1 Korintu 1

Paulo hahuu nia surat

1Surat nee hosi hau, Paulo, hamutuk ho ita nia maluk sarani Sóstenes. Maromak hili tiha ona hau no foti hau sai Kristu Jesus nia apostolu. 2Hau hakerek surat nee ba imi, Maromak nia povu iha sidade Korintu. Maromak halo imi nia laran moos ona liu hosi Kristu Jesus, i bolu ona imi sai Nia povu santu. Nia mos bolu see-see deit iha fatin hotu-hotu nebee adora ita nia Nai Jesus Kristu. Jesus nee sira nia Nai ho mos ita nia Nai.#Apostolu sira nia Istoria 18:1; Joel 2:32

3Ami harohan para ita nia Aman Maromak ho mos ita nia Nai Jesus Kristu hatudu Sira nia grasa ba imi, i foo paz ho hakmatek ba imi.

Paulo foo agradese ba Nai Maromak

4Hau sempre foo agradese ba hau nia Maromak, tanba Nia hatudu ona Nia grasa ba imi liu hosi Kristu Jesus. 5Liu hosi Kristu, Maromak foo ona bensaun oi-oin ba imi, para imi bele komprende klean, i bele foo sai Nia liafuan ho diak. 6Nee hatudu katak, buat nebee mak uluk ami foo sai ba imi kona ba Kristu, sai metin ona iha imi nia laran. 7Maromak foo tiha ona kbiit oi-oin ba imi, nunee imi la falta buat ida atu halao Nia serbisu durante imi hein ita nia Nai Jesus Kristu fila fali mai hosi lalehan. 8Maromak sei hametin imi nia fiar too rohan. Nunee, bainhira ita nia Nai Jesus Kristu fila fali mai hodi tesi ema hotu-hotu nia lia, la iha ema ida sei foo sala ba imi. 9Maromak halo imi nia fiar metin duni, tanba Nia sempre halo tuir saida mak Nia hatete, Nia bolu ona imi atu sai laran ida ho Nia Oan Jesus Kristu, ita nia Nai.

Sarani sira la bele fahe malu

10Maun-alin sira, hau husu hodi ita nia Nai Jesus Kristu nia naran atu imi haree malu didiak. La bele fahe malu, maibee moris neon ida laran ida.

11Maun-alin doben sira, iha ema balu hosi Cloe nia familia hatete mai hau dehan, imi balu haksesuk malu hela deit 12Imi balu hatete, “Hau tuir Paulo.” Iha balu dehan, “Hau tuir Apolo.” Balu dehan, “Hau tuir Pedro.”#1:12:Ho lian Gregu dehan Cefas. Cefas nee Pedro nia naran seluk. Balu tan dehan, “Hau tuir Kristu deit.”#Apostolu sira nia Istoria 18:24

13Bainhira imi fahe malu nunee, imi hanesan fahe fali Kristu! Hau, Paulo mak mate iha krus ba imi ka? Lae! Ema foo sarani imi hodi hau nia naran ka? Lae! 14Hau agradese ba Maromak, tanba uluk hau hamutuk ho imi iha nebaa, hau la foo sarani ema, hau so sarani deit Crispo ho Gaio.#Apostolu sira nia Istoria 18:8; 19:29; Roma 16:23 15Nunee imi ida la bele dehan, imi simu batizmu hodi hau nia naran. 16Hau foin hanoin hetan, hau mos foo sarani Estefanus ho nia famlia uma laran. Ida hau hanoin sarani sira nee mak nee. Sira seluk hau la hatene.

17Tanba Kristu haruka hau laos atu foo sarani ema, maibee atu foo sai Novidade Diak. Nia lakohi atu hau foo sai ho matenek mundu nian. Se lae, bainhira hau foo sai kona ba Kristu nia mate iha krus, liafuan nee la iha folin ba sira.

Nai Maromak hatudu Nia kbiit ho matenek liu hosi Nai Jesus nia mate

18Iha ema balu hanoin dehan, buat nebee ami hanorin kona ba Kristu nia mate iha krus nee, beik liu. Sira nee lao dadaun tuir dalan mate nian. Maibee ba ita nebee mak lao tuir dalan salvasaun, Kristu nia mate nee, hatudu sai Maromak nia kbiit. 19Tanba hakerek ona iha Livru Sagradu dehan,

“Ema nebee halo aan dehan komprende klean,

Hau sei harahun sira nia matenek.

Matenek nain sira nia hanoin,

Hau sei halakon tiha.”#Isaías 29:14

20Entaun oinsaa ho ema matenek sira, mestri relijiaun sira no tesi lia nain sira? Sira nee matenek tuir mundu nian, maibee Maromak halo sira nia matenek nee la vale tiha.#Jó 12:17; Isaías 19:12; 33:18; 44:25

21Maromak nia matenek makaas teb-tebes. Nia desidi katak, ita ema la bele konhese Nia liu hosi ita nia matenek rasik. Maibee Nia hakarak uza Novidade Diak kona ba Kristu nia mate atu salva see-see deit mak fiar, maski ema iha mundu nee dehan Novidade Diak nee buat beik ida. 22Ema Judeu sira hakarak haree lai milagre mak foin sira fiar. Ema Gregu sira hakarak rona lai buat nebee mak tama iha sira nia kakutak mak foin sira fiar.

23Maibee ami nee foo sai deit kona ba Kristu nia mate iha krus. Kristu nee Ema ida nebee Maromak promete ona hori uluk kedas atu haruka mai salva ita ema. Kristu nia mate nee hanesan fatuk ida nebee halo ema Judeu monu. I ba ema Gregu, buat nee la tama sira nia ulun. 24Maibee ba ita nebee Maromak bolu ona atu sai Ninian, atu ema Judeu ka laos Judeu, Kristu nia mate nee hatudu Maromak nia kbiit ho Maromak nia matenek. 25Ema balu konsidera Maromak nia matenek nee buat beik ida, afinal Nia matenek liu sira. Sira hanoin dehan Maromak la iha kbiit, afinal Nia kbiit boot liu sira nian.

26Maun-alin sira, hanoin took imi nia kondisaun bainhira Maromak bolu imi. Imi uluk nee oinsaa? Imi ituan deit mak matenek tuir mundu nian, ituan deit mak iha influensia, ituan deit mak liurai nia jerasaun. 27Maibee Maromak hili ema sira nebee ema konsidera beik hodi hamoe ema matenek. Nia hili ema sira nebee ema konsidera fraku hodi hamoe ema nebee iha kbiit. 28Nia hili ema sira nebee kiik iha mundu nee, sira nebee ema seluk hatuun, sira nebee ema seluk konsidera la iha folin. Nia hakarak uza ema kiik sira nee hodi hatuun fali ema importante sira. 29Maromak halo nunee atu ema ida la bele foti aan iha Nia oin.

30Maromak mak halo imi sai laran ida ho Kristu Jesus, i Kristu hatudu Maromak nia matenek mai ita. Nee dehan katak, Kristu halo ita diak malu ho Maromak, Nia halo ita sai ema nebee moris loos no santu, i Nia selu kotu ita nia tusan. 31Tanba nee, hanesan hakerek tiha ona iha Livru Sagradu, dehan, “Diak liu gaba buat nebee mak ita nia Nai halo, duke gaba ita nia aan rasik.”#Jeremias 9:24

Currently Selected:

1 Korintu 1: BTDT

Highlight

Copy

Compare