Korɛntitɔnŋ kiri (1) 13
13
Bidintɛbi ki
(Matiyu 22.36–40; Ɔrɔmutɔnŋ kiri 13.8–10; Yuhana 3.16–19; Yuhana (1) 4.7–21)
1Hali míŋ ji konanmini ni wɔ wulu li bi-a fɔ ŋí i mɛlɛkɛn kiri wɔ bi-ri,
a bidintɛbi ji míŋ nu kì,
míŋ finŋ tɔri tenŋ i wulu gbansanŋ bitɔnŋ niŋ fa tɛniŋ wulu ciniŋ kì.
2Hali míŋ ji cintɔnbi wulu bi-a,
ŋí i bi radumaan kiri fa finŋ fɔn kwuru tɔ-ri,
niŋ fa ńʼwɔ bilinabi ki i so-ri tɔnŋ ni jɔrɔkɔ san-i arì ta ru,
a bidintɛbi ji míŋ nu kì,
míŋ finŋ tɔri kì.
3Hali míŋ ji ńʼgbɛɛrafinŋ kiri bataa wɔri-ra gbɛwɔ ri tɛ,
niŋ fa ŋí i ńʼfiri ki wɔri tu ŋì bilituru kí bira,
a bidintɛbi ji míŋ nu kì,
niŋ a finŋ tɔri shɔ míŋ sun kì.
4Bidintɛ bi i konwɔtiŋ ciiru,
ntiŋ tɔnsunfili-i,
ntiŋ i bi shɔɔrinŋ ma-ni,
tɛnbi ji-a ntiŋ nu kì,
ntiŋ a yɛri ji-a kì,
ntiŋ dumiŋ a yɛri ragbɛ-a kì.
5Ntiŋ i koŋ ɲaankwunbi ma-a kì,
niŋ fa ntiŋ a tenŋ nafan ceeli-la kì.
Ntiŋ tɔnkwulumaŋ di kì,
ntiŋ tɛɛ tu-a a ciiru kì.
6Ntiŋ a ciirudi-a bi kɛrimaan na kì,
sɛli ki i ntiŋ ciirudi-a.
7Ntiŋ i koŋ bataa wɔ pɔli tu-a ntiŋ tɛ waaci bataa ru,
ntiŋ i bili-la bi bataa ra,
bi tɔri tenŋ ntiŋ gbɛɛratɛɛ-ra kì,
ntiŋ i bi bataa pa-ri a ra.
8Bidintɛ bi ki kɔ-a kì, nka cintɔnbi wulu kiri ra kɔ, wulu kwuru tɔri bi ki i ji-a kɔ, bitɔbi ki i ji-a kɔ mìŋ ɲaan tenŋ ki tɛ. 9Sabu yibɔɔ bitɔbi ki rafaamaan i kì, yɔɔ cintɔnbi wulu kiri rafaamaan i sɛbɛ kì. 10Nka a bi rafaamaan ki ja na waarinŋ wɔ̀ ru, bi rafaabali kiri ra kɔ.
11Ŋì i míŋ tu tiranbi ki ra, míŋ wuru wulu ki bi-a miŋ tu tiraŋ, ŋí i ńʼmiiri-ri miŋ tu tiraŋ, ŋí i bi kiri ja-ri miŋ tu tiraŋ. Nka míŋ na-i gbɛ, míŋ i tiranbi bi kiri tɔnbo. 12Dɔnsaŋ, yibɛɛ i finŋ wɔ̀ri ja-a, nini i miŋ tu koŋ finŋ miniŋ ja-a yɛrɛfɛri ru, nwɔ̀ jaka shɔ-a kì. Nka jibi bɛɛ, yi a na yìrì jaka shɔ fɛrifɛri. Dɔnsaŋ mɔ́ɔ́n bitɔbi ki rafaamaan i kì, nka jibi i jibi ru, míŋ a na finŋ bataa tɔka shɔ, miŋ tu Kirinŋ i míŋ tɔ-a ɲaan wɔ̀ tɛ.
13Ka bataa ciiru, finŋ wɔ̀ri kɔ-a kì, nini i bilinabi ki fa gbɛbilimaŋ ki, niŋ fa bidintɛbi ki i. Nka finŋ byaŋ kari ru, yìrì ru sinaŋ ki i bidintɛbi ki i.
Currently Selected:
Korɛntitɔnŋ kiri (1) 13: JOB
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.