Rut 4
4
Boas rezolve problema
1Boas baa iha odamatan boot tama ba sidade i tuur iha nebaa. Iha fatin nee, baibain lia nain sira iha sidade nee halibur hodi dada lia. Too ho too, nia familia ida tan nebee iha ‘direitu selu kotu’ para bele kaben ho Rut mos liu hosi nebaa. Entaun Boas bolu nia hodi dehan, “Maun! Mai tuur lai iha nee! Hau presiza ita.” I ema nee mos baa tuur iha nebaa. 2Depois Boas bolu lia nain sira, ema nain sanulu, para sai sasin hodi dehan, “Senhor sira mai tuur iha nee hodi rona lia nee.” I sira mos tuur.
3I Boas konta ba nia familia nebee iha ‘direitu selu kotu’ ba Rut dehan, “Maun, ita sei hanoin rai rohan ida nebee ita nia familia Elimeleke ninian nee, ka? Uluk, bainhira rai hamlaha, nia ba tiha rai Moabe, depois nia mate iha nebaa. Agora nia feen faluk senhora Noemi, fila ona hosi nebaa, i hakarak faan rai nee. 4Rona nunee, hau mos hanoin dehan: diak liu hau foo hatene uluk ba maun, tanba maun mak iha direitu para ‘selu kotu hodi foti’ rai nee. Tanba maun ho Elimeleke sei avoo ida deit. Entaun se maun hakarak sosa rai nee, dehan kedas, iha katuas lia nain sira nee nia oin, para sira sai hanesan sasin. Maibee se lae, dehan iha sasin sira nia oin, tanba hau hakarak sosa. Tuir loloos maun mak iha direitu uluk. Maibee se maun lakohi, entaun direitu nee monu ba hau.”
I ema nee hataan, “Loos ona. Hau mak sosa.”
5I Boas dehan tan, “Keta hirus, maibee maun tenki hanoin, se bainhira ita hola rai nee, ita mos tenki kaben ho feto Moabe, naran Rut. Tanba nia mak kaben ho Elimeleke nia oan nebee mate tiha ona. Nunee maun tenki kaben ho nia, hodi foo jerasaun ba nia laen nebee mate ona. I nunee, nia rai riku-soin nee la sai hosi ita nia familia.”
6Ema nee hataan, “Se nunee, keta hirus, hau lakohi sosa. Tanba se hau hola maka hau nia rai riku-soin lakon ona. Hau nia riku-soin ho hau nia oan sei sai irmaun Elimeleke nia jerasaun ninian. Nunee, diak liu hau lalika hola. Biar alin Boas deit mak selu kotu rai nee no kaben ho feto nee.”
7(Iha tempu uluk liu, bainhira ema Israel hakarak entrega sira nia direitu hanesan sasaan ruma ba ema seluk sosa, sira hasai sira nia sandalias foo ba ema nee. Nee hanesan sinal ida katak, sira entrega ona sira nia direitu.)#Deuteronomio 25:9
8Nunee iha tempu nee ema nee entrega nia direitu ba Boas dehan, “Ita deit mak sosa,” nia mos hasai nia sandalias foo ba Boas iha lia nain sira nia oin.
9I Boas dehan ba lia nain sira ho ema hotu iha nebaa dehan, “Senhor sira hotu sai sasin iha loron ida nee. Direitu nee monu ona iha hau. Hau foo hatene kedas dehan, hau hakarak selu kotu Noemi nia sasaan hotu-hotu nebee Elimeleke ho nia oan mane sira, Kilion ho Malon nebee mate tiha ona. 10Hau nia hakarak laos rai nee deit, tanba hau mos kaben ho feto ema Moabe, Rut nee, Malon nia feen faluk. Hau hakarak kaben ho nia, tanba hau selu kotu ona direitu nee. I nunee, ami nain rua nia oan bele sai Malon nia jerasaun. Nia familia ho ema sira iha aldeia sei la haluha nia naran. Imi mak sai sasin iha loron ida nee.”#Deuteronomio 25:5-6
11I lia nain sira iha sidade nee ho ema hotu nebee halibur iha nebaa hataan dehan, “Loos duni! Ami haree rasik ho ami nia matan. Ami mak sai sasin.
Feto nebee tama iha ita nia uma,
NAI halo nia sai hanesan Rakel ho Leia.
Tanba ema Israel hotu mai hosi sira nain rua nia jerasaun.
Nai halo ita sai ema boot iha Efrata,
i sai ema nebee naran diak iha sidade Belem.#Jenesis 29:31
12Husu boot, Nai foo ba ita, oan liu hosi feto foin sae nee,
nunee imi nain rua nia jerasaun sai barak,
hanesan ita nia bei-ala Peres nia jerasaun,
Juda ho Tamar nia oan.”#4:12:Tamar mos laos ema Israel. Nia kaben ho Juda hodi foo jerasaun ba nia laen nebee mate ona. Haree Jenesis 38.
Boas ho Rut hetan oan
13Entaun Boas kaben ho Rut. Bainhira sira nain rua hola malu, NAI loke Rut nia oan fatin, para nia bele isin rua. I nia tuur ahi oan mane ida.
14Tuur ahi tiha hotu, feto sira iha Belem nee foo hatene ba Noemi dehan,
“Hahii ba NAI!
Tanba Nia foo ona jerasaun ba o,
para o nia familia nia naran la bele lakon.
Para labarik nee aban-bainrua sai ema boot iha Israel.
15Biar labarik nee
halo o senti klosan fila fali!
Biar labarik nee
tau matan ba o bainhira o ferik ona!
Tanba o nia feto foun nebee tuur ahi o nia bei-oan nee,
hatudu ona nia domin ba o.
Feto foun ida nee,
foo ba o diak liu dukee oan mane nain hitu.”
16Noemi kous tiha labarik nee, i kuidadu nia hanesan nia oan rasik.
17I feto sira iha sidade nee koalia dehan, “Agora Noemi hanesan iha fali oan. Nee laos halimar!” I sira foo naran ba labarik nee ‘Obede’.
Bainhira Obede boot mai, nia iha oan mane ida, naran Jesse. I Jesse iha oan mane ida, naran David, nebee sai liurai.
18Hirak nee, mak bei-ala Peres nia jerasaun:
Peres hetan oan Esron.
19Esron hetan oan Raun.
Raun hetan oan Aminadabe.
20Aminadabe hetan oan Nason.
Nason hetan oan Salmon.
21Salmon hetan oan Boas.
Boas hetan oan Obede.
22Obede hetan oan Jesse.
Jesse hetan oan liurai David.
Currently Selected:
Rut 4: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.