Korɛntitɔnŋ kiri (1) 14

Cintɔnbi wulu bi ki fa wulu kwuru tɔri bi bi ki

1Ńʼtindaŋ ni á á banba, á i bidintɛbi ki ceeli, á i ji Ɲiniwɔlinŋ ki wɔ kafinŋ kiri tɛ. Á i cintɔnbi wulu kiri ceeli ŋì i fwuu kafinŋ pyɛ kiri sun. 2Konwɔtiŋ wulubi-a wulu kwuru tɔri ru, nintiŋ i wulubi-a konaŋ ni tɛ kì, ntiŋ i wulubi-a Kirinŋ tɛ, sabu koŋ ntiŋ wɔ wulu ki kɔri tɔ-a kì. Ntiŋ i gonto wulu li bi-a Ɲiniwɔlinŋ ki wɔ so ki wu. 3Nka konwɔtiŋ i cintɔnbi wulu bi-a, nintiŋ i wulubi-a konaŋ ni tɛ, ntiŋ i ye-ri kí tɛ, kí i gbɛ bilinabi ki ru, kí i cunadibi kila niŋ fa kí i siratubi kila. 4Konwɔtiŋ i wulu kwuru tɔri bi-a, nintiŋ i ǹʼbɛɛ bo-a a yɛrima ki wɔ bilinabi faan ki sun, nka konwɔtiŋ i cintɔnbi wulu bi-a, nintiŋ i ǹʼbɛɛ bo-ri bilinatɔnŋ kwuru ki bataa wɔ bilinabi faan ki sun. 5Ǹʼdi-i míŋ tɛ ábɛɛ bataa i wulu kwuru tɔri bi-ri, nka konwɔtiŋ i cintɔnbi wulu bi-a, niŋ di-i míŋ tɛ ŋì i fwuu wulu kwuru tɔri bi ki sun. Ŋi i cintɔnbi wulu bi, tɔnɔ i niŋ nu ŋì i fwuu wulu kwuru tɔri bi ki sun, fɔ a ǹʼbitɔnŋ ki ǹʼkɔri ki bi, nwɔma bilinatɔnŋ kiri i ǹʼtɔnɔ ki kila.

6Ayiwa ńʼtindaŋ ni, a míŋ ta ábɛɛ tɛ, ŋí i ta ńʼbo wulubi sun ábɛɛ tɛ wulu kwuru tɔri ru ábɛɛ nwɔ̀ tɔ-a kì, ábɛɛ ra nafan danwɔ kila niŋ nu? A mɔ́ɔ́n wulu ki fɔɔ ŋì i Kirinŋ wɔ bi ri ji-ri ábɛɛ wu kì, ǹʼdumiŋ tɔbi wɔri-ra á tɛ kì, cintɔnbi wulu dumiŋ i kì, ǹʼdumiŋ kalinŋ wɔri-ra á tɛ kì, niŋ a nfɛnŋ shɔ ábɛɛ sun?

7Yi wɔbwɔfinŋ kiri shɛɛli, miŋ tu kpilaaŋ fa kɔniŋ. A yìrì wulu kiri po san arìmaŋ nu kì, yìrì i wulu wɔ̀ bi-a, koŋ a niŋ dantɔ dɔɔkunŋ? 8Karidaŋ kiri i rakɔli-la bwuru wɔ̀ fyɛ wulu wu, a niŋ wulu ki ja fɔɔ kì, nkɛnŋ na a yɛri ramɔni kari tamaanna ki tɛ? 9Mìŋ ɲaan tenŋ ki tɛ, a ábɔɔ wulu ki fɔɔ kì, nkɛnŋ a ábɔɔ bi wɔ ki dantɔ? Ŋì i ji-a miŋ tu ábɛɛ wulu gbansanŋ bi-a. 10Wulu kwuru mwɔɔnna i juniɲa ciiru, nka ǹʼbataa daŋ i tɔ-ri. 11Nka míŋ wulu wɔ̀ dantɔ-a kì, konwɔtiŋ i niŋ wulu ki bi-a, nintiŋ i ji-a jɛ ɛ míŋ gbɛ, míŋ yɛrima ki i ji jɛ ɛ nintiŋ gbɛ.

12Miŋ tu Ɲiniwɔlinŋ ki wɔ kafinŋ kiri tɔ ki i ábɛɛ ru ɲaan wɔ̀ tɛ, kafinŋ wɔ̀ri i ǹʼbɛɛ bo-a bilinatɔnŋ kwuru ki wɔ jɛŋ ta ki sun, á nini mwɔɔnna ceeli.

