Korɛntitɔnŋ kiri (1) 15
15
Kirisa ŋmɛni bi ki
1Ńʼtindaŋ ni, míŋ i ǹʼtɛ ŋí i ábɛɛ ɲakilila bo Kirinŋ wɔ Wulujii ki tɛ, míŋ ninwɔ̀ bi-i ábɛɛ tɛ, ábɛɛ i ji nwɔ̀ tɛ, á i ji á sɔbɛ de ninwɔ̀ ru kusɛbɛ. 2Ábɛɛ i á mwu-a ninki baraka ra, a ǹʼta fa ábɛɛ ǹʼpa miŋ tu míŋ ǹʼbi-i ábɛɛ tɛ ɲaan wɔ̀ tɛ. A niŋ ma kì, ábɔɔ bilinabi ki ra ji ǹʼgbansanŋ i.
3Míŋ wɛri-i ŋí i kalinŋ wɔ̀ wɔri ábɛɛ tɛ, miŋ tu míŋ ǹʼkila-i ɲaan wɔ̀ tɛ, niŋ i kaa : Kirisa beeni-i yibɔɔ bijɛ kiri bira, miŋ tu Kirinŋ wɔ wulu ki ǹʼbi-i ɲaan wɔ̀ tɛ. 4Kí ntiŋ kwuu ki ye-i, niŋ sunŋ byantɔnŋ ki, ntiŋ i ŋmɛni, miŋ tu ǹʼsɛbɛ-i Kirinŋ wɔ wulu ki ru ɲaan wɔ̀ tɛ. 5Ntiŋ a yɛri ji-i Pyɛɛri wu, niŋ kɔɔtɛ, ntiŋ i a yɛri ji awɔ cindaŋ bwununfuuli ki wu sɛbɛ.
6Niŋ kɔɔtɛ, ntiŋ a yɛri ji-i tindaŋ bilinatɔnŋ wɔ̀ri wu manaanŋ tenŋ nu, nini mwɔ-i koŋ jankɔli fa yaataanŋ (500) wu. Nini bɛɛ ri kɔniŋ beeni-i, nka mwɔɔnna i faa arì ɲaanna hali jiŋ. 7Niŋ kɔɔtɛ, ntiŋ a yɛri ji-i Yakuba#15.7 Yakuba : Niŋ Yakuba ki wuru Yesu pwaŋ ki i. wu. Niŋ kɔɔtɛ, ntiŋ i a yɛri ji awɔ cindaŋ kiri bataa wu.
8Nini bataa kɔɔtɛ, ntiŋ a yɛri ji-i míŋ yɛrima ki wu, míŋ i ji miŋ tu cindaŋ kiri wɔ ɲɛnakɔɔra, koŋ ɲakili wuru nwɔ̀ ra kili kì. 9Míŋ i Yesu wɔ cindaŋ kiri bataa ru pyaanŋ ki i. Míŋ yɛri kakan-ni, ŋí i dɔri Yesu wɔ cindaŋ i kì, sabu míŋ Kirinŋ wɔ bilinatɔnŋ kwuru ki ɲaanfɛkwulu-i kusɛbɛ. 10Míŋ i nwɔ̀ jiŋ, míŋ i niŋ i, Kirinŋ wɔ shɔɔrinŋ ki baraka ra. Kirinŋ shɔɔrinŋ wɔ̀ ma-i míŋ tɛ, niŋ ji bi tawɔ ɔ kì, sabu míŋ baara ma-i ŋí i fwuu cindaŋ pyɛ kiri bataa sun. Nka míŋ yɛrima ki niŋ ma ńʼyɛri ki faan wu kì dɛ! Kirinŋ shɔɔrinŋ wɔ̀ ki ma-i míŋ tɛ, niŋ faan ki ǹʼma-i. 11Niŋ ki ra, ǹʼpo míŋ tɔnŋ na woo, ǹʼpo cindaŋ pyɛ kiri tɔnŋ na woo, yi bataa i mìŋ wulu tenŋ ki sunjo-a, ábɛɛ i ji bili mìnki ra.
Konkwuu kiri ŋmɛnibi ki
12A yibɛɛ ji Kirisa ŋmɛni wulu ki sunjo-a, nfɛnŋ na kpeeri kila-ri ábɛɛ kanfɛ, kí i ǹʼbi ri tu konkwuu kiri ra ŋmɛni kì?
