Rut 3
3
Rut ho Boas iha fatin sama trigu musan
1Iha loron ida, Noemi dehan ba nia feto foun Rut nunee, “Agora tempu too ona, hau buka mane ida atu foo ba o, para o bele iha uma kain rasik, nunee o bele moris hakmatek. Ka oinsaa?
2Rona didiak mai. O sei hanoin mane ida naran Boas nee ka? Nia mak prepara para o bele hili trigu iha feto serbisu sira nia kotuk. Nia familia ho ami, hosi hau nia laen nebee mate ona. Kalan nee ema barak sei baa iha sama trigu musan fatin. Boas mos sei ba iha nebaa. 3Hau nia hakarak nunee: O baa hariis tiha, tau mina morin no hatais ropa nebee diak. Depois o tuun baa iha sama trigu musan fatin. Maibee hein too Boas haan-hemu hotu ona, foin nia bele haree o iha nebaa. 4Haan hotu ona, nia sei ba toba. O haree didiak, nia toba iha nebee, tanba nakukun. Bainhira nia toba ona, o baa iha nebaa, loke nia manta i foo sinal ba nia,#3:4:Ema sira nebee matenek nain kona ba Biblia dehan, nee hanesan sinal 1) tanba Boas nudar familia nebee iha direitu tau matan ba Rut, i 2) Rut prontu se Boas hakarak kaben ho nia, tuir nia direitu. i o toba besik nia ain. Boas hatene nia kultura, nunee nia sei dehan ba o, saida mak o tenki halo.”
5Rut hataan, “Diak. Hau sei halo tuir nunee.” 6I nia tuun ba iha fatin sama trigu. I nia halo tuir hotu saida mak nia banin feto haruka.
7Bainhira Boas haan-hemu hotu ona, nia senti bosu. I nia baa toba iha trigu musan bou nia sorin. Hein too nia matan dukur, Rut baa nonook iha Boas nia fatin. I nia loke manta iha Boas nia ain, i nia toba iha nebaa. 8Mais-ou-menus iha kalan boot, Boas hakfodak hadeer. Nia fila aan, nia hakfodak, tanba iha feto ida toba hela iha nia ain. 9I Boas husu ba nia, “See mak nee?”
Rut hataan, “Hau Rut, ita nia atan feto. Maibee senhor mak iha ‘direitu atu selu kotu’ hau. Nee signifika katak senhor mak iha direitu kaben ho hau, hodi foo jerasaun ba hau nia laen nebee mate ona. Nee duni hau husu ba senhor taka hau ho manta rohan nee, hanesan sinal katak ita hakarak kaben duni ho hau.”#Ezequiel 16:8
10I Boas admira, nia mos dehan, “Hau husu ba NAI foo bensaun ba o! O bele deit buka mane hosi labarik klosan sira nebee riku ka kiak iha nee, maibee o la halo ida nee. O ema diak! Tanba o hatudu domin ho respeitu ba o nia laen nebee mate ona nia familia sira. O nia laran diak agora nee, boot liu fali dukee uluk o hatudu ba amaa Noemi. 11Entaun o keta tauk! Hau sei halo tuir o nia hakarak hotu. Lalika hanoin barak, tanba ema boot hotu iha sidade nee sira hatene ona dehan, o nee feto ida ke laran diak no badinas. 12Maibee agora sei iha buat ida atu dehan, hau o nia laen nebee mate ona nia familia nebee ‘iha direitu atu selu kotu’ o. Maibee iha ema seluk ida nebee besik liu dukee hau. Nunee nia mak iha direitu desidi para kaben ho o. Se nia lakohi, foin hau iha direitu.#Rut 2:20 13Entaun hau foo dalan nunee: kalan nee o hela iha nee deit. Aban mak hau baa koalia ho nia. Se nia prontu atu kaben ho o, la buat ida. Maibee se nia lakohi, hau jura hodi Maromak nebee Moris nia naran, hau rasik mak sei kaben ho o. Ita nia kultura dehan, hau ‘mak selu kotu’ o. Entaun toba deit iha nebaa too rai loron.”
14I Rut toba iha Boas nia ain. Iha aban dadeer rai huun mutin, Rut hadeer ona. Tanba Boas dehan tiha ona, “La diak se ema hatene kalan-kalan iha feto mai iha fatin sama trigu musan nee. 15Mai, tau o nia manta ba hau tau trigu.” I nia raut trigu dala neen tau iha Rut nia manta. Depois nia foti tau ba iha Rut nia kabaas. I Boas mos fila ba nia aldeia.#3:15:Biblia ho lian Ebreu la dehan tau iha bote boot. Maibee todan duni too Boas tenki ajuda foti tau ba Rut nia kabaas. Lian Ebreu hakerek deit dehan, “nia (mane, Boas)” fila ba aldeia. Maibee balu hakerek dehan, “nia (feto, Rut)” mak fila ba aldeia.
16Bainhira Rut too iha uma, nia banin feto husu ba nia, “Oinsaa hori kalan?”
Rut foo hatene hotu saida mak Boas halo ba nia, 17i dehan tan, “Nia mak foo trigu nee mai hau. I nia mos dehan, ‘O la bele fila ba o nia banin feto ho liman mamuk.’ ”
18I Noemi hataan, “Loos ona! Agora o tenki pasensia hodi hein. Tanba klaru ona katak, Boas hakarak rezolve problema nee i lakohi atu hein tan ona. Loos duni nia hakarak rezolve iha loron nee duni.”
Currently Selected:
Rut 3: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.