13Niŋ ki ra, konwɔtiŋ i wulu kwuru tɔri bi-a, tu ntiŋ Kirinŋ nafɛ, tu ŋì niŋ ǹʼkɔri ki bi ki kafinŋ ki wɔri a tɛ sɛbɛ. 14A míŋ ji Kirinŋ nafɛ-a wulu kwuru tɔri ru, niŋ Kirinŋ nafɛ ki i ji-a míŋ ɲini ki wɔ, nka míŋ ɲakili ki faan ji-a ǹʼsun kì.

15Míŋ kakan ŋí i ǹʼdanwɔ ma? Míŋ a Kirinŋ nafɛ ńʼɲini ki wu, ŋí i ǹʼnafɛ ńʼɲakili ki wu sɛbɛ. Míŋ a Kirinŋ gbɛ shu pɔri ńʼɲini ki wu, ŋí i ǹʼpɔri ńʼɲakili ki wu sɛbɛ. 16A miŋ ji baraka bi-a Kirinŋ tɛ wulu kwuru tɔri ru, koŋ wɔ̀ri tɔɔnye-i miŋ tɛ, nini a « Amiina » bi dɔɔkunŋ mɔɔn baraka bimaan ki kɔmaan ki ra, sabu miŋ nwɔ̀ bi-i, kí niŋ dantɔ kì. 17Sɛli yɛ, mɔɔn baraka bimaan ki shɔ-i, nka miŋ kaashi kiri nafan kila ǹʼnu kì.

18Míŋ i baraka bi-a Kirinŋ tɛ, nwɔ̀ a tu-i míŋ i wulubi-ri wulu kwuru tɔri ru ŋì i fwuu ábɛɛ bataa sun. 19Nka bilinatɔnŋ kiri faninmwuŋ, a míŋ wuludaŋ taanŋ bantenŋ bi konaŋ kiri dantɔ wulu lu, niŋ pari-i míŋ tɛ wuludaŋ waa byinŋ (10.000) bimaan wu, wulu kwuru tɔri ru koŋ nwɔ̀ dantɔ-a kì.

20Ńʼtindaŋ ni, á fa bi kiri shɛɛli miŋ tu tiraŋ ni kì. Nka nwɔ̀ i bijɛ ki i, á ji miŋ tu tiraŋ ni, nka bi shɛɛlika ɲaan ki tɛ, á ji bwuumaan ni i. 21Ǹʼsɛbɛ-i sariya sɛbɛ ki ru tu Ŋuntiŋ Kirinŋ ǹʼbi tu :

« Míŋ a na wulubi koŋ kari tɛ shiya tɔri konaŋ ni tɔnŋ na,

hali niŋ fa a fɔn na, kí a na arì tɔɔnye míŋ tɛ kì. »#Esayi 28.11–12.

22Niŋ ki ra, wulu kwuru tɔri bi ki taanmashɛ bilinatɔnŋ kiri gbɛ kì, nka taanmashɛ yɛ bilinabali kiri gbɛ. Nka ŋi i cintɔnbi wulu bi, niŋ i taanmashɛ ɛ bilinatɔnŋ kiri gbɛ, nka niŋ taanmashɛ ɛ bilinabali kiri gbɛ kì.

23Ábɛɛ yɛrima kiri ǹʼshɛɛli, a bilinatɔnŋ kwuru ki a rakɔli, kí bataa i arì bo wulu kwuru tɔri bi sun, a bilinatɔnŋ tɔri walima bilinabali ki bɛɛ na fa kí wu, ntiŋ a ǹʼbi tu julu bo-a kí ru kì wa? 24Nka, a kí bataa ji cintɔnbi wulu bi-a, a koŋ tɔri walima bilinabali ta de kí kanfɛ, kí bataa wɔ wulu kiri ra ntiŋ ɲakili ki rapwulu, ntiŋ i ntɔri bi awɔ bijɛ mamaan kiri ra. 25Ntiŋ ciiru bi radumaan kiri ra po taanna, ntiŋ i a kwushiri, ntiŋ i a ɲaannu ki da fwuniŋ sun, ntiŋ i Kirinŋ gbɛ, ntiŋ i ǹʼbi tu « Sɛli ki ra, Kirinŋ i ábɛɛ fan! »

