nufinŋ lurama ki bira. Niŋ mani ki i ɲaanbi-a Mabikiri 6.5 ki ru. wuru nini bɛɛ tenŋ i. 9Danmari shurubitɔbali pyiiraŋ wuru ntiŋ gbɛ, nwɔ̀ri wuru Kirinŋ wɔ cintɔnŋ ni i.

10Yibɛɛ sunŋ dama ma-i Filipu wɔ mani ki ru. Ŋì i yibɛɛ tu niŋ mani nu, jibi bɛɛ, Kirinŋ wɔ cintɔnŋ bɛɛ i po Yude sɔɔta ki ru, ntiŋ i na nmaŋ sɛbɛ. Niŋ koŋ ki tɔ ki wuru tu Agabusi. 11Niŋ koŋ ki i na yibɛɛ tɛ, ntiŋ i Pooli wɔ nukɔlɔfinŋ ki shi, ntiŋ i a yɛri ki kanŋ kiri fa a gbɛ kiri kɔli, ntiŋ i ǹʼbi : « Ɲiniwɔlinŋ ki i nwɔ̀ bi-a niŋ i kaa : ‹ Yawutu kiri ra ta nukɔlɔfinŋ ka tiŋ ki ma ka ɲaan ka tɛ kɔɔn Yerusalɛmu, kí i ntiŋ de shiya tɔri konaŋ ni gbɛfɛ dɛ! › » 12Niŋ wulu ki sun, yibɛɛ fa kili ki ru bilinatɔnŋ kiri bataa i Pooli lafɛ, tu ntiŋ fa tunpa ta Yerusalɛmu kì. 13Nka Pooli tu yibɛɛ tɛ : « Nfɛnŋ na, ábɛɛ ŋuntan-ni kɔɔn, á i jurubi de-ri míŋ nu? Míŋ a ńʼtu ŋí i beeni Ŋuntiŋ Yesu bira, kí i ta ǹʼbi tu míŋ kɔlilama bantenŋ Yerusalɛmu wa? » 14Miŋ tu yibɛɛ so ntiŋ nasuu-u kì, yibɛɛ tu ntiŋ tɛ : « Ŋuntiŋ ki dintɛ bi ki ma! »

15Niŋ jibi kiri fwuudemaan ki kɔɔtɛ, yibɛɛ i yɔɔ finŋ kiri ramɔni, yi i yi bo Yerusalɛmu saa ki fan. 16Sensare kili ki ru bilinatɔnŋ kiri bɛɛ ri i tunpa ta yibɛɛ fan, kí i ta yibɛɛ jɛri Sipirɛtɔnŋ bɛɛ wɔ mani nu, nwɔ̀ tɔ wuru tu Minasɔn. Yesu ra bilinatɔnŋ jɔnɔ ki bɛɛ wuru niŋ koŋ ki i.

Pooli fa Yakuba wɔ maŋ kilamaan ki Yerusalɛmu

17Yibɛɛ somaan ki Yerusalɛmu, yibɛɛ na ki i di bilinatɔnŋ kiri tɛ, kí i yi ŋununafuka shɔ. 18Niŋ sisarifuluntɔnŋ ki, Pooli fa yibɛɛ i ta Yakuba tɛ awɔ mani nu. Yerusalɛmu bilinatɔnŋ cɛɛnni kiri bataa wuru niŋ mani nu sɛbɛ. 19Pooli i coolinŋ kiri wɔri kí tɛ. Niŋ kɔɔtɛ, Kirinŋ bi wɔ̀ri ma-i shiya tɔri kiri kanfɛ Kirinŋ wɔ wulu ki bimaan ki baraka ra, ntiŋ nini bataa tenŋ tenŋ ɲaanbi kí tɛ.

