Rut 2
2
Rut serbisu iha Boas nia toos
1Iha Belem iha ema riku ida, naran Boas. Nia sei familia ho Elimeleke, Noemi nia laen nebee mate ona. Tuir ema sira iha nebaa, Boas nee, hanesan Noemi nia kunhadu.
2Iha loron ida, Rut, feto Moabe hosi rai liur nee, baa iha nia banin feto hodi husu, “Amaa! Hau bele baa toos hili trigu restu nebee monu iha ema sira serbisu nee nia kotuk, ka lae? [Tan Maromak nia lei hakerek dehan, husik ema kiak sira halo nunee.]#Levitiku 19:9-10; Deuteronomio 24:19; Deuteronomio 25:5-6 Keta halo be iha ema ruma hatudu nia laran diak mai hau. Bele, ka?”
Noemi hataan dehan, “Diak. Entaun ba ona.”
3I Rut ba iha toos ida hodi hili trigu restu nebee ema serbisu sira husik hela. Afinal, toos nee Boas ninian. Boas sei familia ho Elimeleke, Rut nia banin mane nebee mate ona.
4Bainhira Rut hili hela trigu restu, derepenti toos nain, Boas, mai hosi aldeia para haree nia ema sira serbisu nee. Nia hasee sira dehan, “Saloom! Biar NAI Maromak tau matan nafatin ba imi!”
Sira hataan dehan, “Saloom, senhor! NAI Maromak hatudu Nia laran diak ba ita!”
5Bainhira Boas haree feto ida nebee hili trigu, nia husu ba nia mandor dehan, “Feto foin sae ida nebaa, nia familia mak see?”
6Mandor nee dehan, “Nia nee, ema Moabe nebee foin fila hamutuk ho senhora Noemi. 7Ohin dadeer nia mai husu hau dehan, ‘Xefi! Hau bele baa hili trigu fulin restu nebee ema serbisu sira husik hela iha nebaa.’ I hau hataan dehan, ‘Bele!’ I nia serbisu makaas ona hosi dadeer too agora nee. Nia so deskansa ituan deit iha uma laleo nebaa.”
8I Boas baa koalia ho Rut dehan, “Mana! O ema matan foun, nee duni rona didiak hau lai. O hili trigu fulin restu iha nee deit, lalika muda ba ema seluk nia toos. Diak liu keta dook hosi labarik feto sira nebee serbisu mai hau iha nee. 9Haree didiak sira koa trigu iha nebee, i bainhira sira liu ona fatin nee, ita baa hili restu iha sira nia kotuk. Hau foo hatene ona ba mane sira iha nee para la bele book o. I se karik ita hamrook, ba hemu bee iha sira nia kantiil nebee sira tau bee ona.”
10Rona nunee, Rut hakneak too rai. I nia dehan, “Obrigadu, senhor! Maibee hau atu dehan buat ida. Karik senhor hatene ona, hau laos ema iha nee. Entaun tanba saa senhor tau matan mai hau, no hatudu laran diak mai hau?”
11Boas hataan, “Loos. Hau hatene ona. Maibee ema hotu iha nee konta dehan o hatudu o nia laran diak ba o nia banin feto bainhira o nia laen mate ona. Sira mos konta dehan o husik hela o nia inan-aman ho o nia rain moris fatin, hodi mai iha ema seluk nia leet, maski la hatene sira.
12Nee duni hau husu ba NAI,
para ami ema Israel nia Maromak,
selu o nia laran diak hotu!
Hau husu ba Nia haraik bensaun barak ba o,
tanba o hatudu o nia laran diak ba senhora Noemi.
Biar NAI mak kuidadu o iha nee,
tanba o buka sadere ba Nia,
hanesan manu oan sira subar iha manu inan nia liras okos.”
13I Rut hataan dehan, “Senhor! Maski hau laos ita nia ema serbisu, maibee hau hakarak halo haksolok ita nia laran nafatin. Tanba senhor hametin ona hau nia laran, no hatudu mos ita nia laran diak mai hau.”
14Bainhira sira deskansa atu haan, Boas hatete ba Rut, “Mai haan hamutuk ho ami iha nee deit! Foti paun nee, i se hakarak habokon ba tua mos.” I Rut baa tuur besik ema serbisu sira. Tuir mai Boas foo ba nia batar tunu. Rut haan too bosu, i sei iha restu.
15-16Bainhira nia fila fali ba toos hodi hili trigu restu nebee ema serbisu sira husik hela, Boas hatete ba nia ema serbisu sira dehan, “Rona didiak! La bele book nia. Husik nia hili trigu iha nebee deit. Nia hili besik trigu futun sira nee mos, la iha buat ida. Hau la hirus, se imi hasai trigu kain ida-rua nebee imi futu tiha ona nee, husik hela ba nia hili. La bele hirus nia, i la bele halo moe nia.”
17Rut serbisu iha toos loron tomak. Bainhira loro matan atu monu ona, nia baku trigu, hodi hasai nia musan hosi nia kain, i tau trigu musan iha bote ida nakonu.#2:17:Lian Ebreu hakerek dehan, bote ida, eyfah ida. Eyfah ida, mais-ou-menus iha litru 22. 18I nia lori trigu musan iha bote nee fila ba aldeia Belem, i hatudu nia kosar been hosi nia serbisu nee ba nia banin feto. I nia mos hasai hahaan restu hosi hahaan ohin meiu-dia nee foo ba nia banin.
19I Noemi husu ba Rut, “Ohin o hili trigu ida nee iha nebee? O serbisu iha see nia toos? Biar Nai Maromak foo bensaun ba ema nebee halo diak ba o iha loron ida nee.”
Rut hataan, “Amaa, toos nain nee naran Boas.”
20Noemi dehan ba nia feto foun, “NAI Maromak foo bensaun ba Boas. Tanba Maromak la haluha hatudu Nia laran diak ba ami nebee moris, no mos ba ita nia laen sira nebee mate ona. Hau dehan ba o, Boas nee ita nia familia besik. Nia mak ‘iha direitu atu selu kotu’. Nee dehan katak, nia mak iha direitu kaben ho o, hodi foo jerasaun ba o nia laen nebee mate ona.”#Levitiku 25:25
21Rut hataan, “Amaa, ohin Boas mos dehan mai hau, ‘Aban mai fali. O bele hili trigu besik hau nia ema serbisu sira nee too koa trigu hotu.’ ”
22Noemi hataan fali, “Bele deit! Nee sinal diak. Entaun o bele serbisu hamutuk ho nia ema feto sira tempu koa trigu hotu. Iha ema seluk nia toos ema bele book o. Maibee iha Boas nia toos o seguru.”
23Nunee Rut hili trigu restu iha Boas nia toos bes-besik feto serbisu sira too tempu koa trigu no silu batar ai-naruk hotu. I durante nee nia hela nafatin ho nia banin feto.
Currently Selected:
Rut 2: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.