Kirinŋ gbɛmaanna gbɛbili ka ɲaan ki

26Ńʼtindaŋ ni, ábɛɛ kakan á i nfɛnŋ ma? A ábɛɛ ámaŋ nakɔli, a Kirinŋ gbɛ shu ji ǹʼbɛɛ gbɛ, nintiŋ niŋ pɔri. A wulu ji ǹʼbɛɛ gbɛ, ntiŋ koŋ pyɛ kiri kali niŋ na. A Kirinŋ ji wulu de ǹʼbɛɛ daru, nintiŋ niŋ bi. A ǹʼbɛɛ ji ǹʼtɛ, a i wulubi wulu kwuru tɔri ru, nintiŋ i niŋ bi. A ǹʼtɔri ji-a so niŋ wulu kwuru tɔri ki kɔri bi-i, nintiŋ i niŋ bi. Nka niŋ bataa ŋuŋ ki i tu ǹʼbɛɛ i bo bilinatɔnŋ kiri wɔ baraka ki sun. 27Nwɔ̀ri ra wulubi wulu kwuru tɔri ki ru, nini ji koŋ fuuli walima koŋ byaŋ i, ŋì fa fwuu niŋ sun kì. Kí wulu ki bi tenŋ tenŋ sun, koŋ i ji nmaŋ, nwɔ̀ a kɔ́ɔ́ wulu bimaan ki kɔri ki bi. 28Nka a koŋ kila nwɔ̀tiŋ a ǹʼkɔri ki bi kì, tu wulu kwuru tɔri bitɔnŋ ki a gbansan jama ki ru. Ntiŋ i ǹʼbi-ri a ciiru, a fa Kirinŋ faninmwuŋ.

29Nwɔ̀ri i cintɔnbi wulu ki bi-a, nini ji koŋ fuuli walima koŋ byaŋ i, ŋì fa fwuu niŋ sun kì. Ǹʼpyɛ kiri i arì tɔɔnye-ri, kí i niŋ wulu kiri rufɔɔ-ri. 30Ŋì i ǹʼbɛɛ tu cintɔnbi wulu ki bi-a, a Kirinŋ wulubi koŋ tɔri tɛ, nwɔ̀ i wulu ki bi-a, tu nintiŋ a gbansan. 31Niŋ ɲaan ki tɛ, ábɛɛ ra so cintɔnbi wulu ki bi wɔri-i ámaŋ tɛ tenŋ tenŋ sun, á i konaŋ ki bataa kali, nwɔma kí bataa i tɔnnafurubi kila. 32Cintɔnŋ kiri kakan-i kí i so arì yɛri pa-i, ŋì i kí tu cintɔnbi wulu ki bi-a. 33Sabu Kirinŋ bi ɲaanmimaan ki tɛ kì, fɔ ɲaanfɛfili.

Miŋ tu ǹʼyɔ ma-a Kirinŋ wɔ wɔlinŋ kiri bataa wɔ egilisi kiri ru ɲaan wɔ̀ tɛ, 34a ábɛɛ ji manjamaŋ kiri ru, tu mari kiri arì gbansan, sabu kí kakan kí i wulubi niŋ mani nu kì. Kí kakan-i kí i arì yɛri sunjɛri miŋ tu Kirinŋ wɔ sariya sɛbɛ ki i ǹʼbi-a ɲaan wɔ̀ tɛ. 35A kí ji ǹʼtɛ arì i bi ki bɛɛ ɲaantɔ, kí niŋ nanɔri arɔɔ shuru kiri ra kulu. Ǹʼshɔ mari ra, ŋì i wulubi bilinatɔnŋ kwuru kiri wɔ manjamaŋ ki ru kì.

36Ábɛɛ cirasun tu Kirinŋ wɔ wulu ki cɛtu ábɛɛ kiri gbɛ wa? Walima tu ǹʼso ábɛɛ bantenŋ tɛ wa? 37A konwɔtiŋ ǹʼbi tu afinŋ cintɔnŋ i walima tu Kirinŋ wɔ kafinŋ ki bɛɛ afinŋ gbɛ, ntiŋ kakan-i ntiŋ i ǹʼtɔ tu míŋ sɛbɛ wɔ̀ wɔri ta-a ábɛɛ tɛ kaa, tu niŋ Ŋuntiŋ ki wɔ cinŋ bimaan a. 38A konwɔtiŋ niŋ tɔ kì, niŋ i taanmashɛ ɛ tu Kirinŋ nintiŋ tɔ-a sɛbɛ kì.

39Niŋ na, ńʼtindaŋ ni, á cintɔnbi ki ceeli á faan ki bataa wu, nka á fa koŋ suu wulu kwuru tɔri bi ki sun kì. 40Nka, á á banba, á i bi bataa maka shɔ, niŋ fa ŋì i kɛɲɛ a maka ɲaan ki wu.

Currently Selected:

Korɛntitɔnŋ kiri (1) 14: JOB

Highlight

Copy

Compare