20Kí niŋ nama-i waarinŋ wɔ̀ ru, kí bataa i baraka bi Kirinŋ tɛ. Niŋ kɔɔtɛ, kí tu Pooli tɛ : « Yi tindaŋ, miŋ ǹʼja-a kì wa? Yawutu kiri waa mwɔɔnna bilinabi ki ma-i Yesu ra, niŋ fa a fɔn na, kí cɛrukɔlimaan i faa Kirinŋ wɔ cintɔnŋ Musa wɔ sariya kiri ra dɛ! 21Ǹʼna-i bi kí tɛ kwumaŋ, tu Yawutu wɔ̀ri sɔɔ shiya tɔri kiri kanfɛ, tu miŋ ǹʼbi nini tɛ tu, kí fa Musa wɔ sariya kiri rasɔɔ kili kì, tu kí fa arì daŋ kiri sɔɔpeefɛ kì, tu kí fa Yawutu kiri wɔ ladaŋ kiri rasɔɔ kì. 22Yi a ǹʼji dɔɔkunŋ sa! Sii ǹʼna ǹʼnu kì, kí a ǹʼtɔ tu miŋ so kwumaŋ. 23Niŋ ki ra, yibɛɛ ra nwɔ̀ bi miŋ tɛ, niŋ ma. Shuru pyiiraŋ i yibɛɛ gbɛ kwumaŋ, nwɔ̀ri arì tɔnye wuru Kirinŋ na. 24Nʼfa kí ta, á i ta á yɛri wu fɔɔ, ŋì i kɛɲɛ sariya ki wu. Miŋ yɛri ki i kí bataa wɔ ladaŋ na jalinŋ kiri sali, nwɔma kí ŋuniŋ kiri i shɛn. A niŋ ma, Yawutu kiri yɛrima kiri ra ǹʼtɔ tu, konaŋ kiri na finŋ woo finŋ bi miŋ bi ki sun, tu sɛli ǹʼnu kì. Sabu kí a na ǹʼja tu miŋ yɛri ki tiri-ra, ŋì i kɛɲɛ sariya ki wu.

25Nwɔ̀ i shiya tɔri kiri ru bilinatɔnŋ kiri bi ki i, yibɛɛ sɛbɛ wɔri ta-i kí tɛ, yi i yi ɲakilila ki bi kí tɛ, tu kí fa pɛlilashɛn taa kì, kí fa cunŋ nu kì. Finŋ fɔɔn finŋ wɔ̀ yɛ sun, ŋì i kilɛn, tu kí fa niŋ shɛn taa kì, niŋ fa kí fa nankulunbi ma kì. »#Mabikiri 15.29.

26Niŋ na, niŋ sisarifuluntɔnŋ ki, Pooli i a bo shuru pyiiraŋ kari sun, ntiŋ i ta a yɛri wu fɔɔ ladaŋ kiri tɔnpa kí fan. Niŋ kɔɔtɛ, kí i ta Kirinfusinaŋ ki ra, kí i ta arì wu ladaŋ ki rafaa jibi ki, niŋ fa kí tenŋ tenŋ ki wɔ saraka ki a na wɔri jibi wɔ̀ sun, kí i niŋ jibi kiri bi.

Pooli pa bi ki Kirinfusinaŋ ki ra

27Niŋ sunŋ jɔnpɔni ki wuru juu-ra rafaa waarinŋ wɔ̀ ru, Asi sɔɔta ki ru Yawutu wɔ̀ri Pooli ja-i Kirinfusinaŋ ki ra, nini i konaŋ kiri ruye, kí i ntiŋ pa. 28Kí i fali-li tu : « Isirayɛlidaŋ ni, á na doo! Á na! Koŋ wɔ̀ i Isirayɛlidaŋ kiri fa arɔɔ sariya kiri, niŋ fa Kirinfusinaŋ ka tɔ jɛ bi de-a mani kiri bataa ru, niŋ shuru ki i kaa. Ŋì i bo niŋ bataa sun, ntiŋ na-i Girɛki konaŋ kiri bɛɛ ri wu a fan, kí i na de Kirinfusinaŋ ki ru, kí i mani wɔlinŋ ka nɔɔ. »

29Efɛsitɔnŋ bɛɛ wuru Pooli fan, niŋ tɔ ki wuru tu Torofime. Miŋ tu konaŋ kiri ninwɔ̀ ja wuru Pooli fan kili ki ru, ǹʼwuru kí cirasun, tu Pooli fa ntiŋ de arìmaŋ fan Kirinfusinaŋ ki ru.