13A konkwuu kiri ji-a ŋmɛni kì, niŋ i ǹʼji-a tu Kirisa yɛrima ki ŋmɛni kì. 14A Kirisa ji ŋmɛni po san konkwuu kiri kanfɛ kì, yibɔɔ waajulu ki ji-i ǹʼgbansanŋ i, ábɔɔ bilinabi ki i ji ǹʼgbansanŋ i sɛbɛ.
15Nwɔ̀ juu ǹʼbataa wu, ǹʼyɔ yibɛɛ ji-a puru yetiiri i Kirinŋ wu, sabu yibɛɛ ǹʼbi-i tu ŋì Kirisa ŋmɛni po san konkwuu kiri ru, a konkwuu kiri ji ŋmɛni-na kì, Kirinŋ yɛrima ki Yesu ŋmɛni kì kɛ! 16A konkwuu kiri ji ŋmɛni-na kì, Kirisa yɛrima ki ŋmɛni kì. 17A Kirisa ji ŋmɛni kì, ábɔɔ bilinabi ki ji-i ǹʼgbansanŋ i, á i ji faa áwɔ bijɛ kiri ru hali jiŋ. 18Bilinatɔnŋ wɔ̀ri beeni-i, nini tɔri a arì mwu kì. 19A yibɛɛ ji yi gbɛ bili Kirisa sun ka juniɲa ka bantenŋ bira, yi ǹʼtɔ tu yibɛɛ yɛli ŋì i fwuu ka juniɲa ka ru konaŋ kiri bataa sun.
20Nka sɛli ki ra, Kirisa ŋmɛni po san-i konkwuu kiri kanfɛ. Nwɔ̀ri beeni-i, Kirinŋ ntiŋ ŋmɛni ji-i nini wɔ koŋ jɔnɔ ki i, ŋì i ǹʼfɔɔ ji tu konkwuu kiri bataa ra ŋmɛni.
21Miŋ tu beŋ ki na-i koŋ tenŋ sababu ra ɲaan wɔ̀ tɛ juniɲa ki ru, mìŋ ɲaan tenŋ ki tɛ, konkwuu kiri ŋmɛnibi ki na-i koŋ tenŋ sababu ra. 22Koŋ bataa i beeni-a sabu kí po-i Adama nu, mìŋ ɲaan tenŋ ki tɛ, koŋ bataa ra ŋmɛni Kirisa sababu ra.
23Nka niŋ firi kiri ŋmɛnibi ki a na ji san amaŋ jɛŋ ka ɲaan ka tɛ : Kirisa ji-i ǹʼjɔnɔ ki i, ntiŋ pwulu na waaci ki ru, nwɔ̀ri ji-i ntiŋ wɔ konanbi ki i, nini a ŋmɛni gban ntiŋ na.
24Niŋ fwuudemaan ki kɔɔtɛ, waaci rakɔɔra ki ra so. Kirisa a na ɲinijɛ kiri fa arɔɔ ŋununtinbi ki bataa wɔ so ki bataa kɔ, niŋ fa faantiŋ kiri wɔ faan ki bataa, ŋì i kila, ŋì i masabi ki wɔri Tiŋ Kirinŋ tɛ. 25Sabu Kirisa kakan-i ntiŋ i masabi ki ma, fɔ ntiŋ ɲa kiri bataa i na de ntiŋ kanŋ fɛ waarinŋ wɔ̀ ru. 26Ǹʼɲa nakɔɔra wɔ̀ a na haliki, niŋ i beŋ ki i. 27Sabu ǹʼsɛbɛ-i Kirinŋ wɔ wulu ki ru tu : « Kirinŋ finŋ ki bataa kulu ǹʼtɛ. »#Shu kiri 8.6. A ǹʼbi tu finŋ bataa kulu ǹʼtɛ, yi ǹʼtɔ tu Kirinŋ wɔ̀ ki niŋ finŋ kiri bataa kulu-i, tu niŋ ǹʼnu kì, sabu mìnki i finŋ ki bataa kulu-la Kirisa tɛ. 28A finŋ bataa ja kulu Kirisa tɛ waarinŋ wɔ̀ ru, Kirisa ninwɔ̀ i Danshuru ki i, niŋ yɛrima ki ra na a kulu Tiŋ Kirinŋ tɛ, ninwɔ̀ ki finŋ bataa kulu-i ǹʼtɛ. Niŋ ɲaan ki tɛ, Kirinŋ yɛrima ki ra na ji finŋ bataa ŋununtiŋ i.
