Roma 16

Paulo hatoo kumprimentus ba maluk sarani sira iha Roma

1Liu hosi surat nee hau foo konhese ita nia irmán Febe. Nia nee serbii sarani sira iha sidade Senkreia. 2Simu nia ho didiak, hanesan ita sarani sira tenki simu malu, tanba nia tuir ita nia Nai. Se nia presiza saida deit, ajuda nia baa, tanba nia ajuda ema barak ona, no mos nia ajuda hau makaas.

3Hatoo hau nia kumprimentus ba Priscila#16:3:Biblia ho lian Gregu dehan “Prisca”. Prisca ho Priscila nee naran ida deit. ho nia laen Akila. Sira nain rua halao Kristu Jesus nia serbisu hanesan mos hau.#Apostolu sira nia Istoria 18:2 4Uluk sira atu besik mate bainhira sira salva hau. Laos hau mesak deit mak foo obrigadu ba sira, maibee sarani sira hotu nebee laos Judeu mos foo obrigadu ba sira.

5Kumprimentus ba sarani sira nebee baibain halibur malu halo orasaun iha Priscila ho Akila nia uma.

Kumprimentus ba hau nia belun diak Epenetus. Nia mak ema primeiru nebee fiar ba Kristu iha provinsia Ázia.

6Kumprimentus ba Maria, nia serbisu makaas ba imi.

7Kumprimentus ba Andróniku ho Júnias. Sira nee hau nia maluk Judeu, ami uluk dadur hamutuk iha komarka. Sira mak fiar uluk ba Kristu, bainhira hau seidauk fiar. Sira nain rua naran boot iha apostolu sira nia leet.

8Kumprimentus ba Amplíatu. Hau hadomi nia tanba ami nain rua laran ida ho ita nia Nai.

9Kumprimentus ba Urbano. Nia halao Kristu nia serbisu hamutuk ho ami. Kumprimentus mos ba hau nia belun diak Estákis.

10Kumprimentus ba Apeles, nia liu ona provasaun hodi fiar metin nafatin ba Kristu.

Kumprimentus ba ema hotu nebee hela iha Aristóbulu nia uma.

11Kumprimentus ba Herodiaun, hau nia maluk Judeu.

Kumprimentus ba maluk sira iha Narciso nia uma nebee fiar ba ita nia Nai.

12Kumprimentus ba ita nia maluk feto Trifena ho Trifosa. Sira nain rua serbisu makaas ba ita nia Nai.

Kumprimentus ba hau nia belun diak Pérsida. Irmán nee mos serbisu makaas loos ba ita nia Nai.

13Kumprimentus ba Rufu, ita nia Nai mak hili nia. Kumprimentus mos ba nia inan, hau konsidera nia hanesan hau nia inan rasik.#Marcos 15:21

14Kumprimentus ba Asínkritu, Flegonte, Hermes, Pátrobas, Hermas ho mos maluk sarani sira seluk nebee baibain halibur hamutuk ho sira.

15Kumprimentus ba Filólogu, Júlia, Nereu ho nia feton, ba Olimpas ho mos ba sarani sira seluk nebee mak baibain halibur hamutuk ho sira.

16Kumprimenta malu no rei malu nudar maun-alin iha Kristu. Kristu nia povu iha fat-fatin mos hatoo kumprimentus ba imi.#1 Korintu 16:20; 1 Tesalonika 5:26

Lia menon ikus

17Maun-alin sira, hau husu atu imi kuidadu teb-tebes ho ema sira nebee kontra fali hanorin nebee imi simu tiha ona. Sira nee hakarak halo imi sarani sira fahe malu i halo imi nia fiar nakdoko. Nunee hadook aan hosi ema sira hanesan nee. 18Tanba ema hanesan nee laos serbii Kristu ita nia Nai, maibee serbii deit sira nia aan rasik. Sira uza liafuan midar no promete buat oin-oin, ho nunee sira konsege bosok ema nebee simples.

19Ema hotu-hotu rona ona dehan imi moris tuir Maromak nia hakarak. Nee halo hau nia laran haksolok. Maibee Hau hakarak atu imi mos matenek halo buat nebee mak diak, i lalika halo buat aat. 20La kleur tan Maromak Dame Nain sei sama rahun tiha diabu iha imi nia ain okos. Hau harohan atu ita nia Nai Jesus Nia grasa hamutuk ho imi.

21Timóteo, hau nia kolega serbisu, foo kumprimentus ba imi, nunee mos Lúcio, Jasom ho Sosípatru, sira nee hau nia maluk Judeu.#Apostolu sira nia Istoria 16:1

22Hau, Tércio mak hakerek Paulo nia liafuan iha surat nee. Hau foo kumprimentus ba imi, tanba ita hotu tuir ita nia Nai.

23Gaio mos foo kumprimentus ba imi. Hau, Paulo, hela iha nia uma, i hau nia maluk sarani sira baibain halibur malu halo orasaun iha nee.

Erastu, tezoreiru iha sidade nee, ho ita nia maluk Kuartu mos foo kumprimentus ba imi.#Apostolu sira nia Istoria 19:29; 1 Korintu 1:14; 2 Timóteo 4:20

24[Hau harohan atu ita nia Nai Jesus Kristu Nia grasa hamutuk ho imi hotu. Amen.]#16:24:Surat Roma nee iha kopia barak. Kopia nebee antigu liu la hakerek versikulu 24 nee.

Onra no gloria ba deit Maromak

25Hahii ba Nai Maromak! Nia mak iha kbiit hodi halo ita sai forti, liu hosi Novidade Diak nebee hau foo sai ona kona ba Jesus Kristu. Hori uluk liu, ema la hatene Maromak nia planu kona ba Kristu, tanba sei segredu hela. 26Maibee agora Maromak Rohan-Laek hatudu sai ona planu nee ba ita ema. Fofoun Nia haruka Nia profeta sira hakerek Nia planu segredu nee iha Livru Sagradu. Agora Nia haruka ami foo sai iha nebee-nebee deit, atu ema hosi nasaun hotu-hotu bele fiar ba Nia i halo tuir Nia hakarak. 27Nia deit mak Maromak, Nia deit mak hatene buat hotu-hotu. Mai ita foti aas Nia naran too tinan ba tinan liu hosi Jesus Kristu. Amen.

Currently Selected:

Roma 16: BTDT

Highlight

Copy