Roma 15

Moris tuir Kristu nia moris

1Ita nebee fiar metin tenki iha pasiensia hodi ajuda maluk sira nebee sei duvida kona ba saida mak ita sarani sira bele halo. Ita la bele buka diak deit ba ita nia aan. 2Maibee ita ida-idak tenki halo haksolok ita nia maluk sarani hodi halo diak ba nia, para nia fiar bele metin liu tan. 3Tanba Kristu rasik la buka moris deit ba Nia Aan. Iha Livru Sagradu, Kristu dehan ba Maromak, “Liafuan aat nebee ema hatete ba Ita Boot monu mos mai Hau.” #Salmu sira 69:8

4Buat hotu-hotu nebee hakerek ona iha Livru Sagradu, hakerek hodi hanorin ita, tulun ita hodi aguenta nafatin no foo korajen, para ita laran metin liu tan ba Maromak.

5Maromak mak tulun ita hodi aguenta iha terus laran no foo korajen mai ita. Hau harohan atu Maromak halo imi moris neon ida laran ida hodi tuir Kristu Jesus. 6Nunee imi neon ida ho lian ida hodi foti aas Maromak nia naran. Nia mak ita nia Nai Jesus Kristu nia Aman.

Kristu mak esperansa ba ema Judeu no ema nebee laos Judeu

7Tanba nee imi simu malu baa, hanesan Kristu simu tiha ona imi. Bainhira ema haree imi simu malu, sira sei foti aas Maromak nia naran. 8La bele haluha, Kristu foo Nia Aan para serbii ema Judeu hodi hatudu ba sira katak Maromak sempre halo tuir Nia promesa. Maromak nia promesa ba ita nia bei-ala sira, Kristu rasik mak kumpri. 9Nunee ema nebee laos Judeu mos sei foti aas Maromak nia naran tanba Nia mos hatudu nia domin ba sira. Nee hanesan hakerek ona iha Livru Sagradu dehan,

“Tanba nee hau sei hahii Ita Boot iha ema nebee laos Judeu nia leet.

Hau sei hananu foti aas Ita Boot nia naran.” #2 Samuel 22:50; Salmu sira 18:50

10Tuir mai, nia mos hakerek dehan,

“Imi sira nebee laos Judeu,

haksolok hamutuk ho Maromak nia povu.” #Deuteronomio 32:43

11Hakerek mos dehan,

“Imi nebee laos Judeu, hahii ita nia Nai!

Ema hosi nasaun hotu-hotu, hananu foti aas Nia naran!” #Salmu sira 117:1

12Profeta Isaias mos koalia kona ba Kristu,

“Jessé nia Jerasaun ida sei mai,

Nia sei ukun nasaun hotu-hotu.

Ema nebee laos Judeu laran metin ba Nia.” #Isaías 11:10

13Maromak rasik mak halo ita laran metin ba Nia. Hau harohan atu Nia halo imi haksolok teb-tebes no foo paz ho hakmatek ba imi, tanba imi fiar ba Nia. Nunee kbiit Espiritu Santu nian sei halo imi laran metin liu tan ba Maromak.

Maromak haruka Paulo ba foo sai Novidade Diak ba ema nebee laos Judeu

14Maun-alin sira, hau fiar katak imi nia laran diak teb-tebes, imi komprende ona buat barak, i imi bele ona hanorin malu. 15Maski nunee, iha surat nee hau koalia momoos ba imi kona ba buat balu, tanba hau hakarak foo hanoin fila fali ba imi. Hau brani hakerek nunee tanba Maromak hatudu Nia grasa mai hau. 16Nia foti hau sai Kristu Jesus nia atan para serbii ema nebee laos Judeu. Hau kaer knaar hanesan nai-lulik ida hodi foo sai Maromak nia Novidade Diak. Nunee ema nebee laos Judeu bele sai hanesan oferta ida nebee halo haksolok Maromak nia laran, tanba Espiritu Santu halo sira sai moos tiha ona.

17Nee mak hau nia laran haksolok loos ho hau nia serbisu ba Maromak, tanba hau laran ida ho Kristu Jesus. 18Hau la brani koalia buat seluk, hau so brani foo sai deit kona ba buat nebee Kristu halo ona liu hosi hau. Ema nebee laos Judeu agora rona ba Maromak tanba hau nia liafuan ho hau nia hahalok, 19ho sinal ho milagre bo-boot nebee mak hau halo ho Maromak nia Espiritu nia kbiit. Hau foo sai tiha ona Novidade Diak kona ba Kristu hosi Jerusalém too iha provinsia Ilíriku, hau nia serbisu iha rai nee hotu ona. 20Hori uluk kedas hau nia hakarak mak nee: atu foo sai Novidade Diak iha fatin nebee mak ema seidauk rona kona ba Kristu, tanba hau hakarak harii uma mesak, laos kontínua deit halo uma nebee ema seluk hahuu harii ona. 21Nunee hau halo tuir liafuan nebee hakerek iha Livru Sagradu dehan,

“Ema nebee seidauk rona kona ba Nia,

sira sei hatene.

Ema nebee seidauk simu Nia Liafuan,

sira sei komprende.”#Isaías 52:15

Paulo nia planu atu baa iha sidade Roma

22Durante tinan barak nia laran hau hakarak teb-tebes atu baa vizita imi, maibee too agora la konsege baa.#Roma 1:13 23Agora hau nia serbisu iha nee hotu ona, 24i hau nia planu atu baa rai Espanha. Iha dalan, hau hakarak vizita lai imi para haksolok hamutuk ho imi, depois imi bele ajuda hau hodi liu baa Espanha.

25Maibee agora, hau baa lai Jerusalém, lori ajuda ba Maromak nia povu sira iha nebaa. 26Tanba sarani sira iha provinsia Masedónia ho Akaia hakarak foo ajuda ba Maromak nia povu nebee mak kiak iha Jerusalém.#1 Korintu 16:1-4 27Sira foo ho kontenti, i sira senti sira iha tusan hodi foo ba Maromak nia povu iha Jerusalem. Tanba sira nebee laos Judeu simu tiha ona rikusoin espiritual hosi Maromak liu hosi ema Judeu. Tanba nee mak ema nebee laos Judeu iha obrigasaun atu ajuda ema Judeu.#1 Korintu 9:11

28Entaun hau sei baa entrega ajuda nebee sira foo. Entrega tiha hotu, hau baa vizita imi foin hau liu baa Espanha. 29Hau laran metin katak bainhira hau baa vizita imi, Kristu sei foo bensaun boot iha ita nia tempu hamutuk nee.

30Maun-alin sira, tanba Jesus Kristu sai ona ita nia Nai, i tanba Maromak nia Espiritu halo ita hadomi malu, nunee hau husu boot atu imi harohan makaas hamutuk ho hau para Maromak tulun hau. 31Husu atu Maromak kuidadu hau iha provinsia Judeia, atu ema nebee lakohi fiar ba Maromak la bele halo aat hau. I husu atu bainhira hau entrega ajuda ba sarani sira iha Jerusalém, sira bele simu ho diak. 32Depois, se Maromak hakarak, hau bele baa vizita imi ho laran haksolok, i ita nia laran bele hakmatek hamutuk. 33Hau harohan atu Maromak Dame Nain akompanha imi hotu. Amen.

Currently Selected:

Roma 15: BTDT

Highlight

Copy