29A konkwuu kiri ji ŋmɛni-na kì, nfɛnŋ na ǹʼbɛɛ ri i á yɛri wu-ri koŋ beenimaan ni ta ru? Nini niŋ ma-a nfɛnŋ na? A konkwuu kiri ji ŋmɛni-na kì, nini arì wu-a konkwuu kiri bira nfɛnŋ na?
30Yibɛɛ yɛrima kiri ji? A konkwuu kiri ji ŋmɛni-na kì, nfɛnŋ na yibɛɛ i yi yɛri wɔri-ri beŋ ki tɛ waaci bataa? 31Ńʼtindaŋ ni, míŋ i beŋ ki wɔ sɔɔ ru jibi bataa, nka sɛli ki ra, míŋ i ńʼyɛri ragbɛ-a ábɛɛ wu yibɛɛ Ŋuntiŋ Yesu Kirisa baraka ra.
32A konkwuu kiri ji ŋmɛni-na kì, míŋ cɔɔri wɔ̀ kila-i Efɛsi kili ki ra, miŋ tu koŋ fa kpalinŋ ni a ji kari-ra, niŋ a nfɛnŋ shɔ míŋ sun? A konkwuu kiri dumiŋ ji-a ŋmɛni ncinŋ kì, miŋ tu kí i ǹʼbi-a talinŋ i ɲaan wɔ̀ tɛ : « Yi i nufinŋ nu-ni, yi i mwunufinŋ mwunu-ni, sabu yi a beeni siri. »#Esayi 22.13. 33Á fa á yɛri sunnɛɛn kì dɛ! « Tirishi jɛ ki i koŋ bo-a saa jɛ fan. »#15.33 Pooli i Girɛki kiri wɔ wulutɔtɔnŋ bɛɛ wɔ wulu bi-a kwumaŋ. Ntiŋ tɔ ki wuru tu Menandiri. 34Á ɲakili kila, á i bijɛ ki tɔnbo. Sabu ábɛɛ ru, ǹʼbɛɛ ri Kirinŋ tɔ-a kì. Míŋ i niŋ bi-a, nwɔma ábɛɛ i ɲaankwun.
Konkwuu kiri ŋmɛnimaan kiri firi ki bi ki
35Ǹʼbɛɛ ri a so nanɔri tan-i tu : « Konkwuu kiri ra ŋmɛni dɔɔkunŋ? Kí a ŋmɛni firi kwuru danwɔ wu? » 36Koŋ kɛrɛbibali kiri shɛɛli dɛ! A ábɛɛ bilanaŋ ki firi, a ǹʼbeeni kì, ŋì a so shɛnpo-i wa? 37Ábɛɛ i nwɔ̀ firi-ra, niŋ i bilanaŋ bantenŋ i, ɲinaŋ walima bilanaŋ kwuru tɔri. Ábɛɛ bilaŋ shɛn ki yɛrima ki ye-a, ŋì i cɔ-ri kì.
38Nka Kirinŋ i ǹʼshɛnpo-a, ŋì i ǹʼji a dintɛ bilaŋ shɛn i. Kirinŋ i niŋ shɛn ki ji-a bali i, ŋì i daŋ po niŋ bali kiri ra, ŋì i kɛɲɛ arì kwuru kiri wu. 39Mìŋ ɲaan tenŋ ki tɛ, finŋ ɲaninkulutɔnŋ kiri bataa fa arì firi yɛ : konanmini ki wɔ ki po san-i nafulufinŋ kiri wɔ ki ru, ǹʼtɔri i ji ɲaannaanŋ kiri wɔ, ǹʼtɔri i ji yɛrinŋ kiri wɔ. 40Kirinpɔli la finŋ ni i nmaŋ, pwɔkulinŋ sun finŋ ni i ji nmaŋ. Kirinpɔli la finŋ kiri sarinŋ kiri i arì cinancinŋ pwɔkulinŋ sun wɔ kiri wɔ kiri ra. 41Sunŋ ki sarinŋ ki fa ɲɛ ki wɔ ki po kì, sɔriniŋ ki sarinŋ ki i ji ɲaan tɔri tɛ. Hali sɔriniŋ kiri sarinŋ kiri gbɛ-i arìmaŋ wu.