30Niŋ ɲaan ki tɛ, kili ki bataa i tu a kanŋ sun. Konaŋ ki i bili po yiri-ri kili ki mani ki bataa ru, kí i na-ni. Kí i na Pooli pa, kí i ntiŋ cɛɛn po san Kirinfusinaŋ ki kaniŋ ki ru, kí i ǹʼtɔnŋ kiri rala. 31Kí wuru ǹʼtɛ arì i Pooli kilɛn waarinŋ wɔ̀ ru, cinŋ i so Ɔrɔmutɔnŋ kiri wɔ surudashi ŋununtiŋ sinaŋ ki sun, tu Yerusalɛmu bataa jɔrɔkɔ tu a kanŋ sun. 32Mìŋ manaanŋ tenŋ ki ru, ntiŋ i a bo surudashi kiri bɛɛ ri fa jalitiŋ kiri bɛɛ ri jɛŋ, kí i bili ta konaŋ ki maŋ ki ru. Konaŋ ki surudashi ŋununtiŋ sinaŋ ki fa surudashi kiri ja-i waarinŋ wɔ̀ ru, kí i Pooli bwɔ ki tɔnbo.

33Surudashi ŋununtiŋ sinaŋ ki i na Pooli pa. Ntiŋ tu surudashi kiri Pooli kɔli jɔlɔkɔ fuuli wu. Pooli kɔlimaan ki kɔɔtɛ, surudashi ŋununtiŋ sinaŋ ki i nanɔri tan tu : « Nkɛnŋ? Wú nfɛnŋ ma? » 34Konaŋ kiri bɛɛ ri wuru fali-la, koŋ fɔn i a ɲaanna wulu bi-ri, ǹʼtɔri fa ǹʼtɔri wɔ wuru tenŋ i kì. Surudashi ŋununtiŋ sinaŋ ki so wulu fɔɔmaan tenŋ kila-i ka wulu ɲaanmimaan kari ru waarinŋ wɔ̀ ru kì, ntiŋ tu kí tiri Pooli wu surudashi kiri wɔ kubi ki ru#21.34 Ɔrɔmu wɔ surudashi kiri sɔɔmaŋ ki wuru niŋ i. Masa Ɛrɔdi jɔnɔ ki niŋ fu sinaŋ ki tan wuru-i, ǹʼtɔ ki i ji tu Antoniya radumaŋ i.. 35Kí so-i tunpafinŋ ki sun waarinŋ wɔ̀ ru, surudashi kiri i Pooli shi, sabu konaŋ ki juuka jitan wuru-i, 36fɔ kí bataa wuru fali-la ntiŋ cɛfan, tu ntiŋ kilɛn.

Pooli i a yɛri ŋununu wulu bi-a

(Mabikiri 9.1–19; 26.9–20; Galasitɔnŋ kiri 1.11–16; Timote (1) 1.12–17)

37Waarinŋ wɔ̀ ru, kí wuru-ra de Pooli wu kubi ki ru, ntiŋ tu surudashi ŋununtiŋ ki tɛ Girɛkiwulu ki ru tu : « Ábɛɛ ra á tu míŋ wulu bɛɛ bi ábɛɛ tɛ wa? » Surudashi ŋununtiŋ ki tu : « Jaa miŋ i Girɛkiwulu ki rama-a! 38Misiratɔnŋ wɔ̀ a kaan a yɛri sun sunŋ dama ka ra, fɔ ntiŋ i tiri koŋ kilɛntɔnŋ waa pyiiraŋ (4.000) wu ɲɛninsinaŋ ki sun, miŋ niŋ i kì dɛ? »

39Pooli i ntiŋ wɔ wulu ki rupwulu : « Míŋ i Yawutu u, míŋ i po-a Tarisi kili ki ra, Silisi sɔɔta ki ru, míŋ i niŋ kili sinaŋ ki danji i. Míŋ i ábɛɛ rafɛ-a, á ncusun ŋí wulu bi konaŋ ki tɛ. »

40Surudashi ŋununtiŋ ki i a tu. Pooli i tu tunpafinŋ ki sun, ntiŋ i a gbɛ ruti konaŋ ki tɛ, tu kí arì gbansan. Konaŋ ki bataa a gbansan-i waarinŋ wɔ̀ ru, Pooli i wulubi kí tɛ Iburuwulu lu.

Currently Selected:

Mabikiri 21: JOB

Highlight

Copy

Compare