Korɛntitɔnŋ kiri (1) 16
16
Jalinŋ nakɔli bi ki Yerusalɛmu bilinatɔnŋ kiri tɛ
(Ɔrɔmutɔnŋ kiri 15.25–27)
1Yentɛfinŋ wɔ̀ri i rakɔli ta-a Yerusalɛmu bilinatɔnŋ kiri tɛ, míŋ nwɔ̀ bi-i Galasi kɛniŋ ki ru bilinatɔnŋ kwuru kiri tɛ, á nʼma, á i ǹʼkɛɲɛ niŋ wu. 2Ku woo ku sunŋ jɔnɔ ki, a ábɛɛ fɔn tenŋ tenŋ jalinŋ wɔ̀ kila, ŋì i kɛɲɛ áwɔ so ki wu, á niŋ bo á tɔntɛ á gbɛ nmaŋ, nwɔma koŋ tɔri fa na míŋ na kì sunsuu-ri, kí i kila, kí i jalinŋ nakɔli ki tɔnpa-ri kì. 3A míŋ ja ta so ábɛɛ tɛ nmaŋ, míŋ a ta sɛbɛ tan bili buɲafinŋ ka sun, ŋí i ǹʼwɔri ábɛɛ yɛrima kiri wɔ koŋ ɲaannashimaan ni tɛ, kí i ta ǹʼwu Yerusalɛmu. 4A ǹʼji-a míŋ ta ŋuŋ po, míŋ a ta kí fan.
Pooli nwɔ̀ bi-i a tiri bi ki sun
5Míŋ a Maseduwanɛ kɛniŋ ki ruwɛli, ŋí i kila ŋí i so ábɛɛ tɛ, sabu míŋ i ǹʼtɛ ŋí i fwuude niŋ sɔɔta ki ru. 6Ŋì a so ji-i míŋ i ta waaci pyaanŋ ma ábɛɛ fan. A bi tɔri ma kì, míŋ a ta shii waaci ki ma ábɛɛ fan, nwɔma ábɛɛ i so ye-i míŋ tɛ, ŋí i ta ńʼtamaŋ kiri bataa ru.
7Míŋ i ǹʼtɛ, ŋí i ta ábɛɛ shɛɛli bantenŋ tan ŋí fwuude kì, nka míŋ i ǹʼtɛ ŋí i ta waaci ma ábɛɛ fan, a Ŋuntiŋ ki a tu. 8Nka míŋ i faa-ra tu Efɛsi fɔ ŋì i ta so Pantikɔti ɲaannabyɛ ki sun. 9Sabu Kirinŋ saa shɔɔrinŋ san-i míŋ tɛ, ŋí i so baara mwɔɔnna ma-i, ɲa kiri dumiŋ i ji mwɔ.
10A Timote ta so ábɛɛ tɛ waarinŋ wɔ̀ ru, á ǹʼma ɲaan bataa tɛ, á i ntiŋ siratu, sabu ntiŋ i Ŋuntiŋ ki tɛ baara ki ma-a, miŋ tu míŋ yɛrima ki. 11Á tɔri tenŋ fa ntiŋ nufyɛ kì, á ye ntiŋ tɛ, nwɔma ntiŋ i a pwulu so míŋ sun kwumaŋ jona, sabu míŋ fa tindaŋ pyɛ kiri i ntiŋ suu-ra.
12Nwɔ̀ i yibɛɛ tindaŋ Apolɔsi, míŋ ǹʼceeli-i niŋ gbɛ, tu niŋ i ta a kaashi kiri fan ábɛɛ tɛ, ntiŋ a tu ntiŋ i ta ka tiri ka sun kì, nka a ntiŋ na waaci fɛrɛmaan kila, ntiŋ a na ta nmaŋ.
Pooli wɔ wulu lakɔɔra kiri
13Á á ɲakili tu á yɛri ra waaci bataa ru, á i á cunadi bilinabi ki ra, á i á tɔnnafuru, á i á sunfuru. 14Á áwɔ bi kiri bataa ma bidintɛbi wu.
15Ábɛɛ Sitefani fa awɔ kaniŋ ki bi tɔ-i, tu kí ji Akayi sɔɔta ki ru bilinatɔnŋ jɔnɔ kiri i, niŋ fa tu kí i ji arì yɛri wɔri kí i ye Kirinŋ wɔ konanbi ki tɛ. Niŋ ki ra, 16míŋ ǹʼceeli-la ábɛɛ gbɛ, tu á á kulu niŋ koŋ ki fa a bishi baara matɔnŋ kiri tɛ. 17Míŋ ciirudi-i Sitefani fa Fɔritunatusi niŋ fa Akayikusi namaan ki ra míŋ tɛ, sabu nini ye-i míŋ tɛ ábɛɛ ta ru. 18Kí míŋ ɲakili ki sɔɔ tenŋ sun, miŋ tu kí ábɛɛ ɲakili ki sɔɔ tenŋ sun ɲaan wɔ̀ tɛ. Á niŋ konaŋ bishi kiri wɔ shɔɔrinŋ ki tɔ kí tɛ.
Pooli wɔ coolinŋ nakɔɔra ki
19Asi kɛniŋ ki ru bilinatɔnŋ kwuru kiri i ábɛɛ co-a. Akilasi fa Pirisili niŋ fa bilinatɔnŋ wɔ̀ri i arìmaŋ nakɔli-la kɔ́ɔ́ mani ki ru, nini i ábɛɛ co-a kusɛbɛ Ŋuntiŋ ki tɔ ki bira.
20Kwumaŋ bilinatɔnŋ kiri bataa i ábɛɛ co-a. Á ámaŋ co Kirinŋ wɔ bidintɛbi coolinŋ wu.
21Míŋ Pooli yɛrima ki ka coolinŋ ka sɛbɛ-i ńʼyɛrima ki gbɛ ki ra.
22Konwɔtiŋ Ŋuntiŋ ki bikwɔ a sun, Kirinŋ nintiŋ danka. Maranata! Niŋ kɔri i ki tu : Yibɛɛ Ŋuntiŋ ki, á na!
23Ŋuntiŋ Yesu shɔɔrinŋ ma á tɛ!
24Ábɛɛ bataa bi ki i míŋ tɔnŋ na, sabu yibɛɛ bataa i finŋ tenŋ i Yesu Kirisa ra.
Currently Selected:
Korɛntitɔnŋ kiri (1) 16: JOB
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