42Konkwuu kiri ŋmɛnibi ki a na ji mìŋ ɲaan ki tɛ. Firi wɔ̀ i ye-a ta ki ru miŋ tu bilanaŋ, niŋ i gbɛ-a, nka firi wɔ̀ i ŋmɛni-na, niŋ so-a gbɛ-i kì. 43Firi limaan ki i ye-a fwuniŋ ki ru, ǹʼnɔɔritiŋ ki i ŋmɛni. Firi baraka bali ki i ye-a, ǹʼbarakatiŋ ki i ŋmɛni. 44Konanmini firi gbansanŋ ki kwuu i ye-a, nka ntiŋ ja ŋmɛni, ntiŋ i ŋmɛni-na ɲini ki wɔ firi wu. Niŋ i ǹʼbi-a tu firi gbansanŋ ji nmaŋ, tu firi ɲininamaŋ nmaŋ sɛbɛ. 45Niŋ ki ra, ǹʼsɛbɛ-i Kirinŋ wɔ wulu ki ru tu : « Konanmini jɔnɔ ki, nwɔ̀ i Adama, Kirinŋ ɲini de-i niŋ nu, niŋ i ji konaŋ ɲaninkulutɔnŋ i. » Nka Adama fuluntɔnŋ ki, ninwɔ̀ i Kirisa, niŋ i ɲini i, ɲini nwɔ̀ i ɲaninkulutɔnbi ki wɔri-ra.
46Firi jɔnɔ ki i konanmini firi gbansanŋ ki i. Niŋ kɔɔtɛ, ɲini ki wɔ ki i gban niŋ na. 47Adama jɔnɔ ki po-i pwɔkulinŋ nu, nka Adama fuluntɔnŋ ki po yiri-i kirinpɔli la. 48Koŋ wɔ̀ po-i pwɔkulinŋ nu, niŋ nupo kiri bataa i niŋ sali. Koŋ wɔ̀ po-i kirinpɔli la, niŋ nupo kiri bataa ra na ji niŋ sali sɛbɛ. 49Nwɔ̀ po-i pwɔkulinŋ nu, yibɛɛ ji-i niŋ sali ɲaan wɔ̀ tɛ, nwɔ̀ po-i kirinpɔli la yi a na ji niŋ sali sɛbɛ mìŋ ɲaan tenŋ ki tɛ.
50Ńʼtindaŋ ni, míŋ i nwɔ̀ bi-a, niŋ kɔri ki i tu firi wɔ̀ i yibɛɛ ra kaa, tu niŋ a so Kirinŋ wɔ Masabi ki kila-i kì. Finŋ wɔ̀ a gbɛ, niŋ a so ɲaninkulutɔnbi kɔbali kila-i kì.
51Á ǹʼshɛɛli, míŋ a gonto bɛɛ bi ábɛɛ tɛ. Yi bataa ra beeni kì, nka yi bataa firi kiri ra rapwulu, 52manaanŋ tenŋ nu, ɲaanna la fa ɲaanna wwulu faninmwuŋ. A bwuru rakɔɔra ki fyɛ waarinŋ wɔ̀ ru, konkwuu kiri ra ŋmɛni firi ŋunaŋ ni wu, nwɔ̀ri ra gbɛ kili kì, koŋ pyɛ kiri firi kiri i rapwulu. 53Sɛli ki ra, yibɔɔ pwɔkulinŋ sun firi ki kakan-i ŋì i rapwulu ji firi gbɛbali i, firi wɔ̀ i beeni-a, niŋ i ji firi beenibali i. 54A firi gbɛ wɔ ki ja ji so ji-i firi gbɛbali i, firi beeni wɔ ki i ji firi beenibali i, niŋ waaci ki ru, nwɔ̀ bi-i Kirinŋ wɔ wulu ki ru, niŋ a nafaa, ǹʼtu :
« So kila-i beŋ ki sun.#Esayi 25.8.
55Beŋ, mɔɔn so ki da kili sa?
Beŋ, mɔɔn koŋ kilɛn mwɔŋ ki ta da sa? »#Ose 13.14.
56Beŋ ki wɔ koŋ kilɛn mwɔŋ ki i bijɛ ki i, bijɛ ki wɔ so ki i po-ri sariya ki ru. 57Yi baraka bi Kirinŋ tɛ, sabu mìnki i so wɔri-ra yibɛɛ tɛ yi Ŋuntiŋ Yesu Kirisa bira.
58Niŋ ki ra, ńʼtindaŋ byii ri, á á cɛrukɔli kusɛbɛ, á fa kɛni kì, á Ŋuntiŋ ki tɛ baara ki ma cunadibi wu. Á bili ǹʼna, tu ábɛɛ baara wɔ̀ ma-a Ŋuntiŋ ki tɛ, tu niŋ bi tawɔ ɔ kì.
Currently Selected:
Korɛntitɔnŋ kiri (1) 15: JOB
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
